"ރައީސް ޞާލިހު އާއި ފައްޔާޒްގެ މައްޗަށް ޖިނާއީ ތަހުގީގެއް ހިންގަން ނިންމީ ޤާނޫނުއަސާސީގެ ދިފާއުގައި ބޭއްވި އެއްވުމާއި ގުޅިގެން ޖަޒުބާތުގައި ޖެހިގެން"
ބުދަ ދުވަހު ކުރިއަށް ގެންދިޔަ މާލިއްޔަތު ކޮމިޓީގައި ސަރުކާރުގެ މެންބަރުން ވަނީ ކުރީ ސަރުކާރުން ދައުލަތަށް ލިބެން އޮތް ފައިދާއަކަށް އުނިކަން ލިބޭ ފަދަ ގޮތަކަށް އަމަލުކޮށްފައިވާ ކަމަށް ތުހުމަތުކޮށްފަ
ކެންދޫ ދާއިރާގެ މެންބަރު މައުރޫފް ޒާކިރު
ކުރީގެ ރައީސް އިބްރާހިމް މުހައްމަދު ސާލިހުގެ ސަރުކާރުގައި އުފެއްދެވި ސެޓްލްމަންޓް ކޮމިޓީން އެކި ފަރާތްތަކަށް ބަދަލު ދިން މައްސަލައިގެ ޖިނާއީ ތަހުގީގެއް ހިންގަން ނިންމީ ޤާނޫނުއަސާސީގެ ދިފާއުގައި ބޭއްވި އެއްވުމާއި ގުޅިގެން ޖަޒުބާތުގައި ޖެހިގެން ކެންދޫ ދާއިރާގެ މެމްބަރު މައުރޫފް ޒާކިރު ވިދާޅުވެއްޖެއެވެ.
އެމްޑީޕީ ގެ ޕާލިމެންޓަރީ ގްރޫޕުން ބުރާސްފަތި ދުވަހު ބޭއްވި ނޫސްވެރިންގެ ބައްދަލުވުމުގައި މައުރޫފް ވިދާޅުވީ ރައްޔިތުންގެ ކަންބޮޑުވުން ހިމެނޭ މުހިންމު ކަންތައްތައް ސަމާލުކަމަށް ގެނައުމަށް ކުއްލި މައްސަލަތައް ހުށަހަޅާފައިވާނެ ކަމަށެވެ. އޭގެ ތެރެއިން ގިނަ މައްސަލަތައް ސަރުކާރުގެ މެމްބަރުން ވަނީ ބޭރުކޮށްލާފައި ކަމަށް ވީ ނަމަވެސް އެމްޑީޕީގެ ޕީޖީ ގްރޫޕްގެ މަސައްކަތްތައް ކުރިއަށް ގެންގޮސްފައިވާނެ ކަމަށް މައުރޫފް ވިދާޅުވިއެވެ. އެގޮތުން ފްލެޓާއި، މަސްވެރިންގެ މައްސަލަތަކާއި، ޑޮލަރާއި ގުޅޭ އުސޫލުތަކާއި، ބެޖެޓާއި، ސަބްސިޑީގެ އުސޫލްތަކާއި ގުޅޭގޮތުން ހުރި ކަންބޮޑުވުންތައް ސަމާލުކަމަށް ގެނެސްފައިވާނެ ކަމަށް އޭނާ ވިދާޅުވިއެވެ. މީގެ އިތުރުން ޤާނޫނުއަސާސީ އަށް ގެނައި ނުރަނގަޅު ބަދަލާއި ގުޅިގެން އަޑުއުފުލުމަށް މަސައްކަތްކޮށްފައިވާ ކަމަށް އޭނާ ވިދާޅުވިއެވެ. ޤާނޫނުއަސާސީގެ ދިފާއުގައި ބޭއްވި އެ އެއްވުމަކީ ވެސް ރައްޔިތުންގެ ގިނަ ކަންބޮޑުވުންތަކާއި ގުޅިގެން ބޭއްވި އެއްވުމެއް ކަމަށް އޭނާ ވަނީ ވިދާޅުވެފައެވެ.
ބުދަ ދުވަހު ކުރިއަށް ގެންދިޔަ މާލިއްޔަތު ކޮމިޓީގައި ސަރުކާރުގެ މެންބަރުން ވަނީ ކުރީ ސަރުކާރުން ދައުލަތަށް ލިބެން އޮތް ފައިދާއަކަށް އުނިކަން ލިބޭ ފަދަ ގޮތަކަށް އަމަލުކޮށްފައިވާ ކަމަށް ތުހުމަތުކޮށްފައެވެ.
އެގޮތުން ކުރީގެ ރައީސް ސާލިހުގެ އިތުރުން، ކުރީގެ އިކޮނޮމިކް މިނިސްޓަރު، އެމްޑީޕީގެ ޗެއަރޕާސަން ފައްޔާޒު އިސްމާއީލް އަދި ރައީސް އޮފީހުގެ ކުރީގެ މިނިސްޓަރު އަލީ ޝިޔާމް، މައްޗަށް ޖިނާއީ ތަހުގީގެއް ހިންގުމަށް ޕްރޮސެކިއުޓަރ ޖެނެރަލްއަށް އެންގުމަށް ވަނީ ފާސްކޮށްފައެވެ.
މީގެ އިތުރުން ބުރާސްފަތި ވިލޭރޭ ހުޅުމާލޭ ހައިވޭ ސަރަހައްދުގައި ކުރިއަށް ދިޔަ ޓެކްސީ ޑްރައިވަރުންގެ އިހުތިޖާޖުގައި ބައިވެރިވި ޓެކްސީތައް ފުލުހުންގެ ބެލުމުގެ ދަށަށް ގެންގޮސްފައިވާތީ އެކަމާއި މެދު އޭނާ ވަނީ ކަންބޮޑުވުން ފާޅުކުރައްވާފައެވެ.
ބުދަ ދުވަހު ހަވީރުން ފެށިގެން ޓެކްސީ ޑްރައިވަރުން އިހުތިޖާޖަށް ނުކުންނަން މަޖުބޫރުވީ އެމީހުންގެ ކަންބޮޑުވުންތައް ސަރުކާރުން އަޑު ނާހައިގެން ކަމަށް މައުރޫފް ވަނީ ވިދާޅުވެފައެވެ.
އިހުތިޖާޖުގައި ބައިވެރިވި ޓެކްސީތައް ފުލުހުންގެ ބެލުމުގެ ދަށަށް ގެންގޮސްފައިވާއިރު، ޓެކްސީތައް ގެންދާ ސަބަބު ސާފު ކުރަން ޑްރައިވަރުން އެދުމުން، ފުލުހުން ބުނީ އިދާރާ އަށް ޙާޟިރުވެ އެކަން ސާފު ކުރުމަށެވެ.
ފުލުހުން ޓެކްސީތައް ޓޯ ކުރަން ފެށީ އެއްވެސް އިންޒާރެއް ދިނުމެއް ނެތިއެވެ.
ފުލުހުން ވަނީ 22 ޓެކްސީ ޓޯ ކޮށްގެން ގެންގޮސްފައެވެ.
