އަންނަ އަހަރު މާފަންނު މަދަރުސާގެ ތިރީގައި އިތުރު ހޯލެއް ބިނާކޮށްދެއްވާނެ ކަމަށް ރައީސް ވިދާޅުވެއްޖެ
ރައީސް ވިދާޅުވީ ހޯލް ބިނާކުރުމުގެ އިތުރުން، ދެންވެސް ކުރެވެން ހުރި ކަންކަމުގައި ސީދާ ސަރުކާރުގެ އެހީތެރިކަން ދެއްވާނެ ކަަމަށް
ރައީސުލްޖުމްހޫރިއްޔާ، މާފަންނު މަދަރުސާގެ 40 ވަނަ އަހަރީ ދުވަސް ފާހަގަކުރުމުގެ ރަސްމިއްޔާތުގައި ރައީސް ޑރ މުއިއްޒު
އަންނަ އަހަރު މާފަންނު މަދަރުސާގެ ތިރީގައި އިތުރު ހޯލެއް ބިނާކޮށްދެއްވާނެ ކަމަށް ރައީސުލްޖުމްހޫރިއްޔާ ޑރ މުޙައްމަދު މުއިއްޒު ވައުދުވެވަޑައިގެންފިއެވެ.
މާފަންނު މަދަރުސާގެ 40 ވަނަ އަހަރީ ދުވަހުގެ ހަފްލާގައި، ހޮނިހިރު ދުވަހު ބައިވެރިވެވަޑައިގެން އެމަނިކުފާނު ވިދާޅުވީ، ތުއްތު ދަރިވަރުންވެސް އެދިލެއްވި ގޮތަށް މާމައިންނާ ކާފައިންނަށް ފަސޭހައިން ވަދެވޭގޮތަށް ތިރީގައި ހޯލެއް ހައްދަވާދެއްވާނެ ކަމުގެ ޔަގީން ކަން ދެއްވާ ކަމަށެވެ.
ރައީސް ވިދާޅުވީ، މޭލޭގައި މޭޔަރަކަށް ހުންނެވި އިރުވެސް، މާފަންނު މަދަރުސާއަށް ކޮންމެވެސް ވަރަކަށް ޚިދުމަތް ކުރުމަށް ފުރުސަތު ލިބިވަޑައިގެންނެވި ކަމަށާއި، އެހެންކަމުން އެ ސްކޫލުގެ ކަންތައްތައް ހުރި ގޮތް އެނގިވަޑައިގަންނަވާ ކަމަށެވެ.
އެމަނިކުފާނު ވަނީ މާފަންނު މަދަރުސާގެ ކުރިއެރުމަށްޓަކައި ސަރުކާރަށް ކޮށްދެވޭނެ އަދި ކޮށްދެވެން ހުރި ހުރިހާ ކަމެއް ކޮށްދެއްވާނެ ކަމުގެ ޔަގީންކަން ދެއްވާފައެވެ.
ރައީސް މުއިއްޒު އިތުރަށް ވިދާޅުވީ، ސްކޫލުން ބޭނުންވާ އިތުރު ކަންކަމުގައި ވެސް ސްކޫލުގެ ފަރާތުން އެޑިއުކޭޝަން މިނިސްޓްރީގައި އެދިލައްވައިފި ނަމަ ކުރިއަށް އޮތްތަނުގައި ވެސް އެކަންކަން ކޮށްދެއްވާނެ ކަމަށެވެ. އަދި ކައުންސިލްގެ ކިބައިންވެސް އެދިވަޑައިގަންނަވަނީ ސަރުކާރާ ގުޅިގެން ސްކޫލުން އެދޭ ކަންކަމުގައި މަސައްކަތް ކުރަމުން ގެންދިއުމަށް ކަމަށެވެ.
ރައީސް ވިދާޅުވީ ހޯލް ބިނާކުރުމުގެ އިތުރުން، ދެންވެސް ކުރެވެން ހުރި ކަންކަމުގައި ސީދާ ސަރުކާރުގެ ފަރާތުން އެޑިއުކޭޝަން މިނިސްޓްރީން އަދި ކައުންސިލް މެދުވެރިކޮށް އެހީތެރިކަން ދިނުމާއެކީގައި މިދިއަ ދުވަސްތަކަށްވުރެ މާ ބޮޑަށް ވެސް އުފާވެރި ގޮތަކަށް ސްކޫލްގެ ކަންކަން ބައްޓަންވެގެން ދާނެ ކަމަށެވެ. ސަރުކާރުން ވެސް އެއްބާރުލެއްވުން ދެއްވާނެ ކަމަށެވެ.
"ކޮމިއުނިޓީ ސްކޫލްތަކަކީ ވަރަށް މުހިއްމުތަންތަން. ކޮމިއުނިޓީ ކޮންސެޕްޓްގައި ސްކޫލްތައް ހިންގުމަށްޓަކައި ލާމަރުކަޒީ ނިޒާމުގެ ތެރެއިން ކައުންސިލާ ހަވާލުކުރެވިފައިވަނީ. އެހެންކަމުން ސަރުކާރުން ފުރިހަމަ އެއްބާރުލުންދީ، ސަރުކާރުން މި ސްކޫލް ކޮންސެޕްޓްގައި ހިންގުމުގައި ކުރިއަށް އޮތްތަނުގައި ދެވޭނެ ފުރިހަމަ އެއްބާރުލުން ދީގެން މިއަހަރަށްވުރެ ރަނގަޅަށް ކަންތައްތައް ގެންދިއުމަކީ މާލޭގައި ދެން ހުރި މިފަދަ ސްކޫލްތައް ވެސް ޝާމިލްވާނެހެން އަޅުގަނޑުމެން ކަންކަން ކުރާނެ ގޮތް" ރައީސް މުއިއްޒު ވިދާޅުވިއެވެ.
މާފަންނު މަދަރުސާގެ 40 ވަނަ އަހަރީ ދުވަހުގެ ހަފްލާގައި ސްޓޭޖްމަތީގައި ހަފްލާ ތަޢާރަފް ކޮށްދިން ތުއްތު ދެ ކުދިންގެ ތެރެއިން އެއް ކުއްޖަކު ވަނީ ހޯލެއް ނެތުމުން ވާ ދަތިކަމުގެ ވާހަކަ ފާހަގަކޮށްފައެވެ. އެ ގޮތުން އެ ތުއްތު ކުއްޖާ ބުނީ، އެ މަދަރުސާގެ އަހަރީ ދުވަސް ފާހަގަ ނުކުރެވި ލަސްވީ ހަފްލާ ބާއްވާނެ ތަނެއް ނެތިގެން ކަމަށެވެ. މާފަންނު މަދަރުސާގެ ހޯލް ހުންނަނީ 3 ވަނަ ފަންގިފިލާގައި ކަމުން މާމައިންނާ ކާފައިންނަން ހަފްލާތަކުގައި ބައިވެރި ނުވެވޭ ކަމަށެވެ. އެހެންކަމުން ރައީސް އަރިހުގައި އެދެނީ މަދަރުސާގެ ތިރީގައި ހޯލެއް ބިނާ ކޮށްދިނުމަށް ކަމަށެވެ.
މާފަންނު މަދަރުސާ ވުޖޫދުވީ 15 ފެބްރުއަރީ 1984 ގައެވެ. އެ ސްކޫލު ހުޅުއްވައިދެއްވީ ކުރީގެ ރައީސުލްޖުމްހޫރިއްޔާ މައުމޫން ޢަބްދުލްޤައްޔޫމެވެ. މިމަދަރުސާއަކީ މާފަންނު ރައްޔިތުންގެ އެންމެންގެ އެހީއާއި އެއްބާރުލުން ލިބިގެން ހުޅުވުނު މަދަރުސާއެެކެއެވެ.
