ރާއްޖެއިން ބޭރުގައި ވިޔަފާރި ކުރެވޭ ކާޑުގެ ލިމިޓު މަތިވާނެ ކަމަށް ރައީސް މުޢިއްޒު ވިދާޅުވެއްޖެ
ނޮވެންބަރު 11 އިން ފެށިގެން ޑެބިޓް ކާޑުތަކުން ރާއްޖެއިން ބޭރުގައި މުއާމަލާތް ކުރެވޭ އަދަދު 1000 ޑޮލަރަށް އިތުރުކުރެވޭނެ
ރައީސް މުޢިއްޒު މ މުލަކު ރައްޔިތުންނާއި ބައްދަލުކުރެއްވުން
ބޭންކް އޮފް މޯލްޑިވްސްގެ ޑެބިޓް ކާޑުތަކުން ރާއްޖެއިން ބޭރުން ފައިސާ ދެއްކޭ އަދަދު އިތުރުކުރުމަށް ސަރުކާރުން ނިންމައިފިއެވެ.
މިގޮތުން އަންނަ ނޮވެންބަރު 11ން ފެށިގެން ޑެބިޓް ކާޑުތަކުން ރާއްޖެއިން ބޭރުގައި މުއާމަލާތް ކުރެވޭ އަދަދު 1،000 ޑޮލަރަށް އިތުރުކުރެވޭނެ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ރޭ ވަނީ އިއުލާން ކުރައްވާފަ އެވެ.
މުލަކަތޮޅު މުލީ ރައްޔިތުންނާއި ބައްދަލުކުރައްވާ ވާހަކަފުޅު ދައްކަވަމުން ރައީސް ވިދާޅުވީ، ބީއެމްއެލްގެ އަހަރީ ދުވަސްކަމަށްވާ ނޮވެންބަރު 11 އިން ފެށިގެން މި ބަދަލުތައް ތަންފީޒުކުރެވޭނެ ކަމަށެވެ. އޭގެ ތެރޭގައި އެއަރލައިން ޓިކެޓް ގަތުމަށާއި ރާއްޖެއިން ބޭރުގެ ހޮޓާތަކަށް ފައިސާ ދެއްކޭ އަދަދު 3،000 ޑޮލަރަށް އިތުރުކުރުން ހިމެނެއެވެ.
މީގެއިތުރުން، ބޭސްފަރުވާއަށް ރާއްޖެއިން ބޭރަށް ދާ ފަރާތްތަކަށް ޚާއްސަ ލުއިފަސޭހަތަކެއް ގެނެވޭނެ ކަމަށް ރައީސް ވިދާޅުވިއެވެ. އެގޮތުން ބޭންކުގައި އެދުމުން ހޮސްޕިޓަލްތަކަށް ސީދާ ޑެބިޓް ކާޑު މެދުވެރިކޮށް ފައިސާ ދެއްކޭނެ އިންތިޒާމު ހަމަޖެހިގެންދާނެއެވެ.
ނޮވެމްބަރު 11 އިން ފެށިގެން ބީއެމްއެލްގެ ޑެބިޓް ކާޑުތަކުން ރާއްޖޭން ބޭރުގައި ޕީއޯއެސް ޓަރމިނަލްތަކުން ފައިސާދެއްކޭ އަދަދު 1000 ޑޮލަރަށް އިތުރުވެގެންދާނެ. ހަމަ އެ ތާރީޚުން ފެށިގެން އެއަރލައިންތަކުން ޓިކެޓު ގަތުމަށާއި ރާއްޖޭން ބޭރުގައި ހޮޓަލަށް ޑެބިޓް ކާޑުން ފައިސާ ދެއްކޭ އަދަދު 3000 ޑޮލަރަށް އިތުރުވެގެންދާނެ. ހަމަ އެ ތާރީޚުން ފެށިގެން ބޭސްފަރުވާއަށް ހޮސްޕިޓަލަށް ދައްކަން ޖެހޭ ފައިސާ ބޭންކުގައި އެދުމުން ހޮސްޕިޓަލަށް ފައިސާ ދެއްކޭނެ ގޮތްވެސް ހަމަޖެހިގެންދާނެ.ރައީސް ޑރ. މުޙައްމަދު މުޢިއްޒު
ޑޮލަރުގެ ޚިދުމަތް ފުޅާކުރުމުގެ ގޮތުން، ރާއްޖޭގެ 40 ރަށެއްގައި ބީއެމްއެލްގެ ޑޮލަރު އޭޓީއެމް ބެހެއްޓުމަށްވެސް ވަނީ ނިންމާފައެވެ. މި މަޝްރޫޢުގެ ދަށުން ހަތް އަރބަން ސެންޓަރާއި، ސިޓީތަކާއި، ލޯކަލް ޓޫރިޒަމް ކުރިއަރާފައިވާ ރަށްތަކުގައި އޭޓީއެމްތައް ބަހައްޓާނެ ކަމަށް ރައީސް ވިދާޅުވި އެވެ. ރައީސް ވިދާޅުވީ މި މަސައްކަތް އަންނަ އަހަރުގެ ފުރަތަމަ ކުއާޓަރގައި ނިންމުމަށް ރޭވިފައިވާ ކަމަށެވެ.
އިތުރު ކުރިއެރުމެއްގެ ގޮތުގައި، ބީއެމްއެލްގައި ޗައިނާގެ ފައިސާ ޔޫއާންގެ އެކައުންޓް ހުޅުވުމުގެ ޚިދުމަތް މިހާރު ފެށިފައިވާ ކަމަށާއި އަދި 2024 ވަނަ އަހަރުގެ ޖެނުއަރީ 1ން ފެށިގެން، 180 އަށްވުރެ ގިނަ ޤައުމުގައި ބޭނުންކުރެވޭ ޔޫނިއަން ޕޭގެ ޑެބިޓް އަދި ކްރެޑިޓް ކާޑުތައް ތަޢާރަފުކުރެވޭނެ ކަމަށްވެސް ރައީސް ވިދާޅުވި އެވެ.
ފާހަގަކޮށްލެވޭ ގޮތުގައި ދިވެހިންގެ ތެރޭގައި ވިޔަފާރިކުރަން މަގުބޫލު ބައެއް ސައިޓުތަކަށް ފައިސާ ދައްކާ ކޮންމެ ފަހަރަކު 30 ޕަސެންޓުގެ ފީއެއް މިހާރު ނަގައެވެ. މި ނިންމުމާއެކު އާމުންގެ ފާޑުކިއުން ސަރުކާރަށް ވަރަށް ބޮޑަށް ވަނީ އަމާޒުވެފަ އެވެ.
ރައީސް ވިދާޅުވީ، މި އިސްލާހުތަކުގެ ސަބަބުން ބާޒާރުގައި ޑޮލަރު އަގުބޮޑުކޮށް ގަންނަން ޖެހުމުގެ މައްސަލައަށް ހައްލު ލިބި، ރާއްޖޭގެ އިޤްތިޞާދަށް އޭގެ ހެޔޮ އަސަރު ކުރާނެ ކަމަށެވެ.
