"މި ފެންނަނީ ޤާނޫނު އަސާސީ އަށް އިސްލާހު ގެނެސްގެން ސަރުކާރުން ފެށި މަސައްކަތުގެ އަސަރު"

މި ފެންނަނީ ޤާނޫނު އަސާސީ އަށް އިސްލާހު ގެނެސްގެން ސަރުކާރުން ފެށި މަސައްކަތުގެ އަސަރުކަމަށް އެމްޑީޕީގެ ކުރީގެ ޗެއަރޕަރސަން އަދި ކުރީގެ ޑިފެންސް މިނިސްޓަރ މާރިޔާ އަހުމަދު ދީދީ ވިދާޅުވެއްޖެއެވެ.

މާރިޔާ އެފަދައިން ވިދާޅުވީ އެމްޑީޕީގެ ސޯޝަލް މީޑިއާ އެކްޓިވިސްޓް ހުސެއިން ޝާފިއު (ތުއްތު) ފުލުހަށް ހާޒިރުކުރުމާއި ގުޅިގެން އެކަމާއި ދެކޮޅަށް އަޑު އުފުލުމަށް ބޭއްވި އެއްވުމުގައި ބައިވެރިވެވަޑައިގެން ނޫސްވެރިންނަށް މައުލޫމާތުދެއްވަމުންނެވެ. މާރިޔާ ވަނީ ޚިޔާލު ފާޅުކުރުމުގެ މިނިވަންކަން ފުޅާ ދާއިރާއެއްގައި ހޯދާފައި ވަނިކޮށް ސުލްހަވެރިކަމާއި އެކު ޚިޔާލު ފާޅުކުރަން ފުރުސަތު ނުދިނުމަކީ ސިޔާސީ ގޮތުން ވަކި މަޤްސަދެއް ހާސިލްކުރަން ކުރާ ކަމެއް ކަމަށް ވިދާޅުވެފައެވެ. ޝާފިއު ފުލުހަށް ހާޒިރުކުރުމަކީ ސިޔާސީ ކުލަ ޖެހިގެން ހިނގާ ކަމެއް ކަމަށް މާރިޔާ ވަނީ ވިދާޅުވެފައެވެ. އެކަމުގެ ސަބަބުން ނަޒާހަތްތެރިކަމާއި އެކު ފުލުހުން މަސައްކަތް ކުރާ ކަމާއި މެދު ސުވާލު ކުރަން ފުރުސަތު ލިބޭ ކަަމަށް ވެސް މާރިޔާ ވިދާޅުވިއެވެ. އެއީ ފުލުހުންގެ ވަސީލަތްތައް ވެސް އެންމެ ރަނގަޅަށް ބޭނުންކުރުން ނޫން ކަމަށް މާރިޔާ ވިދާޅުވިއެވެ. މާރިޔާ ވަނީ ވަކި ވަކި ބައެއްގެ މައްސަލަތަކެއް ބެލުމަކީ ފުލުހުންގެ ނިޒާމް ކަތިކުރުން ކަމަށް ވިދާޅުވެފައެވެ.

އެ އެއްވުމުގައި މަޖިލީހުގެ މިހާރުގެ މެމްބަރުންނާއި މަޖިލީހުގެ ކުރީގެ މެމްބަރުން ވަނީ ބައިވެރިވެފައެވެ. މިއީ ޤާނޫނު އަސާސީ އަށް ބަދަލުގެނެސްގެން ސަރުކާރުން ބޭނުން ވަނީ ޚިޔާލު ފާޅުކުރުން އެއްކޮށް ނައްތާލަންކަން މިހާރު ހާމަވަމުންދާ ކަމަށް އެބޭފުޅުން ފާހަގަކުރައްވާފައި ވެއެވެ. އެގޮތުން މިއީ ފެށުމެއް ކަމަށް މެމްބަރުން ވަނީ ސިފަކުރައްވާފައެވެ. އެ ބޭފުޅުން ވިދާޅުވީ މިކަމުން އެނގެނީ ސަރުކާރުގެ ވިޔާނުދާ ވިސްނުން ކަމަށެވެ. ސަރުކާރުގެ ވިސްނުން ހުރީ ނޫސްވެރިކަމާއި ޚިޔާލުފާޅުކުރުން އެތައްތަނެއް ފަހަތަށް ސޮއްސާލާނެ ފަދަ ގޮތަކަށް ކަމަށް އެބޭފުޅުން ވަނީ ވިދާޅުވެފައެވެ. މިއީ އިދިކޮޅު ޕާޓީ އަަށް ބިރު ދައްކާ ސަރުކާރާއި ދެކޮޅަށް ބަސްބުނުން ހުއްޓުވުން ކަމަށް ވެސް ވަނީ ވިދާޅުވެފައެވެ. ފުލުހަށް ހާޒިރުކޮށްގެން ހާސިލްކުރަން ބޭނުންވާކަމަކީ ބިރުވެރިކަން އުފެއްދުން ކަމަށް މެމްބަރުން ވަނީ ފާހަގަކުރައްވާފައެވެ. ޤާނޫނާއި ޤަވައިދުތަކަށް ބަދަލު ގެނެސްގެން ކުރަމުންދާ ކަމަކީ މީޑިއާގެ ކޮންޓްރޯލް ހާސިލްކުރުން ކަމަށް އެ ބޭފުޅުން ވަނީ ފާހަގަކުރައްވާފައެވެ.

މީގެ އިތުރުން އެ އެއްވުމުގައި ބައިވެރިވި އެމްޑީޕީގެ ޤައުމީ މަޖިލީސް މެމްބަރުންނާއި، އެމްޑީޕީގެ ޤާނޫނީ ޓީމްގައި ހިމެނިވަޑައިގަންނަވާ ބޭފުޅުން ވެސް ވަނީ މިއީ ޤާނޫނީ ގޮތުން ލިބިފައިވާ ހައްގުތައް ހަނިކުރުމަށް ސަރުކާރުން ހިންގާ އަމަލެއްގެ ގޮތުގަ ސިފަކުރައްވާފައެވެ.