ސިޔާސީ މަގާމުތަކުގައި ތިއްބެވި އެއްވެސް ބޭފުޅެއް ދައްކަވާ ވާހަކަތައް މިހާރު ރައްޔިތުން ގަބޫލެއް ނުކުރޭ: އެމްޑީޕީ

ރައީސުލްޖުމްހޫރިއްޔާ ޑރ.މުހައްމަދު މުއިއްޒުގެ ސަރުކާރުގެ ދޮގުހެދުމާއި އޮޅުވާލުން އިންތިހާއަށް ގޮސްފައިވާ ކަމަށާއި، މިއަދު ސިޔާސީ މަގާމުތަކުގައި ތިއްބެވި އެއްވެސް ބޭފުޅެއް ދައްކަވާ ވާހަކަތައް ރައްޔިތުން ގަބޫލުނުކުރާ ކަމަށް ދިވެހިރައްޔިތުންގެ ޑިމޮކްރެޓިކް ޕާޓީ (އެމްޑީޕީ)އިން ބުނެފިއެވެ.

ހޮނިހިރު ދުވަހު ބޭއްވި ނޫސްވެރިންގެ ބައްދަލުވުމުގައި އެމްޑީޕީ ގާނޫނީ ކޮމެޓީގެ މެންބަރު އަހުމަދު މައުރޫފް ވިދާޅުވީ ރައީސް މުއިއްޒުގެ ސަރުކާރުން ކުރާ ކަންކަން މިސަރުކާރުގެ ސިޔާސީ ބޭފުޅުން ވަރަށް ރަނގަޅަށް ދިފާއު ކުރައްވާ ކަމަށެވެ.

ނަމަވެސް މި ސަރުކާރުގެ ދޮގުހެދުމާއި އޮޅުވާލުމާއި، އަދި ވައްކަން އިންތިހާއަށް ދިއުމުގެ ސަބަބުން މިހާރު ސިޔާސީ މަގާމުތަކުގައި ތިއްބެވި ބޭފުޅުން ދައްކަވާ އެއްވެސް ވާހަކައެއް ރައްޔިތުން ގަބޫލުނުކުރާ ކަމަށާއި، އިތުބާރު ގެއްލިފައިވާ ކަމަށް މައުރޫފް ވިދާޅުވިއެވެ.

ނަތީޖާއެއް ގޮތުން އެޗްޑީސީ ގޯތީގެ ވައްކަމުގެ މައްސަލަ ވެސް ފޮރުވުމަށް ސަރުކާރުން ފުލުހުން ބޭނުންކޮށްގެން ސިޔާސީ ނޫސްވެރިންގެ ބައްދަލުވުމެއް ބާއްވައި، ހަގީގަތް އޮޅުވާލުމަށް މަސައްކަތް ކުރީ ކަމަށް އޭނާ ވިދާޅުވިއެވެ. 19 ޑިސެންބަރު 2024ވީ ބުރާސްފަތި ދުވަހުގެ ރޭ ފުލުހުން ބޭއްވި ނޫސްވެރިންގެ ބައްދަލުވުމަށް އިޝާރާތް ކުރައްވައި މައުރޫފް ވިދާޅުވީ ތުހުމަތުކުރެވޭ މީހުން ބުނާ އެއްޗެއް ފުލުހުން ހާމަނުކުރާ ކަމަށާއި، މާޒީއަށް ބަލާއިރު، ފުލުހުން ތަހުގީގު ކުރިއަށް ނުގެންގޮސް މިގޮތަށް މައުލޫމާތު ނުދޭ ކަމަށެވެ. ސައްހަ ނޫން ލިޔެކިއުންތަކެއް ގެންގުޅެފައިވާ މައްސަލައިގައި ވެސް ފުލުހުންނަށް ފޮރެންސިކް ތަހުލީލެއް ކުރިއަށް ގެންދެވޭނެ ކަމަށް އޭނާ ވިދާޅުވިއެވެ.

މައުރޫފް ވިދާޅުވީ އޭޝިޔާ ސަރަހައްދުގައި ހުރި އެންމެ ފެންވަރު ރަނގަޅު ފޮރެންސިކް ލެބް ހުރި ކަމަށް ފުލުހުން ބުނާއިރު، އެކަރުދާހެއްގެ އުމުރު، ޕްރިންޓް ކޮށްފައިވާ ދެލީގެ އުމުރު އަދި މީހެއްގެ އަތުލިޔުމެއްވާނަމަ އެއީ ކާކުގެ ލިޔުމެއްތޯ ބެލޭނެ ކަމަށާއި، އެއީ މިޒަމާނުގައި ވަރަށް އާދައިގެ ކަމެއް ކަމަށެވެ.

މިސަރުކާރުގެ ސިޔާސީ ބޭފުޅުން ދައްކަވާ ވާހަކަތައް ރައްޔިތުން ގަބޫލުނުކުރާ ކަމަށް އެމްޑީޕީން ބުނެފައިވާއިރު، އެޗްޑީސީގެ ގޯތީގެ ވައްކަމާއި ގުޅިގެން ގިނަ ބައެއްގެ ފާޑުކިޔުން ސަރުކާރަށް ވަނީ އަމާޒުވެފައެވެ. އަދި ފުލުހުންނާއި، އެންޓި ކޮރަޕްޝަން ކޮމިޝަން (އޭސީސީ)އިން މިމައްސަލަ ތަހުގީގު ކުރި ނަމަވެސް އިންސާފުވެރި މިނިވަން ތަހުގީގެއް ކުރިއަށް ނުދާނެ ކަމަށް ގިނަ ބަޔަކު ދަނީ ބުނަމުންނެވެ.