ރާއްޖޭގެ އިޤްތިޞާދީ ދުވެލި މަޑު ޖެހިއްޖެ ކަމަށް މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ހާމަ ކޮށްފިއެވެ.

ނޮވެމްބަރު 2024 ގައި އެމްއެމްއޭ އިން ނެރުނު އިކޮނޮމިކް އަޕްޑޭޓް އިން ހާމަވާ ގޮތުގައި 2024 ގެ ދެވަނަ ކުއާޓަރގައި ރާއްޖޭގެ ރިޔަލް ޖީޑީޕީ ގެ ކުރިއެރުން 4.5 އިން ސައްތައިގައި ހުރި އިރު، ފުރަތަމަ ކުއާޓަރގައި ދުވެލި ހުރީ 7.7 އިން ސައްތައިގައެވެ ގައެވެ.

އިގްތިސާދީ ދުވެލި މަޑުޖެހުނީ މަސްވެރިކަމާއި، އިމާރާތް ކުރުމާއި، އުފެއްދުންތެރިކަމުގެ ދާއިރާތަކުގެ ވިޔަފާރި ދަށަށް ދިއުމުން ކަމަށް އެމްއެމްއޭ ގެ ރިޕޯޓުގައި ފާހަގަ ކޮށްފައިވެއެވެ.

އިގްތިސާދަށް އެންމެ މުހިންމު ހިއްސާ އެއް ދެނީ ފަތުރުވެރިކަމުގެ ސިނާއަތުން ކަން ރިޕޯޓުން ފާހަގަ ވާ އިރު އޮކްޓޯބަރު މަހާ ހަމައަށް ކޮންމެ މަހަކު ފަތުރުވެރިންގެ އަދަދު 10 އިންސައްތަ އިތުރުވެފައިވެއެވެ. މި ކުރިއެރުން ލިބުނީ ޔޫރަޕާއި ޗައިނާގެ މާކެޓްތަކުން އައި ފަތުރުވެރިން އިތުރުވުމުގެ ސަބަބުން ކަމަށް ރިޕޯޓުގައި ބުނެފައިވެއެވެ.

އަނެއްކޮޅުން، ގެސްޓްހައުސްތަކާއި ހޮޓާތަކުގެ ވިޔަފާރި އަށް ވަނީ ހީނަރު ކަން އައިސްފައެވެ. އެގޮތުން، ގެސްޓްހައުސް ތަކުގެ ބެޑްނައިޓްސް 6 އިންސައްތަ ދަށަށް ގޮސް އަދި ހޮޓާ ތަކުގެ ބެޑްނައިޓްސް 14 އިން ސައްތަ ދަށްވެފައިވެއެވެ. ރިސޯޓުތަކުގެ ބެޑްނައިޓްސް މަޑުމަޑުން ކުރިއަރަމުން ދިޔަ ނަމަވެސް، 2023 ގެ މި މުއްދަތާ އަޅާބަލާއިރު މިއަހަރުގެ މިހާތަނަށް ހިންގަމުންދާ އެނދުގެ އަދަދު ވަނީ ދަށްވެފައިވެއެވެ.

ރިޕޯޓުގައި ފާހަގަކޮށްފައިވާ ގޮތުގައި ސަރުކާރުގެ އާމްދަނީ ވަނީ 20 އިން ސައްތަ އިތުރުވެފައެވެ. މިއީ މައިގަނޑު ގޮތެއްގައި ޓެކްސްގެ ގޮތުގައި ލިބުނު އާމްދަނީ އިތުރުވުމުގެ ސަބަބުންނެވެ. ޓެކްސް ނޫން ގޮތްގޮތުން ލިބުނު އާމްދަނީ ވަނީ ދަށްވެފައެވެ. 

ކުރީ އަހަރުގެ މި މުއްދަތާ އަޅާ ބަލާއިރު ސަރުކާރުގެ ޚަރަދު 3 އިންސައްތަ އިތުރުވެފައިވާ އިރު، ރިކަރަންޓް ޚަރަދު ކެޕިޓަލް އިންވެސްޓްމަންޓް ތަކަށް ވުރެ އިތުރުވެފައިވެފައިވާކަން ވަނީ އެމްއެމްއޭ އިން ފާހަގަ ކޮށްފައެވެ.

ސަރުކާރުގެ ދަރަނި ޖީޑީޕީގެ ނިސްބަތުން 2023 ގެ ނިޔަލަށް 103 އިންސައްތަ ގައި ހުރި އިރު 2024 ގެ ފުރަތަމަ ކުއާޓަރުގައި 98 އިންސައްތަ އަށް ދަށްވި ކަމަށް ފެނުނު ނަމަވެސް، ޖުމްލަ ދަރަނި ވަނީ އިތުރުވެފައެވެ. މިއީ އެތެރޭގެ ދަރަނި އިތުރުވުމުގެ ސަބަބުންނެވެ.

2024 ގެ އޮކްޓޯބަރު މަހު އެކްސްޕޯޓް ވަނީ ކުރީ އަހަރާ އަޅާބަލާއިރު 29 އިން ސައްތަ ދަށްވެފައެވެ. މިއީ މައިގަނޑު ގޮތެއްގައި ކަނޑުމަހާއި ރީ-އެކްސްޕޯޓުން ލިބުނު އާމްދަނީ ދަށްވުމުގެ ސަބަބުންނެވެ. އިމްޕޯޓް 2 އިންސައްތަ އިތުރުވެފައި ވާ މައިގަނޑު ސަބަބަކީ ދަތުރުފަތުރުގެ އާލާތްތަކާއި ކާބޯތަކެތީގެ އިމްޕޯޓު އިތުރުވުމުގެ ސަބަބުންނެވެ.

އޮކްޓޯބަރު މަހުގެ ނިޔަލަށް ބޭރު ފައިސާގެ ރިޒާވް 614.6 މިލިއަން އެމެރިކާ ޑޮލަރަށް އަރާފައިވެއެވެ. މިއީ ސެޕްޓެމްބަރު މަހާ އަޅާބަލާއިރު 66 އިންސައްތައިގެ އިތުރުވުމެކެވެ. މިއީ އިންޑިއާގެ ރިޒާވް ބޭންކާއެކު ހެދި ކަރަންސީ ސްވޮޕް އެއްބަސްވުމުގެ ދަށުން އިންޑިއާ އިން ދިން އެހީގެ ސަބަބުން ލިބިފައިވާ ކުރިއެރުމެކެވެ.