ރައީސް ޑރ މުހައްމަދު މުއިއްޒު އަޑަށް ބާރުލައްވާފައި ވިދާޅުވާ ވާހަކަފުޅެއް އޮވެއެވެ. އެމަނިކުފާނުގެ ސަރުކާރުގައި ރައްޔިތުންނަށާއި ޤައުމަށް ގެއްލުންވާ ފަދަ އެއްވެސްކަމެއް ސަރުކާރުގެ ވެރިއަކު ކުރިއަކަ ނުދެއްވާނަމޭއެވެ. ޚާއްޞަކޮށް ކޮރަޕްޝަނާއި ފަސާދައަށް މަގުފަހިވާނޭފަދަ އެއްވެސް ކަމެއް ކުރާކަށް ޖާގައެއް ނުދޭނަމޭއެވެ. ވަގުތުން ފިޔަވަޅު އަޅުއްވާނެކަމަށް ތަކުރާރުކޮށް ވިދާޅުވަމުން ގެންދަވައެވެ.
އެކަމަކު ފެންނަނީ އޭގެ ދިމާ އިދިކޮޅެވެ. ދިއުޅި ދިގުކުރާކަށް ހާސަރުތަކެއް ދެމުމުގެ ބޭނުމެއް ނެތެވެ. ބައެއް ކަހަލަ މިސާލުތަކުން ފެށިއްޔާ ނަގައިގަންނަން ފަސޭހަވާނެއެވެ.
މަޝްހޫރު ތިން ނައިބު ވަޒީރެއްގެ ވާހަކައިން ފަށާނަމެވެ. ކެމްޕޭނުގައި ބޭނުންކުރި "އިންޑިއާ އައުޓް" އިން ނުނެއްޓި ވެރިކަމަށް އާދެވުމުންވެސް ނައިބު ވަޒީރުންތަކެއް ދިޔައީ އިންޑިއާއަށް ހެއްދެވި ނުހެއްދެވިއަށް ގޮވަމުންނެވެ. އާޑަފުރައްސާރަކޮށް ކާޓޫނުތަކާއި އެޑިޓް ފޮޓޯތައް ސޯޝަލް މީޑިއާ މެދުވެރިކޮށް މުޅި ދުނިޔެއަށް ދޫކުރަމުންނެވެ. ރޭކާލީ ގޮތްހުސްވެ ސަލާންޖަހަން އިންޑިއާއަށް ރައީސް މުއިއްޒު ވަޑައިގަންނަވަން ޖެހިވަޑައިގަތުމުންނެވެ. އެމީހުން ލައްވައި ނަމެއްގައި އިސްތިއުފާ ދެއްވީ އެނޫން އެއްވެސް ގޮތެއް ނެތިގެންނެވެ. އޭގެ ކުރިން އެވެރިން ތިބީ މުސާރައާއި އިނާޔަތް ލިބޭގޮތައް ފުރިހަމަ އިއްޒަތުގައި ކިޔާނެ އެއްޗެއް ކިޔާން ނަމެއްގައި ސަސްޕެންޝަންގައެވެ. އިންޑިއާއަށް ވަޑައިގެން ނެންގެވި "ޔޫޓާންއާއެކު" ބޮޑު ވަޒީރު މޯދީ ދެއްވި ފެހި ސިގްނަލް ހިއްޕަވައިގެން ރާއްޖެއަށް ވަޑައިގެންނެވުމާއެކު އެތިން ނައިބުން އަނެއްކާވެސް ސަރުކާރުގެ ހަފޮޅުން އެތެރެއަށް ރަސްމީކޮށް ވެއްދެވީއެވެ. ގާތްގަނޑަކަށް ހަމަ އެމުސާރައިގައި ނުވަތަ އެއަށްވުރެ ބޮޑުކޮށެވެ.
މިހާރު މިފެންމަތިވީ އަނެއްކާ އަނެއް ކަންތަކެވެ. ރައްޔިތުންނާ އެންމެ ގުޅުންހުރި ބޯހިޔާވަހިކަމުގެ މައްސަލައާ ގުޅޭ އެޗްޑީސީ ތެރެއިންނެވެ. ކުރީގެ ސަރުކާރުން ދީފައިވާ ގޯތިތަކުން ވައްކަން ކުރި މައްސަލައެއް ފެންމަތިވީއެވެ. އެޗްޑީސީގެ އެމްޑީ ފަޒުލްގެ ބޭބެއަށް ގޯއްޗެއް ލިބުނު މައްސަލައިގާ ރައްޔިތުން ނުކުމެ އެޗްޑީސީ ދޮށަށް އެއްވީމައެވެ. އެފަދަ ކަމެއް ފަޅާއެރުމުގެ ކުރިންވެސް އެޗްޑީސީއާއި އެމްޑީ ފަޒުލްއަށް ކުރެވޭ ޚިޔާނާތުގެ އެތައް ވާހަކައެއް ސީދާ ރައީސަށް އަޑުއިވޭވަރަށް ދިޔައީ ދައްކަމުންނެވެ
ފަޒުލްގެ މައްޗަށް ތުހުމަތު ކުރެވޭ މައްސަލަތައް ރައީސް މުއިއްޒުގެ ސަމާލު ކަމަށް މިދިޔަ ޖުލައިގައި ގެނައީ އެ ކުންފުނީގެ ކުރީގެ ޗެއާމަން އަހުމަދު ޒުހޫރެވެ. އޭނާ ރައީސްއަށް ފޮނުއްވި ހަތް ސަފުހާގެ ސިޓީގައި ކުންފުނީގެ އެތެރޭގެ މައްސަލަތަކާއި، ހިޔާނާތުގެ މައްސަލަތަކާއި ވިޔަފާރިވެރިންގެ ޝަކުވާތައް ހިއްސާކޮށްފައިވެ އެވެ. އޭގައި އެތައް ތުހުމަތެއް ރައީސަށް ފޮނުވި ސިޓީގައި ޒުހޫރު ވިދާޅުވެފައިވެއެވެ
އެއިން އެއްވެސް ކަމަކަށް ކަހާތަން ފިރުވާވެސް ނުލައްވައި ރައީސް ހުންނެވީ ހަނެވެ.
ބޭބެއަށް ގޯތިދިން މައްސަލަ ފެންމަތިވީ ބޮޑެތި ތުހުމަތުތަކަށް ހޭވެސް އަހާނުލައި އަޅާވެސް ނުލައްވާ ހުންނަވަނިކޮށެވެ. މިކަން ފެންމަތިވުމުން ދެންވެސް ކަންކުރެއްވީ ތަފާތު ގޮތަކަށެވެ. ފަޒުލް ސަލާމަތް ކުރެއްވުމުގައި ސީދާ ސަރުކާރު ނުކުންނެވިތަނެވެ. ސަރުކާރުގެ ޕްރޮޕެގެންޑާ ފަތުރައިދޭ ގައުމީ ޓީވީ ޕީއެސްއެމް މެދުވެރިކޮށް ރައްޔިތުންނަށް މުޅިން އެހެން މަންޒަރެއް ދައްކަވަން އުޅުއްވިތަނެވެ. ފުލުހުން ވަދެ ކުރަންފެށި ޖިނާއީ ތަހުގީގު ރައްދުވާ ފަޒުލް، ނޫސްވެރިންނާ ބައްދަލުކޮށް ކިޔާނެ އެއްޗެއް ކިޔާން ދޫކޮށްލެއްވިތަނެވެ. ސަރުކާރުގެ ޕްރޮމޯޝަންގައި އުޅޭ ސޯޝަލް މީޑިއާގައި ހަރަކާތްތެރިވާ ކުދިންކޮޅު ނެރެގެން މުޅި އެތި އެހެންގޮތަކަށް އަނބުރަން އުޅުއްވިތަނެވެ.
އަތްދަށުން ދޫވެ އަތަށް ގޮވީ އެއްވާމެއްގައި ނޫސްވެރިން ކުރި ބުރަ މަސައްކަތުން ރައްޔިތުންނަށް ސީދާ މަންޒަރު ގެނެސް ހާމަކުރީމައެވެ. ވަގަށް ބޭބެއަށް ދިންކަމަށް ބުނާ ގޯތީގެ އިންފާރު ރައްޔިތުންނަށް ދައްކާލީމާ އެނޫން ގޮތެއް ނެތިގެން ޕީސީބީން ފަޒުލްއާއި ބޯޑު ސަސްޕެންޑްކުރިއަސް އަދި އަދަދަށްވެސް ރައީސް މީހާގެ ހިލަމެއްނެތެވެ.
ކޮންމެއަކަސް އާއްމު ރައްޔިތުން ތުހުމަތު ކުރާ މިފަދަ ކިތައްމެ ކަމެއް އެބަހުއްޓެވެ. ރައީސްމުއިއްޒުއަށް ވައިއެޅިލަން ކެރިވަޑައިނުގަންނަވާނެ މިފަދަ ކިތައްމެ ބަޔަކު އެބަތިއްބެވެ. އެވެރިން ކޮންމެފަދަ ކަމެއް ކުރިނަމަވެސް ފިޔަވަޅެއް އަޅާލަން ނުވަތަ އެކަހެރި ކުރަން ނުކެރޭނެ ވަޒީރުންނާއި އެމްޑީން އަދި އެފެންވަރުގެ އެހެން މީހުންވެސް އެބަތިބިކަމަށް ސީދާ ޕީއެންސީގެ މީހުންވެސް ދަނީ ބުނަމުންނެވެ. ކަމަކަށްފަހު ކަމެއް އެވެރިން ދަނީ ކުރަމުންނެވެ. ރައީސް މީހާ ހުންނެވީ ފަހަތު ފަޔަށް ބުރަވެވަޑައިގަންނަވައިގެންނެވެ. ފޮރުވިފައިވާ ސިއްރުތައް ދޫދޫމަތިން ދެކެވުނަސް، ހަގީގީ ސިއްރަކީ ކޮބައިކަމެއް އަދި ނޭނގެއެވެ. އެކަމަކު އެއީވެސް ފަޒުލްގެ ބޭބެގެ ގޯތީގެ އިންފާރު ފެނުނު ފަދައިން ބުޅާގޯނިން ބޭރުވާނޭ ކަމެކެވެ. އަދި ފަޅާއަރާނެ ކަންކަމެވެ.
