ރާއްޖޭގެ ޤާނޫނު އަސާސީ ހޯދީ އެމްޑީޕީންކަން އާއްމުންނަށް ވަރަށް ސާފުކޮށް އެނގެން އޮތްކަމަށް ފައްޔާޒް ވިދާޅުވި
އެމްޑީޕީގެ ޗެއަރޕާސަން ފައްޔާޒް އިސްމާއިލް
އުފެދިފަ އޮތް ފިތުނަ އާއި ޖަޒުބާތުތަކުގެ ތެރޭގަ ގޮސް ރަނގަޅަށް އިންސާފުވެރިކޮށް ހިނގަމުން ދިޔަ ޤައުމެއް ދޫކޮށްލެވުނީ މޮޔައެއްގެ އަތް މައްޗަށް ކަމަށް އެމްޑީޕީގެ ޗެއަރޕަރސަން ފައްޔާޒް އިސްމާއިލް ވިދާޅުވެއްޖެއެެވެ.
ފައްޔާޒް އެފަދައިން ވިދާޅުވީ "ޤާނޫނުއަސާސީގެ ދިފާއުގައި - ބޮޑު ސައްލާ" ނަމުގައި އެމްޑީޕީ ހަރުގޭގައި ކުރިއަށް ގެންދިޔަ ސައްލާގަ ބައިވެރިންނާއި މުޚާތަބުކޮށް ވާހަކަދައްކަވަމުންނެވެ.
މިއަދު ވެރިކަމުގައި ތިބީ ޤާނޫނުއަސާސީ ގެނިޔަ ނުދިނުމަށް މަސައްކަތްކޮށް ދިވެހި ރައްޔިތުންނާއި މެދު އަނިޔާވެރިކޮށް ޢަމަލުކުރި ބޭފުޅުން ކަމަށް ފައްޔާޒް ވިދާޅުވިއެވެ.
ޤާނޫނުއަސާސީ ދިފާއުކުރުމަށް އެމްޑީޕީން ނުކުންނަ ސަބަބާއި މެދު ބައެއް ބޭފުޅުން ސުވާލު އުފައްދާކަމަށް ފާހަގަކުރައްވާ ފައްޔާޒް ވިދާޅުވީ އެއީ ކުރެވޭ ސުވާލެއްކަމަށް ޤަބޫލު ނުކުރައްވާ ކަމަށެވެ. ރައްޔިތުން އެ ސުވާލު ނުކުރާނެ ކަމަށް ޤަބޫލުކުރައްވާ ސަބަބަކީ ރާއްޖޭގެ ޤާނޫނުއަސާސީ ހޯދީ އެމްޑީޕީންކަން އާއްމުންނަށް ވަރަށް ސާފުކޮށް އެނގެން އޮތުމުން ކަމަށް ފައްޔާޒް ވިދާޅުވިއެވެ. އެހެންކަމުން ޤާނޫނު އަސާސީ ދަމަހައްޓާ ހިފެހެއްޓުމަށް ކުރަން ޖެހުނު ކޮންމެ ކަމެއް އެމްޑީޕީން ކުރާނެކަން ދިވެހިންނަށް އެނގޭނެ ކަމަށް ފައްޔާޒް ވިދާޅުވިއެވެ.
ޤާނޫނުއަސާސީ ހޯދީ ކުޑަ މަސައްކަތަކުން ނޫން ކަމަށާއި އެއީ އެތައް އަހަރެއް ވަންދެން އެތައް ދިވެހިންތަކެއް ކުރި މަސައްކަތުގެ ނަތީޖާ ކަމަށް ފައްޔާޒް ވިދާޅުވިއެވެ. އެ ޤާނޫނުއަސާސީ ހާސިލްކުރެވުނީ އެތައް ބައެއްގެ ފުރާނަ ވެސް ގެއްލުނު ފަހުން ކަމަށް ފައްޔާޒް ވަނީ ފާހަގަކުރައްވާފައެވެ.
ރާއްޖޭގެ ސިޔާސަތުތައް ރައީސް ޑރ.މުހައްމަދު މުއިއްޒު ކަނޑައަޅުއްވަނީ ގޭތެރޭގައި ދެކެވޭ ވާހަކަތަކުގެ މައްޗަށް ކަމަށާއި އެއީ ރައީސަކަށް ހުންނަވާ ބޭފުޅަކަށް އޮތް ބާރެއް ނޫން ކަމަށް ފައްޔާޒް ވިދާޅުވިއެވެ. ރައްޔިތުންގެ ކަންކަން ނިންމަން ޖެހޭނީ ދިވެހިންނާއި މަޝްވަރާކޮށްގެން އުސޫލުތަކުގެ ތެރެއިން ކަމަށް ފައްޔާޒް ވިދާޅުވިއެވެ. އަދި މިހާރު ކަންކަން ދާގޮތަށް ދާ ނަމަ ރައީސަށް ޤަބޫލުކުރެވޭ ހާލަތުގައި ސިޔާސީ ޕާޓީތައް ވެސް މަޖިލީހުގެ މެޖޯރިޓީ ބޭނުންކޮށްގެން އުވާލެވިދާނެކަމަށާއި އެހެންނަމަވެސް އެއީ ޤާނޫނު އަސާސީން ޖާގަދޭ ކަމެއް ނޫން ކަމަށް ފައްޔާޒް ވިދާޅުވިއެވެ.
މީގެ އިތުރުން ހުރިހާ ސިނާއަތެއް ދަނީ ފުނޑެމުން ކަމަށާއި ފައިސާ ޗާޕްކޮށްގެން ވިޔަސް އެކަންކަން ހައްލުކޮށްދޭން ޖެހޭ ކަމަށް ފައްޔާޒް ވިދާޅުވިއެވެ. ހުރިހާ ދާއިރާއަކުން ވެސް 30 އަހަރު ފަހަތަށް ޤައުމު ސޮއްސާލާ ކަމަށް ފައްޔާޒް ވަނީ ވިދާޅުވެފައެވެ. ޤާނޫނުއަސާސީގެ ހައްގުތައް ނިގުޅައިގަންނަން ފެށުމުން ކެތްކޮށްގެން ނުތިބެވޭނެ ކަމަށް ފައްޔާޒް ވަނީ ވިދާޅުވެފައެވެ. މިއަދު އެކަމާއި ދެކޮޅަށް އަޑު ނުއުފުލައިފި ނަމަ އަނގައިންވެސް ނުބުނެވޭ ހިސާބަށް ކަންކަން ދާނެ ކަމަށް ފައްޔާޒް ވިދާޅުވިއެވެ. އެހެންކަމުން ތާއަބަދު އިހުތިޖާޖްކޮށް އަޑު އުފުލަންޖެހޭ ކަމަށާއި އެމްޑީޕީގެ މަސައްކަތަކީ އަޑު ނީވޭ ސަރުކާރަކަށް އަޑު އިއްވުން ކަމަށް ފައްޔާޒް ވަނީ ވިދާޅުވެފައެވެ.
