ހެޔޮ ނިޔަތެއްގައި މަސައްކަތް ކުރާނަމަ މަޖިލީހަށް ހުށަހަޅާ ބިލުތައް ކަމާގުޅުންހުރި އިދާރާތަކާ މަޝްވަރާ ކުރާނެ: މެންބަރު ނާޒިލް
މިހާތަނަށް ރަނގަޅަށް މަޝްވަރާ ކުރެވިގެން އިދާރާތަކުގެ ހިޔާލާއެކު ރަނގަޅު އިސްލާހެއް ފާސްކޮށްފައިނުވޭ
ރައްޔިތުންގެ މަޖިލީހުގައި ހިތަދޫ ދެކުނު ދާއިރާގެ މެންބަރު އިބްރާހިމް ނާޒިލް ވާހަކަދައްކަވަނީ
ހެޔޮ ނިޔަތެއްގައި މަސައްކަތް ކުރާނަމަ ރައްޔިތުންގެ މަޖިލީހަށް ހުށަހަޅާ ބިލުތައް ކަމާގުޅުންހުރި އިދާރާތަކާއި މަޝްވަރާ ކުރުމަށްފަހު، ރަނގަޅު އިސްލާހުތަކެއް ހުށަހެޅުމަށް އެމްޑީޕީގެ ޕާލަމަންޓްރީ ގްރޫޕް (ޕީޖީ) ލީޑަރު، ހިތަދޫ ދެކުނު ދާއިރާގެ މެންބަރު އިބްރާހިމް ނާޒިލް ގޮވާލައްވައިފިއެވެ.
މެންބަރު ނާޒިލް މިހެން ގޮވާލެއްވީ ހޯމަ ދުވަހުގެ ރައްޔިތުންގެ މަޖިލީހުގެ ޖަލްސާގައި ކޮޕީ ރައިޓާއި އެއާގުޅޭ އެހެނިހެން ހައްގުތަކުގެ ގާނޫނަށް އިސްލާޙު ގެނައުމުގެ ބިލަށް ބަހުސް ކުރައްވަމުންނެވެ.
މަޖިލީހުގެ މަސައްކަތްކަށް އިޝާރާތް ކުރައްވައި މެންބަރު ނާޒިލް ވިދާޅުވީ މިހާތަނަށް ރަނގަޅަށް މަޝްވަރާ ކުރެވިގެން ކަމާގުޅުންހުރި އިދާރާތަކުގެ ހިޔާލާއެކު ރަނގަޅު އިސްލާހެއް ފާސްކޮށްފައިނުވާ ކަމަށެވެ. އަދި ވިދާޅުވީ ހެޔޮ ނިޔަތެއްގައި މަސައްކަތް ކުރާ ކަމަށްވާނަމަ ބިލު ހުށަހެޅުމުގެ ތެރޭގައި ގުޅުންހުރި ފަރާތްތަކާއި ވާހަކަ ދައްކައި، ރަނގަޅު އިސްލާހުތަކެއް ހުށަހަޅާނެ ކަމަށެވެ.
ހޯމަ ދުވަހުގެ ޖަލްސާގައި ކޮޕީ ރައިޓާއި އެއާގުޅޭ އެހެނިހެން ހައްގުތަކުގެ ގާނޫނަށް އިސްލާހު ގެނައުމުގެ ބިލު މަޖިލީހުން ވަނީ ފާސްކޮށްފައެވެ. މި ބިލު ފާސްކޮށްފައިވަނީ އިގްތިސާދީ ކޮމިޓީން ނިންމި ގޮތަށް 57 މެންބަރުންގެ ވޯޓާ އެކުއެވެ.
މި ބިލަކީ ސަރުކާރުގެ ފަރާތުން ނިލަންދޫ ދާއިރާގެ މެމްބަރު ފާތިމަތު ސައުދާ ހުށަހެޅުއްވި ބިލެކެވެ.
ބިލު ހުށަހެޅުއްވުމުގެ މަގުސަދަކީ ކޮޕީ ރައިޓާއި އެއާ ގުޅޭ ހައްގުތަކުގެ ގާނޫނުގެ ދަށުން ކޮޕީރައިޓާ ގުޅޭ ކަންކަން އިތުރަށް ތަފްސީލުކޮށް، ޚާއްސަ އެހީއަށް ބޭނުންވާ ފަރާތްތަކަށް ލިބިދޭ އިސްތިސްނާވެސް ހިމެނޭގޮތަށް ކޮޕީރައިޓްސްގެ ހައްގުތައް ހިމާޔަތް ކުރުމެވެ.
