ޖެނުއަރީ ޓްރާންސްފާގަ ބާސާއިން ގަނާޗޯ ނުގެންނާނެ

އަންނަ ޖެނުއަރީ މަހުގެ ޓްރާންސްފާގައި މެންޗެސްޓަރ ޔުނައިޓެޑުގެ ޒުވާން ވިންގް، އަލެހަންދްރޯ ގަނާޗޯ ގެނައުމުގެ އެއްވެސް ވިސްނުމެއް ނެތް ކަމަށް ސްޕެއިންގެ ގަދަ ބާރު ބާސެލޯނާއިން ބުނެފިއެވެ.

އެ ކުލަބުން އަންނަ ޖެނުއަރީ މަހުގެ ޓްރާންސްފާ އަށް ކުލަބު އިތުރަސް ވަރުގަދަ ކުރުމަށް ގިނަ ކުޅުންތެރިންތަކެއް ގެނައުމަށް ދަނީ މަސައްކަތް ކުރަމުންނެވެ. އެގޮތުން ބާސާއިން ވަނީ އެ ކުލަބަށް ގެންނަން ބޭނުންވާ ކުޅުންތެރިންގެ ނަންތައް ޝޯޓްލިސްޓު ވެސް ކޮށްފައެވެ. ނަމަވެސް އެ ލިސްޓުގައި ގަނާޗޯ ނުހިމެނެއެވެ.

ގަނާޗޯ ޔުނައިޓެޑު ދޫކޮށްލަން އުޅޭކަމުގެ އަޑުތަކެއް މިހާރު ފެތުރުފައިވާއިރު، ޔުނައިޓެޑާއި ފަހުން ހަވާލުވި އައު ކޯޗު ރުބެން އަމޯރިމް އާއި ގަނާޗޯ އާއި ދެމެދު އޮތް ގުޅުން ހީނަރުވެފައިވާކަމަށް ބައެއް މިޑިއާ ރިޕޯޓުތަކުން ވަނީ ބުނެފައެވެ.

އެހެން ކަމުން ކުރިއަށް އޮތް ތަނުގައި ގަނާޗޯއަށް ޔުނައިޓެޑުން ލިބޭ ފުރުސަތުތައް މަދުވެދާނެ ކަމަށް ވަރަށް ބޮޑަށް ހީވެފައިވާއިރު، ގަނާޗޯ ދަނީ ޔުނައިޓެޑު ދޫކޮށްލަން މަސައްކަތް ކުރަމުން ކަމަށް އިނގިރޭސި ބައެއް ނޫސްތަކުން ބުނެއެވެ.

ޔުނައިޓެޑުގައި ވެސް މުހިންމު ދައުރެއް އަދާކުރާ ގަނާޗޯ ބާސެލޯނާއަށް ބަދަލުވާން އުޅޭކަމުގެ އަޑުތައް މީޑިއާގައި ގަދަވެފައިވީ ނަމަވެސް ބާސާއިން ވަނީ އެކަން ދޮގުކޮށްފައެވެ.

ބާސާއިން ބުނީ އަންނަ ޖެނުއަރީ ޓްރާންސްފާގައި ބައެއް ކުޅުންތެރިން ހޯދުމަށް މަަސައްކަތް ކުރާނެ ކަމަށާއި އެއީ އެ ކުލަބުގެ ބައެއް ކުޅުންތެރިން އަނިޔާގައި ތިބުމުން އެތަން ފޫބެއްދުމަށް ކަމަށް ބާސާއިން ބުނެއެވެ.

އެހެން ނަމަވެސް ގަނާޗޯ އެއީ ބާސާއިން ބޭނުންވާ ކުޅުންތެރިންގެ ލިސްޓުގައި ހިމެނޭ ކުޅުންތެރިއެއް ނޫންކަމަށާއި ގަނާޗޯ ގެނައުމަށް އެއްވެސް ވަރަކަށް ވިސްނުން ނުގެންގުޅޭކަމަށް ބާސާއިން ބުނެއެވެ.

އުމުރުން 20 އަހަރުގެ ގަނާޗޯ ޔުނައިޓެޑަށް ކުޅެން ފެށީ 2021 ވަނަ އަހަރުގައެވެ. އޭނާ މިހާތަނަސް ޔުނައިޓެޑަށް ކުޅެދިން 114 މެޗުގައި 24 ގޯލު ޖަހައިދީފައިވެއެވެ.