މި ސަރުކާރަށް އެންމެ ރަނގަޅުވާނީ ރައްޔިތުންގެ ހައްގުގައި އިސްތިއުފާދިނުން ކަމަށް ޤަބޫލުކުރެވޭ - ފައްޔާޒް
ސަރުކާރަށް އިތުބާރުކޮށްގެން އާއްމުން ވޯޓު ދިނުމުން ރައީސް މުއިއްޒުގެ ސަރުކާރުން އާއްމުން މާޔޫސްކޮށްލާފައިވާ ކަމަށް ފައްޔާޒް ވިދާޅުވި
މޯލްޑިވިއަން ޑިމޮކްރެޓިކް ޕާޓީގެ ޗެއަރޕަރސަން ފައްޔާޒް އިސްމާއިލް
މި ސަރުކާރަށް އެންމެ ރަނގަޅުވާނީ ރައްޔިތުންގެ ހައްގުގައި އިސްތިއުފާދިނުން ކަމަށް ޤަބޫލުކުރެވޭކަމަށް މޯލްޑިވިއަން ޑިމޮކްރެޓިކް ޕާޓީގެ ޗެއަރޕަރސަން ފައްޔާޒް އިސްމާއިލް ވިދާޅުވެއްޖެއެވެ.
ނިމިދިޔަ ސަރުކާރުގެ އިކޮނޮމިކް މިނިސްޓަރުކަން ވެސް އަދާކުރައްވާފައިވާ ފައްޔާޒް އެފަދައިން ވިދާޅުވި ރާއްޖެޓީވީގެ ފުދިއްޖެ ފުނޑިއްޖެ ކަވަރޭޖްގައި ވާހަކަދައްކަވަމުންނެވެ.
ފައްޔާޒް ވަނީ އާއްމުން ސަރުކާރާއި މެދު ނުރުހިފައިވާ މިންވަރު އާއްމުންގެ ވާހަކަތަކާއި ބަސްތަކުން މިހާރު ސާފުކޮށް އިނގޭ ކަމަށް ވިދާޅުވެފައެވެ. އާއްމުންގެ އެތައް ހައްގަކަށް ސަރުކާރުން އަރައިގަންނަ ކަމަށް ފާހަގަކުރައްވާ ފައްޔާޒް ވިދާޅުވީ މި ސަރުކާރު ބަދަލުވުމަކީ އުފާކުރައްވާނެ ކަމެއް ކަމަށެވެ. އެހެންނަމަވެސް އެމްޑީޕީން ސަރުކާރާއި ދެކޮޅަށް އަޑު އުފުލަކީ މަގުމަތިން ސަރުކާރު ބަދަލުކުރުމަށް ކުރާކަމެއް ނޫން ކަމަށާއި ސަރުކާރު ބަދަލުކުރަން ބޭނުންވެގެން އުޅެނީ އާއްމުން ކަމަށް ފައްޔާޒް ވިދާޅުވިއެވެ.
ފައްޔާޒް ވިދާޅުވީ އާއްމުން ސަރުކާރާއި ދެކޮޅަށް އަޑު އުފުލާ، އިހުތިޖާޖުކުރުމަށް އެއްވުމަކީ މި ސަރުކާރުން ވަރަށް ބިރު ގަންނަ ކަމެއް ކަމަށެވެ. އަދި ސަރުކާރަށް ކަންކަން ނުކުރެވޭތަނުގައި ގައުމުގެ ކަންކަން ރަނގަޅު ކުރެވޭނެ ގޮތެއް ވެސް ސަރުކާރަށް ބުނެދެވިފައި ނުވާ ކަަމަށް އެ މަނިކުފާނު ވިދާޅުވިއެވެ. އާއްމުން ސަރުކާރުގެ އިސްތިއުފާ އަށް ގޮވަނީ އެ ސަބަބާއި ހުރެ ކަމަށް ފައްޔާޒް ވަނީ ވިދާޅުވެފައެވެ. ފައްޔާޒް ވަނީ ނިމިދިޔަ ރައީސް އިބްރާޙިމް މުހައްމަދު ޞާލިހުގެ ސަރުކާރުގައި ކޮވިޑް-19 ފަދަ އެތައް ދަތިތަކެއް ދިމާވި ކަމަށް ފާހަގަކުރައްވާފައެވެ. އެހެންނަމަވެސް އޭރު ރައްޔިތުންނަށް މިހާރު މި ދިމާވާ ދަތިތަކާއި ދިމާ ނުވާ ކަމަށް ފައްޔާޒް ވިދާޅުވިއެވެ.
ބީރު ސަރުކާރަކަށް އަޑު އިވޭނީ އަޑު އުފުލާ އިހުތިޖާޖުކޮށްގެން ކަމަށާއި އެކަން އެމްޑީޕީން ކުރާނެ ކަމަށް އޭނާ ވިދާޅުވިއެވެ. ފައްޔާޒް ވަނީ އަހަރެއް ވެގެން ދިޔަ އިރު ވެސް ބަޖެޓާއި ހުރެ ކަންކަން ނުކުރެވުނު ކަމަށް ސަރުކާރުން ބުނަމުންދާ ކަމަށާއި އެހެންނަމަވެސް ބަޖެޓުގައި ހުރި ފައިސާ ހުސްވެފައިވާ ކަމަށް ފައްޔާޒް ވިދާޅުވިއެވެ.
އެހެންކަމުން ބަޖެޓު ހުސްވި ގޮތް ސަރުކާރުން ސާފުކޮށްދޭން ޖެހޭ ކަމަށް އެ މަނިކުފާނު ވިދާޅުވިއެވެ. މީގެ އިތުރުން ފައްޔާޒް ވަނީ ސަރުކާރުގެ ނާގާބިލްކަމާއި މުއައްސާތައް ނުހިނގުމާއި މެދު އާއްމުންނާއި ސިޔާސީ ޕާޓީތަކުން ވެސް މިހާރު ސުވާލު އުފައްދަން ޖެހޭ ކަމަށް ވިދާޅުވެފައެވެ.
ސަރުކާރަށް އިތުބާރުކޮށްގެން އާއްމުން ވޯޓު ދިނުމުން ރައީސް މުއިއްޒުގެ ސަރުކާރުން އާއްމުން މާޔޫސްކޮށްލާފައިވާ ކަމަށް ފައްޔާޒް ވިދާޅުވިއެވެ.
