ފުލުހުން ޗިޓު ފޮނުވިޔަސް ފާޅުގައި ބަސް ބުނުމުގެ ހިތްވަރު ދިވެހިންގެ ހުންނާނެ: ފައްޔާޒު
"ރައްޔިތުންގެ އަޑު ކަނޑުވާލައި، ހިޔާލު ފާޅުކުރުމަށް ހުދުމުހުތާރު ވެރިން އަބަދުވެސް ހުރަސް އަޅާނެ. ހިޔާލާއި ފިކުރުގައި ތަޅެއް ނޭޅުވޭނެ."
އެމްޑީޕީގެ ޗެއަރޕާސަން ފައްޔާޒް އިސްމާއިލް
ފުލުހުން ޗިޓު ފޮނުވިޔަސް ފާޅުގައި ބަސް ބުނުމުގެ ހިތްވަރު ދިވެހިންގެ އަދި ހާއްސަކޮށް އެމްޑީޕީގެ މެމްބަރުންގެ ހުންނާނެ ކަމަށް އެމްޑީޕީގެ ޗެއަރޕާސަން ފައްޔާޒު އިސްމާއީލް ވިދާޅުވެއްޖެއެވެ.
އެމްޑީޕީގެ ސޯޝަލް މީޑިއާ އެކްޓިވިސްޓް ހުސެއިން ޝާފިއު އެކްސްގައި ކުރި ޕޯސްޓަކާ ގުޅިގެން ފުލުހަށް ހާޒިރު ވުމަށް އޭނާ އަށް ޗިޓު ފޮނުވުމާ ގުޅިގެން ފައްޔާޒު ކުރެއްވި ޕޯސްޓެއްގައި ވިދާޅުވީ، ޓްވީޓު ކުރާތީ ފުލުސް އޮފީހަށް ހާޒިރުވާން ޝާފިއު (ތުއްތު) އަށް އަންގައިފި ކަމަށާއި، ރައީސުލްޖުމްހޫރިއްޔާ އާއި ސަރުކާރުގެ އިސްވެރިންގެ "އަބުރުފުޅު"ގެ ހިމާޔަތުގައި ކައުންސިލަރުންނާ ދެކޮޅަށް ފިޔަވަޅު އަޅަން ފަށައިފި ކަމަށެވެ.
"ސަރުކާރާ މެދު ހިތްހަމަނުޖެހުން އޮތްކަން ހާމަކުރުމަކީ ބޮޑު ކުށަކަށް މިއަދު ވެއްޖެ." ފައްޔާޒުގެ ޕޯސްޓުގައި ވެއެވެ.
ޗެއަރޕާސަން ވިދާޅުވީ، "ރައްޔިތުންގެ އަޑު ކަނޑުވާލައި، ހިޔާލު ފާޅުކުރުމަށް ހުދުމުހުތާރު ވެރިން އަބަދުވެސް ހުރަސް އަޅާނެ. ހިޔާލާއި ފިކުރުގައި ތަޅެއް ނޭޅުވޭނެ." ކަމަށެވެ.
"މިހެން ޗިޓު ފޮނުވިޔަސް ފާޅުގައި ބަސް ބުނުމުގެ ހިތްވަރު ދިވެހިންގެ އަދި ހާއްސަކޮށް އެމްޑީޕީގެ މެމްބަރުންގެ ހުންނާނެ." ފައްޔާޒު ވިދާޅުވިއެވެ.
ތުއްތު ފުލުސް އޮފީހަށް ޑިސެމްބަރު 1 ވަނަ ދުވަހު ހާޒިރުވާން ޗިޓު ފޮނުވާފައިވާއިރު، ފައްޔާޒުގެ ޕޯސްޓުގައި އިޝާރާތް ކުރައްވާފައިވާ ފަދައިން ގައްދޫ ކައުންސިލްގެ ރައީސް މުހައްމަދު އަހްމަދު ވަޓްސް އަޕް ގްރޫފެއްގައި "ރައިސުލްޖުމްހޫރިއްޔާގެ އަބުރަށް ހުތުރުވާ ގޮތައް މުއާމަލާތް ކޮށްފައިވާތީ" އޭނާގެ މައްޗަށް ފިޔަވަޅު އެޅުމަށް ލޯކަލް ގަވަންމަންޓް އޮތޯރިޓީ އިން ވަނީ ހުވަދު އަތޮޅު ދެކުނު ބުރީ އަތޮޅު ކައުންސިލްގެ އިދާރާ އަށް ނޮވެމްބަރު މަހުގެ 18 ވަނަ ދުވަހު ސިޓީއަކުން އަންގާފައެވެ.
