ރާއްޖެއަށް މަސްތުވާތަކެތި އެތެރެކުރެވޭ ގޮތަށް މަގުތަކެއް ހުޅުވިފައި އެބަހުރި، އެދޮރުތައް ބަންދުކުރަން ޖެހޭ: މެންބަރު އަނާރާ

ދިވެހިރާއްޖެއަށް ކަނޑުގެ މަގުންނާއި، ވައިގެ މަގުން މަސްތުވާތަކެތި އެތެރެކުރެވޭ މަގުތަކެއް ހުޅުވިފައި އެބަހުރި ކަމަށާއި، އެދޮރުތައް ބަންދުކުރަންޖެހޭ ކަމަށް ރައްޔިތުންގެ މަޖިލީހުގެ ހުރާ ދާއިރާގެ މެންބަރު ޑރ. އަނާރާ ނައީމް ވިދާޅުވެއްޖެއެވެ.

އަންގާރަ ދުވަހުގެ ރައްޔިތުން މަޖިލީހުގެ ޖަލްސާގައި މަސްތުވާތަކެތީގެ ގާނޫނަށް އިސްލާހު ގެނައުމުގެ ބިލަށް ވާހަކަދައްކަވަމުން މެންބަރު އަނާރާ ވިދާޅުވީ ދުނިޔެމަތީގެ ސުވަރުގެ ފަދައިން ސިފަކުރަމުންދާ ރާއްޖޭގައި މަސްތުވާތަކެތީގެ ވަބާގެ ފުރަތަމަ ކޭސްއެއް ރިޕޯޓުކޮށްފައިވަނީ 1977 ވަނަ އަހަރުގައި ކަމަށާއި، އޭގެފަހުން ވަރަށް މަސްތުވާތަކެތި މުޅިރާއްޖެ ފެތުރިފައިވާ ކަމަށެވެ.

Advertisement

މަސްތުވާތަކެތި ރާއްޖޭގައި ފުޅާވެފައިވާ ސަބަބުތަކަށް އިޝާރާތް ކުރައްވައި މެންބަރު އަނާރާ ވިދާޅުވީ މަސްތުވާތަކެތި ބޭނުންކުރާ މީހުން އަތޮޅުތެރޭގެ ރަށްތަކަށް އަރުވާލުމުން ވެސް މަސްތުވާތަކެތި ރަށްތަކުގައި ފެތުރިފައިވާ ކަމަށެވެ. އަދި ވިދާޅުވީ އާއިލާތައް ރޫޅި، ދަރިން ބިކަވުމާއި، އެކުދިންނަށް ނޭދެވޭ މަގުތައް އިހުތިޔާރުކުރެވުން ހިިމެނޭ ކަމަށެވެ.

މީގެ އިތުރުން މެންބަރު އަަނާރާ ވިދާޅުވީ މިމައްސަލަ ހައްލު ކުރުމަށް ރަނގަޅު ސިޔާސަތުތަކެއް އެކުލަވާލައި، އެގޮތަށް މަސައްކަތް ކުރަންޖެހޭ ކަމަށެވެ.

އެގޮތުން މިމައްސަލަ ހައްލު ކުރުމަށް ކޮންމެ މީހަކު ވެސް ފަރުދީ ޒިންމާ ނަގަންޖެހޭ ކަމަށާއި، ކޮންމެ މީހަކު ވެސް އާއިލާތައް ހަރުދަނާ ގޮތެއްގައި ބައްޓަންކޮށް، ދަރިންނަށް ރަނގަޅު ތަރުބިއްޔަތެއް ދިނުމަށް އިސްކަންދޭންޖެހޭ މެންބަރު އަނާރާ ވިދާޅުވިއެވެ. އަދި ނޭދެވޭ މަގުތައް އިހުތިޔާރު ކުރުމަށް ދުރުކުރުމަށްޓަކައި، ދަރިން ހާސިލްކުރަން ބޭނުންވާ މަގުސަދު އަދި ދިރިއުޅުމުގެ ލަނޑުދަނޑި އެކުދިންނަށް ބުނެދީ، މަގު ދައްކައިދޭންޖެހޭ ކަމަށެވެ. އޭރުން އެކުދިން އެލަނޑުގަނޑި ހާސިލް ކުރުމަށް ވަގުތު ހޭދަކުރާނެ ކަމަށް މެންބަރު އަނާރާ ވިދާޅުވިއެވެ.

ރާއްޖެއަކީ ވަށައިގެން ކަނޑު އޮންނަ ޖަޒީރާ ގައުމެއްކަން ފާހަގަކުރައްވައި މެންބަރު އަނާރާ ވިދާޅުވީ މަސްތުވާތަކެތި ކަނޑުގެ މަގުންނާއި، ވައިގެ މަގުން އެތެރެވާނެ ދޮރުތަކެއް ހުޅުވިފައިވާ ކަމަށެވެ. މި ހުށަހެޅުނު އިސްލާހުތަކާއެކު އެފަދަ ދޮރުތައް ބަންދުވެ މިމަސްތުވާތެކެތީގެ މައްސަލައަށް ހައްލު ލިބުމަށްފަހި ފުރުސަތުތަކެއް ލިބިގެންދާނެ ކަމަށް މެންބަރު އަނާރާ ވިދާޅުވިއެވެ.

މެންބަރު އަނާރާ ވިދާޅުވީ މަސްތުވާތަކެތީގެ ވަބާއިން ގައުމު ސަލާމަތްކުރުމަށް ބޮޑެތި އަދަބުތައް ކަނޑައަޅައި، ތަންފީޒު ކުރަންޖެހޭ ކަމަށެވެ. އަމިއްލަ ރައްކާތެރިކަމަށް ވިސްނައި، މިމަސައްކަތްތައް ކުރިއަށް ގެންދިއުމަށް އެންމެންގެ އެއްބާރުލުން ބޭނުންވާ ކަމަށް މެންބަރު އަނާރާ ވިދާޅުވިއެވެ.

މަސްތުވާތަކެތީގެ ގާނޫނަށް އިސްލާހު ގެނައުމަށް ސަރުކާރުގެ ފަރާތުން އިސްލާހު ހުށަހަޅާފައިވާ މި ބިލަކީ މަސްތުވާތަކެތީގެ މައްސަލަތައް ތަހުގީގުކޮށް، ދައުވާކުރުމުގައި ހުރި ގޮންޖެހުންތައް ނައްތާލުމަށް، ދައުލަތުގެ ކަމާގުޅުންހުރި އިދާރާތަކުގެ މަޝްވަރާއާއެކު މަސްތުވާތަކެއްޗާބެހޭ ގާނޫނު ރިވިއުކުރުމަށްފަހު، އެ ގާނޫނަށް ގެންނަންޖެހޭ އިސްލާހުތައް ގެނައުމަށް ހުށަހަޅާފައިވާ ބިލެކެވެ.