ގެޓާފޭ ބަލިކޮށް، ރެއާލް އިން ފަރަގު ކުޑަކޮށްފި

ސްޕެނިޝް ލީގުގައި ގެޓާފޭއާ ދެކޮޅަށް ކުޅުނު މެޗުން މޮޅުވެ އެންމެ ފަހުގެ ޗެމްޕިއަން ރެއާލް މެޑްރިޑުން، އެއް ވަނައިގައި އޮތް ބާސެލޯނާއާ ދެމެދު އޮތް ފަރަގު ކުޑަ ކޮށްފި އެވެ.

ރެއާލްގެ އަމިއްލަ ދަނޑުގައި އާދީއްތަ ދުވަހުގެ ރޭ ކުޅުނު މެޗު ރެއާލް އިން ކާމިޔާބު ކުރީ 2-0 އިންނެވެ. މެޗުގައި ރެއާލްގެ ދެ ލަނޑު ވެސް އެ ޓީމުން ޖެހީ ފުރަތަމަ ހާފުގަ އެވެ.

މެޗުގެ ފުރަތަަމަ ހާފުގެ 30 ވަނަ މިނެޓުގައި ރެއާލުން ލީޑު ނެގީ އެ ޓީމަށް ލިބުނު ޕެނަލްޓީ ކާމިޔާބު ކޮށްގެންނެވެ. އެ ޕެނަލްޓީ ކާމިޔާބުކޮށްގެން ރެއާލަށް ކުރި ހޯދައިދިނީ އެ ޓީމަށް ކުޅެމުން އަންނަ އިންގްލެންޑުގެ ޖޫޑް ބެލިންހަމް އެވެ. އޭގެ އަށް މިނެޓު ފަހުން ރެއާލް އިން ވަނީ ދެ ވަނަ ލަނޑެއް ޖަހައި ލީޑު ފުޅާ ކޮށްފަ އެވެ. ބެލިންހަމް ތަނަވަސްކޮށްދިން ފުރުސަތެއްގައި ރެއާލަށް އެ ލަނޑު ޖަހައިދިނީ ފްރާންސްގެ ކެޕްޓަން ކީލިއަން އެމްބާޕޭ އެވެ.

މިއީ ރެއާލަށް ބަދަލުވީ ފަހުން ސްޕެނިޝް ލީގުގައި އެމްބާޕޭ ޖެހި އަށް ވަނަ ލަނޑެެވެ. މިހާތަނަށް ސްޕެނިޝް ލީގުގައި އޭނާ ވަނީ ރެއާލާ އެކު 13 މެޗު ވެސް ކުޅެފަ އެވެ. ރެއާލް އަށް ބަދަލުވީ ފަހުން އެމްބާޕޭ ވަނީ ޖުމުލަ 10 ލަނޑު ޖަހައިފަ އެވެ. ރެއާލްގައި އެމްބާޕޭގެ ކުޅުން ދަށް ކަމަށް ބުނެ، ދޭތެރެއަކުން އޭނާ އަށް ފާޑު ކިޔުންތައް ވެސް އަމާޒުވެ އެވެ.

މޮޅާއެކު ރެއާލް ދެ ވަނައިގައި އޮތީ ބާސެލޯނާ އަށް ވުރެ އެއް މެޗު މަދުން ކުޅެގެންނެވެ. މިހާތަނަށް ކުޅެފައިވާ 14 މެޗުން ރެއާލަށް ލިބެނީ 33 ޕޮއިންޓެވެ. އެއް ވަނައިގައި ބާސެލޯނާ އޮތީ 15 މެޗުން 34 ޕޮއިންޓާ އެކު އެވެ. އެހެންކަމުން، މެޗުގެ އަދަދު ހަމަ ކުރާއިރު، އެއް ވަނަ މަގާމަށް ޖެހިލުމުގެ ފުރުސަތު ރެއާލަށް އޮންނާނެ އެވެ.