ފްލިކް ބުނީ ލިބޭ ފުރުުސަތުތަކުގެ ބޭނުން ހިފަން ޖެހޭ ކަމަށް

ސްޕެނިޝް ލީގުގައި މަޔޯކާއާ ދެކޮޅަށް ބާސެލޯނާ އިން ނިކުންނައިރު، ލިބޭ ފުރުސަތުގެ ބޭނުން އެންމެ ރަނގަޅަށް ހިފަން ޖެހޭ ކަމަށް އެ ޓީމުގެ ކޯޗު ހަންސީ ފްލިކް ބުނެފި އެވެ.

އޭނާ މިހެން ބުނީ އަންގާރަ ދުވަހުގެ ރޭ ބާސެލޯނާ އިން މަޔޯކާއާ ދެކޮޅަށް ކުޅޭ މެޗުގެ ކުރިން ވާހަކަ ދައްކަމުންނެވެ. އެ މެޗަށް ނިކުންނައިރު، އެންމެ ފަހުން ލީގުގައި ލަސް ޕަލްމާސްއާ ދެކޮޅަށް ކުޅުނު މެޗުން ބަލިވެ ބާސެލޯނާ އަށް ވަނީ އެއް ވަނައިގައި ލީޑު ފުޅާ ކުރަން ލިބުނު ފުރުސަތު ގެއްލިފަ އެވެ.

މަޔޯކާ މެޗުގެ ކުރިން ވާހަކަ ދައްކަމުން ފްލިކް ބުނީ ކުޅުންތެރިން އިތުރަށް ސަމާލުވާން ޖެހޭ ކަމަށާއި، ޓީމުގެ ކުރި އާއި ފަހަތުގައި ވެސް އިތުރު ވަރުގަދަ ކަމެއް ދައްކަން ޖެހޭ ކަމަށެވެ. ފްލިކް ބުނީ މެޗުގެ ކުރިން އޭނާ އަށް ހިތްހަމަ ޖެހުމަކީ ބާސެލޯނާގެ ކުޅުންތެރިން ރަނގަޅަށް މަސައްކަތް ކުރުން ކަމަށާއި، ބަލިވި މެޗުތަކުގައި ވެސް ކުޅުންތެރިން އެކަން ދައްކައިދީފައިވާ ކަމަށެވެ. އެހެން ނަމަވެސް، އެކަމާ އެއް ވަރަށް، ލިބޭ ފުރުސަތުތައް ނިންމާލުމަކީ ވެސް ވަރަށް މުހިންމު ކަމެއް ކަމަށް ފްލިކް ވަނީ ބުނެފަ އެވެ.

ފްލިކް ބުނީ އޭނާ ބަހަނާ ދައްކަން އުޅޭ ކަހަލަ އިޙުސާސެއް މީހުންނަށް ކުރެވިދާނެ ކަމަށާއި، ނަމަވެސް ބާސެލޯނާ ބަލިވެފައިވާކަން އޭނާ ޤަބޫލު ކުރާ ކަމަށެވެ. އެޓޭކު ކުރުމުގައި ބާސެލޯނާ އިން އިތުރަށް ފޯކަސް ކުރަން ޖެހޭ ކަމަށާއި، މެޗެއްގައި ލިބޭ ތިން ފުރުސަތު ނުވަތަ ހަތަރު ފުރުސަތު ބޭކާރުވެގެން ދިޔުމަކީ ބަލައި ގަނެވޭނެ ކަމެއް ނޫން ކަމަށް ވެސް ފްލިކް ވަނީ ބުނެފަ އެވެ. ފުޓުބޯޅަ އަށް ބަލާއިރު، އެންމެ މުހިންމީ ގޯލު ޖެހުން ކަމަށާއި، ބޭނުން ވާނީ ވެސް އެކަން ކަމަށް ފްލިކް ބުންޏެވެ.

މީގެ އިތުރުން ފްލިކް ބުނީ ބާސެލޯނާގައި އޮތީ ވަރަށް ޒުވާން ޓީމެއް ކަމަށާއި، އެ ޓީމަކީ ކަންކަން ދަސްކޮށް، މޮޅުވާނެ ޓީމެއް ކަމަށެވެ. އޭނާ ބުނީ ރަނގަޅު ކުރަން ހުރި ކަންކަން ފާހަގަވަމުން އަންނަ ކަމަށާއި، އަބަދު ވެސް އެކަންކަން ރަނގަޅު ކުރުމަށް އިސްކަމެއް ދެމުން އަންނަ ކަމަށެވެ. ލަސް ޕަލްމާސް މެޗުގެ ފަހުން ކުރެވުނު މަސައްކަތަށް ބަލާއިރު، މަޔޯކާ މެޗަށް އުންމީދުގައި ހުރި ކަމަށް ފްލިކް ބުނެފައިވެ އެވެ.

މަޔޯކާ މެޗާ ކުރިމަތިލާއިރު ބާސެލޯނާ އެއް ވަނައިގައި އޮތީ ޕޮއިންޓެއް ލީޑަކުންނެވެ. އެއީ މިހާތަނަށް އެ ޓީމު ކުޅެފައިވާ 15 މެޗުން 34 ޕޮއިންޓާ އެކު އެވެ. ބާސެލޯނާ އަށް ވުރެ އެއް މެޗު މަދުން ކުޅެގެން، ދެ ވަނައިގައި އޮތް އެންމެ ފަހުގެ ޗެމްޕިއަން ރެއާލް މެޑްރިޑަށް ލިބެނީ 33 ޕޮއިންޓެވެ.