ފްރާންސްގެ ޕެރިސް ސެއިންޓް ޖާމަން (ޕީއެސްޖީ) އަށް ކުޅެމުން އަންނަ ޕޯޗުގަލްގެ މިޑްފީލްޑަރު ވިޓީނިއާގެ އެއްބަސްވުން އައު ކުރަން އެ ކުލަބުން ނިންމައިފި އެވެ.

އުމުރުން 24 އަހަރުގެ ކުޅުންތެރިޔާ ޕީއެސްޖީ އަށް ބަދަލުވީ 2022 ވަނަ އަހަރު އެވެ. އެ ކުލަބާ އެކު އޭނާ ސޮއި ކޮށްފައިވާ އެއްބަސްވުމުގައި ބާކީ އަހަރުތަކެއް އޮތް ނަމަވެސް، ޕީއެސްޖީން ބޭނުން ވަނީ އޭނާގެ އެއްބަސްވުން އައު ކުރަން ކަމަށް މީޑިއާ ތަކުގައި ވަނީ ރިޕޯޓުކޮށްފަ އެވެ. އެގޮތުން ދިގު މުއްދަތަކަށް އޭނާ ކުލަބުގައި ބަހައްޓަން ޕީއެސްޖީން ބޭނުންވާ ކަމަށާއި، އެކަމާ ގުޅޭ މަޝްވަރާތައް ކުރިއަށް ގެންގޮސް، އެއްބަސްވުމަކަށް އާދެވިފައިވާ ކަމަށް ވެސް ރިޕޯޓުތައް ބުނެ އެވެ.

ފްރާންސްގެ މީޑިއާ ތަކުގައި ބުނެފައިވާ ގޮތުން ޕީއެސްޖީން ބޭނުން ވަނީ ވިޓީނިއާގެ އެއްބަސްވުން 2029 ވަނަ އަހަރުގެ ޖޫން މަހުގެ ނިޔަލަށް އައު ކުރާށެވެ. އެ އެއްބަސްވުމުގައި ވަރަށް އަވަހަށް ރަސްމީކޮށް ސޮއި ކުރާނެ ކަމަށާއި، އެއްބަސްވުން އައު ކުރާތީ ވިޓީނިއާ ވެސް ހުރީ ހިތްހަމަ ޖެހިފައި ކަމަށް ވެސް ރިޕޯޓުތަކުގައި ބުނެފައިވެ އެވެ. އައު އެއްބަސްވުމުގެ ދަށުން މިހާރު ޕީއެސްޖީގައި ވިޓީނިއާ އަށް ލިބެމުން އަންނަ މުސާރަ އަށްވުރެ، ބޮޑު މުސާރައެއް ލިބޭނެ ކަމަށް ވެސް ރިޕޯޓުތަކުގައި ވަނީ ބުނެފަ އެވެ.

ޕީއެސްޖީ އަށް ބަދަލުވީ ފަހުން ވިޓީނިއާ ވަނީ މިހާތަނަށް އެ ކުލަބަށް ކުޅެދިން 109 މެޗުގައި 13 ލަނޑު ޖަހައިފަ އެވެ. އެ ކުލަބާ އެކު އޭނާ ވަނީ ފަސް ތައްޓެއް ވެސް ކާމިޔާބު ކޮށްފަ އެވެ. އޭގެ ތެރޭގައި ފްރާންސް ލީގު ދެ ފަހަރު ކާމިޔާބު ކުރުމުގެ އިތުރުން، ޓްރޮފީ ޑީ ޗެމްޕިއަންސް ދެ ފަހަރު ކާމިޔާބު ކުރުން އަދި ފްރާންސް ކަޕް އެއް ފަހަރު ކާމިޔާބު ކުރުން ހިމެނެ އެވެ.

ޕީއެސްޖީގައި މުހިންމު ދައުރެއް އަދާ ކުރަމުން އަންނަ ވިޓީނިއާ އަކީ ޕޯޗުގަލް ޤައުމީ ޓީމުގައި ވެސް ހިމެނޭ ކުޅުންތެރިޔެކެވެ. އޭނާ އަށް ޕޯޗުގަލް ޤައުމީ ޓީމުން ޖާގަ ލިބުނީ 2022 ވަނަ އަހަރު އެވެ. އޭގެ ފަހުން އޭނާ ވަނީ ޤައުމީ ޓީމަށް 25 މެޗު ކުޅެދީފަ އެވެ. ވިޓީނިއާ ވަނީ 2022 ވަނަ އަހަރު ޤަތަރުގައި ކުރިއަށް ދިޔަ ފީފާ ވޯލްޑް ކަޕް އަދި މިއަހަރު ޖަރުމަނުގައި ކުރިއަށް ދިޔަ ޔޫރޯ ފުޓުބޯޅަ މުބާރާތުގައި ޕޯޗުގަލްގެ ސްކޮޑުގައި ހިމެނިގެން މުބާރާތުގައި ކުޅެފަ އެވެ.