އާސެނަލަށް ކުޅެމުން އަންނަ އިންގްލެންޑުގެ ބުކަޔޯ ސަކާ އަށް ލިބިފައިވާ އަނިޔާ ސީރިއަސް ކަމަށް، އެ ޓީމުގެ ކޯޗު މިކޭލް އާޓެޓާ ބުނެފި އެވެ.

ސަކާ އަށް އަނިޔާވެފައި ވަނީ ލީގުގައި އާސެނަލް އިން އެންމެ ފަހުން ކްރިސްޓަލް ޕެލަސްއާ ދެކޮޅަށް ކުޅުނު މެޗުގަ އެވެ. އެ މެޗުގައި އާސެނަލްގެ ފުރަތަމަ 11 ގައި ހިމެނިގެން ސަކާ ކުޅުނު ނަމަވެސް، ވަކި ހިސާބަކުން ވަނީ އޭނާ ބަދަލުކޮށްފަ އެވެ. ސަކާ ބަދަލު ކޮށްފައި ވަނީ އޭނާގެ ފަލަމަސްގަނޑަށް ލިބުނު އަނިޔާއެއްގެ ސަބަބުންނެވެ.

ސަކާގެ އަނިޔާއާ ގުޅޭ ގޮތުން ވާހަކަ ދައްކަމުން އާޓެޓާ ބުނީ، ސަކާގެ އަނިޔާ ރަނގަޅު ނޫން ކަމަށެވެ. އެގޮތުން ގިނަ ދުވަސްތަކެއް ވަންދެން ސަކާ ކުޅުމާ ދުރުގައި ހުންނަން ޖެހޭނެ ކަމަށް ވެސް އާޓެޓާ ވަނީ ބުނެފަ އެވެ. އޭނާ ބުނީ އަނިޔާގެ ސަބަބުން ސަކާ ކުޅުމާ ދުރަށް ދާން ޖެހުމަކީ އާސެނަލަށް ކުރިމަތިވާނެ ގެއްލުމެއް ކަމަށާއި، އޭނާ އަކީ ޓީމުގައި ހުރި މުހިންމު ކުޅުންތެރިޔެއް ކަމަށެވެ.

މީގެ އިތުރުން އާޓެޓާ ބުނެފައި ވަނީ ދެން އާސެނަލް އިން ތައްޔާރުވާން ޖެހޭނީ ސަކާ ނެތް ޙާލަތަކަށް ކަމަށާއި، އެ ޙާލަތަކީ ވަރަށް އުނދަގޫ އަދި ޗެލެންޖިން ޙާލަތަކަށް ވާނެ ކަމަށެވެ. އެ ޗެލެންޖުން އަރައި ގަންނަން އާސެނަލްގެ ކަންކަން ރާވަން ޖެހޭނެ ކަމަށާއި، އެކަން ކުރެވޭނެ ކަމުގެ އުންމީދެއް އޮތް ކަމަށް ވެސް އާޓެޓާ ވަނީ ބުނެފަ އެވެ.

ސަކާ އަންނަނީ 2018 ވަނަ އަހަރުން ފެށިގެން އާސެނަލްގެ ސީނިއާ ޓީމަށް ކުޅެމުންނެވެ. އޭނާ ވަނީ މިހާތަނަށް އާސެނަލަށް ކުޅެދިން 250 މެޗުގައި 67 ލަނޑު ޖަަހައިފަ އެވެ. މި ސީޒަންގައި 24 މެޗެއް ސަކާ އާސެނަލަށް ކުޅެދީފައިވާއިރު، އޭނާ ވަނީ ނުވަ ލަނޑު ޖަހައިފަ އެވެ. އޭގެ ތެރެއިން ފަސް ލަނޑަކީ އިނގިރޭސި ޕްރިމިއާ ލީގުގައި ސަކާ ޖަހާފައިވާ ލަނޑުތަކެވެ.