ދެމަހަށް ވުރެ ގިނަ ދުވަސްވީއިރު ވެސް ޒަކިއްޔާގެ މަރުގެ އަސްލު ނުހޯދުނު
3 ޑިސެމްބަރު 2024 | އަންގާރަ 12:42ޒަކިއްޔާގެ ހަށިގަނޑުން ވެސް އެއްވެސް އިތުރު ފަރާތެއްގެ ފުށުން ލިބިފައިވާ އަނިޔާއެއް ނުފެނޭ
ޒަހަމްތަކާއެކު މަރުވެފައި އޮއްވާ ފެނުނު ޒަކިއްޔާ މޫސާ
ޒަހަމްތަކަކާއެކު މަރުވެފައި އޮއްވާ ފެނުނު ނ.ހޮޅަދޫ، ޒަކިއްޔާ މޫސާ މަރާލިކަމުގެ އެއްވެސް ހެއްކެއް ތަހުގީގަށް މިހާތަނަށް ހޯދިފައިނުވާ ކަމަށް ފުލުހުން ބުނެފިއެވެ.
އަންގާރަ ދުވަހު ފުލުހުން ބޭއްވި ނޫސްވެރިންގެ ބައްދަލުވުމުގައި ޗީފް އިންސްޕެކްޓާ އޮފް ޕޮލިސް މުހައްމަދު ސާމިހު ވިދާޅުވީ ޒަކިއްޔާ އޮތް ގުދަން ތެރެއާއި، ގޭތެރޭގެ އިތުރުން ޒަކިއްޔާގެ ހަށިގަނޑުން ވެސް އެއްވެސް އިތުރު ފަރާތެއްގެ ފުށުން ލިބިފައިވާ އަނިޔާގެ އެއްވެސް ނިޝާނެއް ފާހަގަކުރެވިފައިނުވާ ކަމަށެވެ. މިމައްސަލައާ ގުޅިގެން ސީޓީ ސްކޭނެއް ހެދިފައިވާއިރު، އޭގެ ނަތީޖާއިން ޒަކިއްޔާގެ ހަށިގަނޑަށް އަނިޔާއެއް ނުވަތަ ސުވާލު އުފެދޭ ފަދަ ކަމެއް ފާހަގަކުރެވިފައިނުވާ ކަމަށް އޭނާ ވިދާޅުވިއެވެ. އަދި ޑޮކްޓަރުގެ ބަހުން މަރުވި ސަބަބެއްގެ ގޮތުގައި ފާހަގަކޮށްފައިވަނީ ކަރަށް ލިބިފައިވާ ޒަހަމްތަކުގެ ސަބަބުންކަން އެނގޭ ކަމަށް ސާމިހު ވިދާޅުވިއެވެ.
ޒަކިއްޔާގެ ހަށިގަނޑުން ފެނިފައިވާ ޒަހަމްތަކާއި ގުޅޭގޮތުން ސާމިހު ވިދާޅުވީ ޒަކިއްޔާގެ ކަރުބުރިނުވެ ހުރީ ކިރިޔާ ކަމަށް ދެކެވޭ ވާހަކަތަކަކީ ހަގީގަތެއް ނޫން ކަމަށެވެ. ނަމަވެސް އޭނާގެ ކަރުގެ ކަނާތް އަދި ވައަތް ފަރާތަށް ފުންކޮށް ގިނަ ޒަޚަމްތަކެއް ލިބިފައި ހުރި ކަމަށް އޭނާ ވިދާޅުވިއެވެ. ނޫސްވެރިން ޒަހަމްތަކާއި ގުޅޭގޮތުން ސުވާލު ކުރުމާއި ގުޅިގެން ތަފްސީލް ކޮށްދެއްވާ ސާމިހު ވިދާޅުވީ ކަނާތް ފަރާތުގައި ހުރި ޒަހަމްތަކަށް ބަލާއިރު، 9 ސެންޓިމީޓަރާއި، 7 ސެންޓިމޭޓަރ ދެމެދުގެ ޒަހަމެއް ހުރި ކަމަށާއި، ވާތް ފަޅީގައި 4 ސެންޓިމީޓަރާއި 10 ސެންޓިމީޓަރާއި އަދި 7 ސެންޓިމީޓަރުގެ މެދުމިންގެ ޒަހަމެއް ހުރި ކަމަށެވެ. އަދި މޭމަތީގައި ނިޔަފަތިން އެޅިފައިވާ ކަހަލަ ވަތްކެއް ހުރި ކަމަށާއި، ނަމަވެސް އެ ކޫރުމަކީ މީހެއްގެ ނިޔަފަތީގެ ވަތްކެއްކަން ކަަށަވަރުނުވާ ކަމަށް އޭނާ ވިދާޅުވިއެވެ.
މީގެ އިތުރުން ސާމިހު ވިދާޅުވީ ޒަކިއްޔާ މަރުވެފައި އޮތް ސީންގައި އޭނާގެ ކައިރީ އޮތް ވަޅިއާއި އޭނާގެ ހެދުމުގައި ވެސް ގިނަ އަދަދަކަށް ލޭ ހުރި ކަމަށާއި، އަދި އެ ވަޅީގައި ހުރި ލެއަކީ ޒަކިއްޔާގެ ލޭ ކަމަށް ތަހުގީގަށް ފާހަގަކުރެވިފައިވާ ކަަމަށެވެ. ނަމަވެސް ޒަކިއްޔާގެ ކަރުގައި ފެންނަން ހުރި ޒަޚަމްތަކަކީ އެ ވަޅިން ލިބިފައިވާ ޒަޚަމްތަކެއްތޯ ނުވަތަ ނޫންތޯ ސާފުކޮށްދީފައެއް ނުވެއެވެ. ސާމިހު ވިދާޅުވީ އެ ވަޅިއަކީ އެގޭގެ ބަދިގޭގައި ބޭނުންކުރާ ވަޅިއެއްކަން ކަށަވަރުކުރެވިފައިވާ ކަމަށެވެ. ވަޅިން ފިންގަރ ޕްރިންޓް ފެނިފައިވައިވޭތޯ ސުވާލު ކުރުމުން ޖަވާބު ނުދެއްވާ ވިދާޅުވީ ތަހުގީގު އިތުރަށް ކުރިއަށްދާ ކަމަށެވެ.
ރަށު އާއްމު ރައްޔިތުންގެ ކަންބޮޑުވުންތަކާއި، ކުރެވޭ ތުހުމަތުތަކަށް އިޝާރާތް ކުރައްވައި ސާމިހު ވިދާޅުވީ ނަރުދަމާ ނިޒާމުގެ ތެރެއިން ބުރުގަލެއް ފެނިފައިވާއިރު، އެ ބުރުގަލަކީ ޒަކިއްޔާގެ ބުރުގަލެއް ކަމަށް ދޭހަވާ ތުހުމަތުތަކެއް އުފައްދާފައިވާ ކަމަށެވެ. ނަމަވެސް ބުރުގަލަކީ ޒަކިއްޔާގެ ބުރުގަލެއް ނޫން ކަން ތަހުގީގަަށް މިހާތަނަށް ވަނީ ދެނެގަނެވިފައި ކަމަށް އޭނާ ވިދާޅުވިއެވެ.
ސާމިހު ވިދާޅުވީ މިހާތަނަށް ކުރި ތަހުގީގުން އާއިލާ ތެރޭގައި އަދި ދޭދޭ ދެ ފަރުދެއްގެ އެއްވެސް މައްސަލައެއް ޒަކިއްޔާއާއި، ޒަކިއްޔާ އާއިލާގެ އެއްވެސް މެންބަރަކާ ޖެހިފައި އޮތް ކަމަކަށް ދެނެގަނެވިފައިނުވާ ކަމަށެވެ. ނަމަވެސް ޒަކިއްޔާއަކީ ނަފްސާނީ ބައްޔަށް ފަރުވާ ހޯދާ ފަރާތެއް ކަމަށް މައުލޫމާތު ލިބިފައިވާ ކަމަށެވެ.
ޗީފް ސުޕްރިޓެންޑެންޓް އޮފް ޕޮލިސް, ހެޑް އޮފް މޭޖާ ކްރައިމް އިންވެސްޓިގޭޝަން ހަސަން ޝިފާއު ވިދާޅުވީ ޒަކިއްޔާގެ މަރާ ގުޅޭގޮތުން ވަކި ގޮތަކަށް ނިންމޭނީ ތަހުގީގު އެއްކޮށް ނިމުމުން ކަމަށެވެ. ބޭރުގެ ފަރާތްތަކާއި ގުޅިގެން ފޮރެންސިކް ތަހުގީގުތައް ކުރިއަށްދާ ކަމަށް އޭނާ ވިދާޅުވިއެވެ.
ޒަކިއްޔާ ހަށިގަނޑު ފެނުނީ އެގެއަށް ކުނި ނަގަން ވަތް މުނިސިޕަލް މުވައްޒަފުންތަކަކަށެވެ. ހަށިގަނޑު ފެނުނުއިރު ކަރުގައި ވަޅި އަޅާފައިވާއިރު، ކައިރީގައި ގިނަ އަދަދެއްގެ ލޭ ހުއްޓެވެ. މި ހާދިސާގެ މައުލޫމާތު ފުލުހުންނަށް ރިޕޯޓު ކޮށްފައިވަނީ 10 ސެޕްޓެންބަރު 2024 ވަނަ ދުވަހުގެ ހެނދުނު 10:10 ހާއިރެވެ.
ފުލުހުންގެ ތަހުގީގަށް ޒަކިއްޔާގެ ހަށިގަނޑު މާލެ ގެނެސްފައިވެއެވެ. އަދި އޭނާގެ ހަށިގަނޑު ވަޅުލާފައިވަނީ 12 ސެޕްޓެންބަރު 2024 ގައެވެ.
