ސަލްޒްބާގުން ލިވަޕޫލް ބަލިކޮށްފި

އައު ސީޒަނަށް ތައްޔާރުވުމުގެ ގޮތުން ސަލްޒްބާގާ ދެކޮޅަށް ކުޅުނު އެކުވެރިކަމުގެ މެޗުން ލިވަޕޫލް ބަލިވެއްޖެއެވެ.

މިއީ އައު ސީޒަނަށް ތައްޔާރުވުމަށް ލިވަޕޫލުން ކުޅުނު ހަތަރު ވަނަ މެޗެވެ. ފުރަތަމަ މެޗުގައި މެންޗެސްޓަރ ޔުނައިޓެޑު އަތުން އެ ޓީމު ވަނީ 4-0 ން ބަލިވެފައެވެ. ދެ ވަނަ މެޗުގައި ކްރިސްޓަލް ޕެލޭސް އަތުން މޮޅުވީ 2-0 ންނެވެ. ތިން ވަނަ މެޗުގައި ލެއިޕްޒިގް އަތުން މޮޅުވީ 5-0 ގެ ބޮޑު ތަފާތަކުންނެވެ. އަދި ހަތަރު ވަނަ މެޗުގައި ބުދަ ދުވަހުގެ ރޭ ސަލްޒްބާގް އަތުން ބަލިވީ 1-0 ންނެވެ.

މެޗަށް ލިވަޕޫލް ނިކުމެފައިވަނީ ބޮޑެތި ބަދަލުތަކަކާއެކުއެވެ. އެގޮތުން އެ ޓީމުގެ މުޙައްމަދު ޞަލާހު، ފަބީނިއޯ، ވެން ޑައިކް، ރޮބާޓޯ ފިރްމީނޯ، ޖޯޑަން ހެންޑަސަން ފަދަ މުހިންމު ކުޅުންތެރިން ފުރަތަމަ 11 ގައި ހިމަނާފައެެއް ނުވެއެވެ. އޭގެ ބަދަލުގައި ކޯޗު ޔާގަން ކްލޮޕް ވަނީ ޒުވާން ކުޅުންތެރިން ހިމެނޭ ޓީމެއް މެޗަށް ނެރިފައެވެ. މެޗުގެ ދެ ވަނަ ހާފުގައި ލިވަޕޫލުން ބަދަލުތަކެއް ގެނައިއިރު، މުހިންމު ކުޅުންތެރިން ކުޅެން ނިކުތެވެ. މެޗުގެ ހަމައެކަނި ލަނޑު 31 ވަނަ މިނެޓުގައި ޖެހީ ސަލްޒްބާގްގެ ބެންޖަމިން ސެސްކޯއެވެ.

މެޗަށްފަހު ލިވަޕޫން ކޯޗު ކްލޮޕް ބުނީ، ފުރަތަމަ ހާފުގައި ލިވަޕޫލަށް ގޯސްތަކެއް ހެދުނު ކަމަށެވެ. ނަމަވެސް މެޗުގައި ރަނގަޅު ކަންކަން ވެސް ފެނުނު ކަމަށާއި، ލިބުނު ފުރުސަތު ތަކުގެ ބޭނުން ހިފުނު ނަމަ، ހަތަރެއް ނުވަތަ ފަސް ވަރަކަށް ލަނޑު ޖެހުނީސް ކަމަށެވެ. މީގެ އިތުރުން ކްލޮޕް ބުނީ ޓީމުގައި ހިމެނޭ ޒުވާން ކުޅުންތެރިންނަށް ރަނގަޅު ތަޖުރިބާއެއް ވެސް ލިބޭނެ ކަމަށާއި، ކުރިއަށް އޮތް ތަނުގައި ނިކުންނާނީ ގޯސްކޮށް ދިޔަ ކަންކަން ރަނގަޅުކޮށްގެންކަމަށެވެ.

ދެން ލިވަޕޫލަށް މެޗެއް އޮންނާނީ މި މަހުގެ 30 ވަނަ ދުވަހުއެވެ. އެފްއޭ ކޮމިއުނިޓީ ޝީލްޑުގެ ފައިނަލްގައި ލިވަޕޫލް ނިކުންނާނީ ވާދަވެރި މެންޗެސްޓަރ ސިޓީއާ ދެކޮޅަށެވެ.