އައްބާސް ވަނީ ވެރިކަން ހޯދަން އެމްޑީއޭގެ އެހީތެރިކަން ހޯދުމަށް ފަހު މިހާރު ސަރުކާރުން އަމަލުކުރަނީ ރަނގަޅަށް ނޫންކަމަށް ވެސް ވިދާޅުވެފަ
އެމްޑީއޭގެ ލީޑަރ ސިޔާމް، މެމްބަރު އައްބާސް އަދި ރައީސް މުއިއްޒު
މޯލްޑިވްސް ޑިޕޮލޮޕްމެންޓް އެލަޔަންސް (އެމްޑީއޭ) އާ އެކު ރައީސް ޑރ.މުހައްމަދު ސަރުކާރުން ހަދާފައިވާ ކޯލިޝަން އެގްރިމަންޓަކީ ނެތް އެއްޗެއް ކަމަށް ބުނާ ނަމަ އެ އެގްރީމެންޓް ލީކުކުރާނެ ކަމަށް އެމްޑީއޭ އަށް ނިސްބަތްވެ ވަޑައިގަންނަވާ ވެލިދޫ ދާއިރާ މެންބަރު މުހައްމަދު އައްބާސް ވިދާޅުވެއްޖެއެވެ.
ރާއްޖެޓީވީ އަށް މައުލޫމާތުދެއްވަމުން އައްބާސް ވިދާޅުވީ ރައްޔިތުންގެ މަޖިލީހުގެ މީދޫ ދާއިރާގެ މެންބަރު އަދި ވިޔަފާރިވެރިިޔާ އަހުމަދު ސިޔާމް (ސަން ސިޔާމް)ގެ ޕާޓީ ކަމަށްވާ އެމްޑީއޭ އާއި އެކު އެ އެއްބަސްވުން އެކުލަވާލީ 2023 ވަނަ އަހަރު ރިޔާސީ އިންތިޚާބުގެ ދުވަސްވަރު ކަމަށެވެ.
އައްބާސް ވަނީ 2023ގެ ރިޔާސީ އިންތިޚާބުގެ ކުރިން އެމްޑީއޭ އާއި އެކު އެއްބަސްވުމެއް އެކުލަވާލާފައިވާ އެއްބަސްވުމުގައި ސަރުކާރުގެ 15% އެމްޑީއޭ އަށް ދޭން އެއްބަސްވެފައިވާ ކަމަށާއި އެ އެއްބަސްވުމުގައި ސޮއިކުރެއްވީ ރައީސް ޑރ.މުހައްމަދު މުއިއްޒު ކަމަށް ވިދާޅުވެފައެވެ.
ހަމައެހެންމެ އެގްރީމެންޓްގައި ބުނާގޮތުން އެމްޑީއޭ އަށް 15% ލިބެން ޖެހޭ ކަމަށް ވީނަމަވެސް އެމްޑީއޭ އަށް ހައްގު މިންވަރު ނުލިބޭ ކަމަށް އޭނާ ވިދާޅުވިއެވެ. އަދި ސަރުކާރުގައި ތިބި އެމްޑީއޭގެ މީހުންނަށް ބިރު ދައްކަމުންދާ ކަމަށް އޭނާ ތުހުމަތުކުރެއްވިއެވެ. އެގޮތުން ސަރުކާރުގެ ތެރޭގައި އެމްޑީއޭއަށް ނިސްބަތްވާ 25 ވަރަކަށް ޕޮލިޓިކަލް އެޕޮއިންޓީސް ތިބި ނަމަވެސް އެމްޑީއޭގެ ސިޔާސީ ހަރަކާތްތަކުގައި އުޅުމުގެ އިޒުނައެއް ނެތް ކަމަށް އޭނާ ވިދާޅުވިއެވެ. އެގްރީމެންޓެއް ނޯންނާނެ ކަމަށް ސަރުކާރުން ބުނާ ނަމަ ރައީސް މުއިއްޒު ސޮއިކުރައްވާފައިވާ އެއްބަސްވުން އާއްމުންނާއި ހިއްސާކުރާނެ ކަަމަށް އައްބާސް ވަނީ ވިދާޅުވެފައެވެ.
މިހާރުވެސް އިތުރު ފުރުސަތެއް ސަރުކާރަށް ދެނީ އެއްބަސްވީ ގޮތަށް އެމްޑީއޭ އާއި މެދު އަމަލުކުރުމަށް ކަމަށް އޭނާ ވަނީ ވިދާޅުވެފައެވެ.
އައްބާސް މިއަދު ”އެކްސް“ ގައި ކުރި ޕޯސްޓެއްގައި ވަނީ އެމްޑީއޭއާ އެކު އެކުލަވާލާފައިވާ އެއްބަސްވުމަށް އަމަލުކުރުމަށް ގޮވާލައްވާފައެވެ.
އައްބާސް ވަނީ ވެރިކަން ހޯދަން އެމްޑީއޭގެ އެހީތެރިކަން ހޯދުމަށް ފަހު މިހާރު ސަރުކާރުން އަމަލުކުރަނީ ރަނގަޅަށް ނޫންކަމަށް ވެސް ވިދާޅުވެފައެވެ.
