ޕީއެންސީ މެންބަރުން މަޖިލީހުގައި އެކްޓިވްކޮށް މަސައްކަތް ކުރައްވަނީ ނޭއްގާނީ ކަންތައްތަކެއް ކުރުމަށް: ޑރ.ޑީޑީ

ސަރުކާރުގެ ޕީއެންސީ މެންބަރުން ރައްޔިތުންގެ މަޖިލީހުގައި އެކްޓިވްކޮށް މަސައްކަތް ކުރައްވަނީ ނޭއްގާނީ ކަންތައްތަކެއް ކުރުމަށް ކަމަށް އެމްޑީޕީގެ ކުރީގެ ރައީސް ޑރ.އިބްރާހިމް ދީދީ (ޑރ.ޑީޑީ) ވިދާޅުވެއްޖެއެވެ.

ރާއްޖެޓީވީގެ ފަލަސުރުހީ ޕްރޮގްރާމްގައި ޑރ.ޑީޑީ ވިދާޅުވީ ބައެއް ދުވަސް ދުވަހު 20 ވަނަ ރައްޔިތުންގެ މަޖިލިސް ވަރަށް އެކްޓިވް ކަމަށާއި، ނަމަވެސް އެކްޓިވްކޮށް މަސައްކަތް ކުރައްވަނީ ރައްޔިތުންގެ ބާރު ކެނޑޭ ގޮތަށް މަސައްކަތްތަކެއް ކުރުމަށް ކަމަށެވެ.

Advertisement

މަޖިލިސް މެންބަރުންގެ ބާރު ކެނޑޭ ގޮތަށް ގާނޫނު އަސާސީއަށް ގެނެސްފައިވާ ބަދަލަށް އިޝާރާތް ކުރައްވައި ޑރ.ޑީޑީ ވިދާޅުވީ ރައްޔިތުންގެ މަންދޫބުން އަމިއްލައަށް ބޮޑު ތަޅުއަޅުވާފައިވާ ކަމަށެވެ. އަދި މިހާރު މަސައްކަތް ކުރަމުންދަނީ މިނިވަން މުއައްސަސާތަކުގައި ބޮޑު ތަޅުއެޅުވުމަށް ކަމަށާއި، މިފަދަ ނޭއްގާނީ ހުރިހާ ކަމެއް ކުރުމަށް ޕީއެންސީގެ މަޖިލިސް މެންބަަރުން ވަރަށް އެކްޓިވް ކަމަށް ޑރ.ޑީޑީ ވިދާޅުވިއެވެ.

ޑރ.ޑީޑީ ވިދާޅުވީ ޕީއެންސީގެ ބައެއް މެންބަރުން މިކަންކަން ދިފާއު ކުރައްވައި ވާހަކަދައްކަވާ ކަމަށާއި، އެންޓި ކޮރަޕްޝަން ކޮމިޝަން (އޭސީސީ)ގައި ބައިވަރު މައްސަލަތައް ހުރެ، ތަހުގީގު ކުރިއަށް ނުގޮސް ހުއްޓިފައިވާ ކަމަށް ވިދާޅުވާ ކަމަށެވެ. ރައީސް އެ ކޮމިޝަނަށް ބޭފުޅަކު ހަމަޖައްސަވަން ބޭނުންފުޅުވަނީ އެމައްސަލަތައް އަވަހަށް ތަހުގީގުކޮށް ނިންމުމުގެ މަގުސަދުގައި ކަމަށް ޕީއެންސީގެ މެންބަރުން ވިދާޅުވާ ކަމަށެވެ. ނަމަވެސް އޭސީސީއަށް ރައީސް މުއިއްޒުގެ ގިނަ މައްސަލަތަކާއި، މިސަރުކާރުގެ އިސްބޭފުޅުންގެ ގިނަ މައްސަލަތައް ހުށަހަޅާފައިވާ ކަމަށް ޑރ.ޑީޑީ ވިދާޅުވިއެވެ. އަދި މި މައްސަލަތައް އިންސާފުވެރިކަމާއެކު ތަހުގީގުކޮށް ކުރިއަށް ގެންދެވޭނެ ކަމާމެދު ޑރ.ޑީޑީ ވަނީ ސުވާލު އުފައްދާފައެވެ.

ޑރ.ޑީޑީ ވިދާޅުވީ މިސަރުކާރަކީ ހުދުމުހުތާރު ސަރުކާރެއް ކަމަށާއި، ހުދުމުހުތާރުކަމުގެ ހުރިހާ ސިފައެއް ފެންނަމުންދާ ކަމަށެވެ. އަދި ރައީސް މުއިއްޒު ރައްޔިތުންނާ މުޚާތަބު ކުރައްވަނީ ހުސްދޮގުން ކަމަށާއި، ވާހަކަފުޅު ނިންމަވާލައްވަނީ އިންޒާރާއެކު ކަމަށް ޑރ.ޑީޑީ ވިދާޅުވިއެވެ. ރައްޔިތުންގެ ކުރިމަތީގައި އަނިޔާވެރިކަން އިސްކުރުމަށް މަސައްކަތް ކުރާ ކަމަށާއި، ނަމަވެސް އަނިޔާވެރިކަމަށް ރައްޔިތުން މިހާރު ޖާގާ ނުދޭނެ ކަމަށް އޭނާ ވިދާޅުވިއެވެ. އަދި ވިދާޅުވީ މިއަދު ރާއްޖޭގެ ރައްޔިތުންނަކީ މާ ހޭލުންތެރި ބުއްދިވެރި ބައެއް ކަމަށެވެ.