އައްބާސްގެ ތުހުމަތު ފުލުހުންނަށް: މަސްތުވާތަކެތީގެ ވިޔަފާރި ކުރަނީ ފުލުހުންނާ ގުޅިގެން، ސީދާ ރަށްރަށުގެ ޕޮލިސްޓޭޝަންތަކުގައި އުޅޭ ފުލުހުންވެސް މަސްތުވާތަކެތި ބޭނުންކުރޭ
ޕޮލިސްޓޭޝަންތަކުގައި އުޅޭ ފުލުހުންވެސް މަސްތުވާތަކެތި ބޭނުންކުރޭ
ވެލިދޫ ދާއިރާގެ ސަރުކާރުގެ މެންބަރު މުހައްމަދު އައްބާސް
ރަށްރަށުގެ ޕޮލިސްޓޭޝަންތަކުގައި އުޅޭ ފުލުހުން ވެސް މަސްތުވާތަކެތި ބޭނުންކުރާ ކަމަށާއި، އެ ވިޔަފާރި ޒުވާނުން ކުރަނީ ފުލުހުންނާ ގުޅިގެން ކަމަށް ވެލިދޫ ދާއިރާގެ މެމްބަރު މުޙައްމަދު އައްބާސް ތުހުމަތު ކުރައްވައިފިއެވެ.
ސަރުކާރުގެ ފަރާތުން ގަމު ދާއިރާގެ މެމްބަރު ޔޫސުފް ނަޝީދު ހުށަހަޅުއްވާފައިވާ، "މަސްތުވާތަކެއްޗާ ބެހޭ ޤާނޫނަށް" އިސްލާހު ގެނައުމުގެ ބިލުގެ ބަހުސްގައި، ހޯމަ ދުވަހު މަޖިލީހުގައި ވާހަކަފުޅު ދައްކަވަމުން އައްބާސް ވިދާޅުވީ، ރަށްރަށުގައި ތިބޭ ދެތިން ވިޔަފާރިވެރިއެއްގެ އަތްމައްޗަށް ޒުވާނުން ދުއްވާލައިގެން، އެ ޒުވާނުންނަކީ އެމީހުން ކޮންޓްރޯލް ކުރާ ބަޔަކަށް ހަދާފައިވާ ކަމަށެވެ.
އެގޮތުން ރަށްރަށުގެ ޕޮލިސްޓޭޝަންތަކުގައި އުޅޭ ފުލުހުންވެސް މަސްތުވާތަކެތި ބޭނުންކުރައްވާ ކަމަށާއި، އެކަމުގެ ވިޔަފާރި ކުރަނީ ވެސް ފުލުހުންނާ ގުޅިގެން ކަމަށެވެ. އެހެންކަމުން މިކަމަށް ކޮމިޝަނަރ އޮފް ޕޮލިސް އާއި ހޯމް މިނިސްޓަރު ސަމާލުވާން ޖެހޭ ކަމަށެވެ.
"މަސްތުވާތަކެތި ރަށްރަށުގައި ތިބޭ ދެ ތިން ވިޔަފާރިވެރިއެއްގެ އަތް މައްޗަށް. މަސްތުވާތަކެތީގެ ވިޔަފާރި ކުރާ ދެ މީހަކު ނުވަތަ ތިން މީހެއްގެ މައްޗަށް މުޅި ރަށުގެ ޒުވާނުން ދުއްވާލައިގެން، އެމީހުންނަކީ ހުރިހާ ޒުވާނުން ކޮންޓްރޯލްކުރާ ދާދާ އިންނަށްވެގެން އުޅޭ މަންޒަރު ފެނިގެންދަނީ. ހަމަ ސީދާ ރަށްރަށުގެ ޕޮލިސްޓޭޝަންތަކުގައި އުޅޭ ޕޮލިހުންވެސް މަސްތުވާތަކެތި ބޭނުންކުރައްވާ. އެބޭފުޅުންނާ ގުޅިގެން މި ވިޔަފާރިކުރަނީ ވެސް. އެމީހުންނާ ގުޅިގެން މި އެއްޗެހި ބޭނުން ކުރަނީ ވެސް. މިކަމަށް ޕޮލިސް ކޮމިޝަނަރ، ހޯމް މިނިސްޓަރު އެބަޖެހޭ ސަމާލުވާން" އައްބާސް ވިދާޅުވިއެވެ.
މީގެ އިތުރުން އައްބާސް ވިދާޅުވީ، މަސްތުވާތަކެތީގެ މައްސަލަ ހުއްޓުވަން، ރާއްޖޭގެ ކޯޓުތަކުގައި ތިއްބަވާ ފަނޑިޔާރުންނާ، ބައެއް ގާނޫނީ ވަކީލުންނާ މޯލްޑިވްސް ޕޮލިސް ސަރވިސަސް އިން ވެސް މަސައްކަތް ނުކުރައްވާ ކަމަށެވެ.
"ކިތައްމެ ރަނގަޅު ގާނޫނެއް ހަދާފައި މަޖިލީހުން ފާސްކޮށް ރައީސް ތަސްދީގު ކުރެއްވިކަމަށް ވިއަސް ތަންފީޒީ ބާރުތަކުން ގާނޫނަށް އަމަލު ނުކުރާހާ ހިނދަކު ދާއިމީ ހައްލެއް ނާންނާނެ. މުއައްސަސާތަކުގައި ތިއްބެވި ބޭފުޅުން އިޚުލާސްތެރިވާންވީ. ގާނޫނު ތަންފްޒީ ކުރުމުގައި މޫނެއް ކަނދުރާއެއް ނުބަލާ މިކަން ކުރައްވަންވީ. އެހެން ނޫނީ މި މައްސަލަތަކަށް ދާއިމީ ހައްލެއް ނާންނާނެ" އައްބާސް ވިދާޅުވިއެވެ.
އައްބާސް ވިދާޅުވި ގޮތުގައި، ސައްތައިން ސައްތަ މުސްލިމު ގައުމެއްގޮތުގައި އޮވެ އެންމެ ގިނަ ޒުވާނުން މަސްތުވާތަކެތި ބޭނުންކުރާ ގައުމަށް ރާއްޖެ ވަނީ ވެފައެވެ.
"މިއަދު ގައުމެއްގެ އާބާދީއެއްގެ ނިސްބަތުން ސައްތައިން ސައްތަ މުސްލިމް ގައުމެއްގެ ގޮތުގައި އޮވެމެ އެންމެ ގިނަ ޒުވާނުން މަސްތުވާތަކެތި ބޭނުންކުރާ ގައުމަށް ރާއްޖެ ވެގެން މިދިއައީ" އައްބާސް ވިދާޅުވިއެވެ.
އޭނާ ވިދާޅުވީ، މިއީ މުޅި ރާއްޖޭގެ އިގްތިސާދަށް ހުރި ބޮޑު ގެއްލުމެއް ކަމަށާއި، އޮތް ބޮޑު ނުރައްކަލެއް ކަމަށެވެ.
