ދަރިވަރުން ގްރޫމްކުރަން އުޅުނުކަމަށް ތުހުމުތުކުރެވޭ ޓީޗަރު މިނިވަން ކޮށްފި

ދަރިވަރުން ގްރޫމްކުރަން އުޅުނުކަމަށް ތުހުމުތުކުރެވޭ ޓީޗަރު ބަންދުން ދޫކޮށްލައިފިއެވެ.

މ، ފ، ދ، ތ، ލ ގައި ހިމެނޭ ރަށެއްގައި ސްކޫލް ފިރިހެން ޓީޗަރެއް ދަރިވަރުންގެ އުމުރާ ނުގުޅޭ ވާހަކަ ދައްކައި ގުރޫމް ކުރި ކަމަށް ތުހުމަތު ކުރެވޭ މައްސަލައެއް 17 އޮކްޓޫބަރު 2024 ގައި ފުލުހުންނަށް ވަނީ ރިޕޯޓުކޮށްފައެވެ.

މިމައްސަލައާ ގުޅިގެން 29 އަހަރުގެ ދިވެހި ފިރިހެނަކު އޮކްޓޫބަރު މަހުގެ 27 ވަނަ ދުވަހު ކޯޓު އަމުރެއްގެ ދަށުން ވަނީ ހައްޔަރުކޮށްފައެވެ. އަދި އޭނާގެ ބަންދާމެދު ގޮތެއް ނިންމުމަށް ކޯޓަށް ހާޒިރު ކުރުމުން 20 ދުވަހަށް ބަންދު ކުރުމަށް އަމުރުކޮށްފައިވާއިރު، ދެވަނަ ފަހަރަށް ކޯޓަށް ހާޒިރު ކުރުމުން 30 ދުވަހަށް ބަންދު ކުރުމަށް އަމުރުކޮށްފައިވެއެވެ.

މީގެ އިތުރުން ބުދަ ދުވަހު ފުލުހުން ބުނީ، ބަންދުގެ މުއްދަތު އިތުރު ކުރުމަށް ކޯޓަށް ހާޒިރުކުރުމުން ޝަރުތުތަކާއެކު އެމީހާ ދޫކޮށްލާފައިވާ ކަމަށެވެ.

ފުލުހުން ބުނީ މިމައްސަލާގެ ތަހުގީގު ނިންމައި ނޮވެންބަރު މަހުގެ 25 ވަނަ ދުވަހު ދައުވާކުރުމަށް ޕްރޮސެކިއުޓަރ ޖެނެރަލްގެ އޮފީހަށް ފޮނުވާފައިވާ ކަމަށެވެ.

ކުޑަކުދިންނާ ގުޅޭ މައްސަލަތަކަކީ ސީރިއަސް މައްސަލަތަކެއްގެ ގޮތުގައި ބަލާ ކަމަށް ފުލުހުން އަންނަނީ ބުނަމުންނެވެ.

ސިއްހީ ސަބަބުތަކަށް ޓަކައި ކަމަށް ބުނެ ކުޑަކުއްޖަކާ ޖިންސީ އަމަލު ހިންގި ފިރިހެނަކު ވެސް ޖަލު ބަންދުން ގޭ ބަންދަށް މި ސަރުކާރުން ބަދަލު ކުރި މައްސަލަ އެއް ވެސް ދާދި ފަހުން ވަނީ ފެންމަތިވެފައެވެ.