ސަރުކާރަށް ފާޑުކިޔުން އަމާޒުކުރުމަކީ ކުށެއް ކަމަށް ހެދުމުގެ މާޒީ އިއާދަކުރުމަކީ ކަންބޮޑުވެވަޑައިގަންނަވާ ކަމެއް ކަމަށް ކުރީގެ ރައީސް އިބްރާޙިމް މުހައްމަދު ޞާލިހު ވިދާޅުވެއްޖެއެވެ.
ރައީސް ޞާލިހު އެފަދައިން ވިދާޅުވީ އެ މަނިކުފާނު އެކްސްގައި ކުރެއްވި ޕޯސްޓެއްގައެވެ. އެ މަނިކުފާނު ވިދާޅުވީ ސޯޝަލް މީޑިއާގައި ކުރާ ޕޯސްޓުތަކަށް ފުލުހަށް ހާޒިރުކުރުމާއި ކައުންސިލްތަކަށް އިންޒާރުގެ ސިޓީ ފޮނުވުމަކީ ދިވެހި ރައްޔިތުންގެ ބުރަ މަސައްކަތުން ހޯދި ހިޔާލުފާޅު ކުރުމުގެ މިނިވަންކަމާއި ޑިމޮކްރަސީގައި ފަހަތަށް އެޅޭ ފިޔަވަޅެއް ކަމަށެވެ. އަދި ސަރުކާރަށް ފާޑުކިޔުން އަމާޒުކުރުމަކީ ކުށެއްގެ ގޮތުގައި ހަދައި އަދަބު ދިނުމުގެ ބިރުވެރި މާޒީ އަލުން އިއާދަކުރަން ސަރުކާރުން މަސައްކަތްކުރުމަކީ ކަންބޮޑުވެވަޑައިގަންނަވާ ކަމެއް ކަމަށް ވެސް ރައީސް ޞާލިހު ވިދާޅުވެފައިވެއެވެ.
އެ މަނިކުފާނު މިފަދައިން ވިދާޅުވެފައި މި ވަނީ އެމްޑީޕީގެ ސޯޝަލް މީޑިއާ އެކްޓިވިސްޓް ހުސެއިން ޝާފިއު އެކްސްގައި ކުރި ޕޯސްޓަކާ ގުޅިގެން ފުލުހަށް ހާޒިރު ވުމަށް އޭނާ އަށް ޗިޓު ފޮނުވާފައިވާ ދަނޑިވަޅެއްގައެވެ.
އެމްޑީޕީގެ ސޯޝަލް މީޑިއާ އެކްޓިވިސްޓް ހުސެއިން ޝާފިއު (ތުއްތު) ފުލުހަށް ހާޒިރުވާން ފޮނުވި ޗިޓުގައި މައްސަލައިގެ ޚުލާސާ ގައި ބުނެފައިވަނީ ސޯޝަލް މީޑިއާ ގައި ހަޑިހުތުރު ބަސް ބޭނުން ކޮށްގެން ބިރުވެރިކަން އުފެދޭ ގޮތައް އެކްސް ގައި ޕޯސްޓެއް ކޮށްފައިވާތީ ކަމަށެވެ.
އިންސްޕެކްޓަރ އޮފް ޕޮލިސް ބިލާލު އަބްދުލް ހާދީ ސޮއިކޮށްފައިވާ ޗިޓުގައި ބުނެފައިވަނީ "24 ނޮވެމްބަރު ދުވަހުގެ 1:14 ގައި @ޗާލީ_ތުއްތު ހޭންޑްލް އިން ހަޑިހުތުރު ބަސް ބޭނުން ކޮށް ބިރުވެރިކަން އުފެދޭ ގޮތައް އެކްސް ގައ ޕޯސްޓެއްކޮށްފައިވަ މައްސަލައިގެ ތުހުމަތުގައި ސުވާލުކޮށް ބަޔާން ނެގުމަށް" ކަމަށެވެ. ޗިޓުގައި 4 ގަޑިއިރު މިކަމަށް ހޭދަ ވާނެ ކަމަށް ލަފާކުރެވޭ ކަމަށާއި، 1 ޑިސެމްބަރު 2024 ވަނަ ދުވަހުގެ މެންދުރު 1:30ށް ސާޖަންޓް އާދަމް ހަލީމް ކްރިމިނަލް އިންވެސްޓިގޭޝަން ބިލްޑިންގ އަށް ހާޒިރުވެ ސާޖެންޓު އަބްދުﷲ ސާޖިދު އާ ބައްދަލު ކުރުމަށް ބުނެފައިވެއެވެ. މީގެ އިތުރުން ގައްދޫ ކައުންސިލްގެ ރައީސް މުހައްމަދު އަހްމަދު ވަޓްސް އަޕް ގްރޫފެއްގައި "ރައިސުލްޖުމްހޫރިއްޔާގެ އަބުރަށް ހުތުރުވާ ގޮތައް މުއާމަލާތް ކޮށްފައިވާތީ" އޭނާގެ މައްޗަށް ފިޔަވަޅު އެޅުމަށް ލޯކަލް ގަވަންމަންޓް އޮތޯރިޓީ އިން ވަނީ ހުވަދު އަތޮޅު ދެކުނު ބުރީ އަތޮޅު ކައުންސިލްގެ އިދާރާ އަށް ނޮވެމްބަރު މަހުގެ 18 ވަނަ ދުވަހު ސިޓީއަކުން އަންގާފައެވެ.
