މި ސަރުކާރުގެ ގާނޫނީ ހައިސިއްޔަތު ގެއްލިފައިވާ ކަމަށާއި، އާހިރުގައި ރައީސުލްޖުމްހޫރިއްޔާ ޑރ.މުހައްމަދު މުއިއްޒު އޮންނަވަންޖެހޭނީ ޖަލުގައި ކަމަށް ގަލޮޅު ދެކުނު ދާއިރާގެ މެންބަރު މީކާއިލް އަހުމަދު ނަސީމް ވިދާޅުވެއްޖެއެވެ.
ބުރާސްފަތި ދުވަހުގެ ރޭ އެމްޑީޕީ ހަރުގެ ޖަލްސާގައި މެންބަރު މީކާއިލް ވިދާޅުވީ ރައީސް މުއިއްޒުގެ ސަރުކާރަށް އަހަރަކަށްވުރެ ގިނަ ދުވަސްވެގެންދާއިރު، ވައްކަމާއި ހިޔާނާތުގެ އަޑު ނޫން އަޑެއް ރައްޔިތުންނަށް ނީވޭ ކަމަށެވެ. އަދި ރާއްޖޭގެ އުތުރާއި ދެކުނުން ބެލި ނަމަވެސް ފެންނަނީ ވައްކަން ކަމަށާއި، ހުޅަނގާއި، އިރުން ބެލި ނަމަވެސް ފެންނަނީ ވައްކަން ކަމަށް މެންބަރު މީކާއިލް ވިދާޅުވިއެވެ.
މެންބަރު މީކާއިލް ވިދާޅުވީ ގިނަ ވައްކަމުގެ ތުހުމަތުތައް ކުރެވޭއިރު، މިސަރުކާރަށް ޖަވާބުދާރީނުވެވޭ ކަމަށެވެ.
މި ސަރުކާރު ފެށުނުއިރުއްސުރެ ފެށިގެން ރަސްމާލެ ހިއްކަން ކަމަށް ބުނެ ރާޖޫއާއެކު ކުރި ވައްކަން އެފްއެސްއެމްއިން ކުރި ތެލުގެ ވައްކަން، އެސްޓީއޯއިން އަދި އަލަށް ދިވެހިރާއްޖެއަށް ސަބްސިޑައިޒްކޮށްގެން އިންޑިއާއިން ފޮނުވާ ކާޑުން ކުރި ވައްކަން އެޗްޑީސީން ކުރި ގޯތީގެ ވައްކަން، ވިނަރެސް އެޕާޓްމަންޓްތަކުން ކުރި ވައްކަން.ގަލޮޅު ދެކުނު ދާއިރާގެ މެންބަރު މީކާއިލް އަހުމަދު ނަސީމް
ހައުސިން ޑިވެލޮޕްމަންޓް ކޯޕްރޭޝަން (އެޗްޑީސީ)ގެ ގޯތީގެ ކޮރަޕްޝަނަށް އިޝާރާތް ކުރައްވައި މެންބަރު މީކާއިލް ވިދާޅުވީ އެކަން އާއްމު ރައްޔިތުންނާއި ހަމައަށް ތިލަވުމުން އެޗްޑީސީގެ މެނޭޖިން ޑިރެކްޓަރު އިބްރާހިމް ފަޒުލް ރަޝީދު މަސައްކަތް ކުރެއްވީ އެކަން ހައުސިން މިނިސްޓަރު ޑރ.އަލީ ހައިދަރުގެ ބޮލުގައި އެޅުމަށް ކަމަށެވެ. އަދި މިނިސްޓަރު ހައިދަރު މަސައްކަތް ކުރެއްވީ އެމްޑީ ފަޒުލް ބޮލުގައި އެކަން އެޅުމަށް ކަމަށެވެ. ނަމަވެސް މިވައްކަމުގެ ފުރިހަމަ ޒިންމާ ނަގަންޖެހޭނީ ރައީސް މުއިއްޒު ކަމަށާއި، އެގޮތަށް ރައްޔިތުން ވެސް ގަބޫލުުރާ ކަމަށް މެންބަރު މީކާއިލް ވިދާޅުވިއެވެ.
މީގެ އިތުރުން މެންބަރު މީކާއިލް ވިދާޅުވީ މިވައްކަމުގެ މައްސަލަތައް މީގެ ފަސް މަސް ކުރިން ރައީސް މުއިއްޒުގެ ސަމާލު ކަމަށް ގެނެސްފައިވާ ކަމަށެވެ. ނަމަވެސް އެކަން ނުބަލައި ދޫކޮށްލީ ކަމަށް މެންބަރު މީކާއިލް ވިދާޅުވިއެވެ.
މީގެ ފަސް މަސް ދުވަސް ކުރިން އެޗްޑީސީގެ ޗެއަރމަނަކަށް ހަމަ ރައީސް ޑރ.މުހައްމަދު މުއިއްޒު އައްޔަން ކުރައްވާފައި ހުންނެވި ބޭފުޅެއް ޒުހޫރު ކިޔާ. އެމަނިކުފާނު ރައީސް މުއިއްޒަށް ވަރަށް ތަފްސީލްކޮށް އެމަނިކުފާނަށް އެތަނުން ފެންނަމުންދާ މަންޒަރުތަކާއި، އެމަނިކުފާނު ތަޖުރިބާ ކުރަމުންދިޔަ އެކި ކަންކަމުގެ ވާހަކަ ވަރަށް ތަފްސީލުކޮށް ރައީސުލްޖުމްހޫރިއްޔާ އަށް އަންގަވާފައިވޭ. އެހެންނަމަވެސް އެމަނިކުފާނު އެވައްކަމުގެ ވާހަކަ އެހިޔާނާތުގެ ވާހަކަ ރައްޔިތުންގެ ހައްގުތަކަށް ފަޒުލް އަރައިގަންނަމުންދާކަމުގެ ވާހަކަ ރައީސް މުއިއްޒަށް އެންގެވުމުން ކިހިނެތްތޯ ވީ. އެމަނިކުފާނު މަގާމުން ވަކި ކުރެއްވީ. ރައީސް ޑރ.މުހައްމަދު މުއިއްޒު. ދެން އަޅުގަނޑުމެން ބުނަންވީތޯ އެޗްޑީސީ ވައްކަން ކުރީ ފަޒުލްއޭ. އަޅުގަނޑުމެން ބުނަންތޯވީ ރައްޔިތުންގެ ގޯތިން ވައްކަން ކުރީ ހައިދަރޭ. ނޫން. ވައްކަން ކުރީ ޑރ.މުހައްމަދު މުއިއްޒު. އެހުންނެވީ ރައްޔިތުންގެ ހައްގަށް އަރައިގެން. އެހުންނެވީ ވައްކަން ކުރައްވާފައި. އެހުންނެވީ ވައްކަން ކުރައްވާފައި. އިސްތިއުފާ ދެއްވަންޖެހޭނެ. އިސްތިއުފާ ދެއްވަންޖެހޭނެ. މިސަރުކާރުގެ ގާނޫނު ހައިސިއްޔަތު ގެއްލިއްޖެ. މިސަރުކާރުގެ ޝަރުއީއަތު ގެއްލިއްޖެ.ގަލޮޅު ދެކުނު ދާއިރާގެ މެންބަރު މީކާއިލް އަހުމަދު ނަސީމް
މެންބަރު މީކާއިލް ވިދާޅުވީ މިހާރު ރައީސް މުއިއްޒު ހުންނަވަންޖެހޭނީ ގޭގައި ކަމަށާއި، އެމަނިކުފާނަށް މައްޗަށް ތަހުގީގު ހިންގަންޖެހޭ ކަމަށެވެ. އަދި އުފުލަންޖެހޭނީ ދައުވާ ކަމަށާއި، އާހިރުގައި ރައީސް މުއިއްޒު އޮންނަވަންޖެހޭނީ ޖަލުގައި ކަމަށް މެންބަރު މީކާއިލް ވިދާޅުވިއެވެ.
