19 ރަށެއްގެ ނަރުދަމާ މަސައްކަތް އެމްޑަބްލިއުއެސްސީއާ ވަނީ ހަވާލުކުރެވިފައި، އަވަހަށް މަސައްކަތް ފެށޭނެ: މިނިސްޓަރު މުއްތަލިބު
މިއީ އެއްބިލިއަން ރުފިޔާގެ މަޝްރޫއެއް
ރައްޔިތުންގެ މަޖިލީހުގައި ކޮންސްޓްރަކްޝްނަ މިނިސްޓަރު، އަބްދުﷲ މުއްތަލިބު ވާހަކަދައްކަވަނީ
ދިވެހިރާއްޖޭގެ 19 ރަށެއްގެ ނަރުދަމާ މަސައްކަތް އެމްޑަބްލިއުއެސްސީއާ ހަވާލުކޮށްފައިވާ ކަމަށް ކޮންސްޓްރަކްޝްނަ މިނިސްޓަރު، އަބްދުﷲ މުއްތަލިބު ވިދާޅުވެއްޖެ އެވެ.
ބުދަ ދުވަހު ރައްޔިތުންގެ މަޖިލީހުގެ ޖަލްސާގައި މަޖިލީހުގެ ކެންދޫ ދާއިރާގެ މެންބަރު، މައުރޫފް ޒާކިރު ވަނީ ބ. ކުޑަރިކިލު، ކިހާދޫ އަދި ދޮންފަނު ނަރުދަމާގެ މަސައްކަތް ކުރިއަށް ނުދާތީ އެކަމާ ގުޅޭގޮތުން ސުވާލުކޮށްފައެވެ. އެސުވާލަށް މިނިސްޓަރު މުއްތަލިބު ވިދާޅުވީ މި ސަރުކާރުން ބާތިލު ކުރި 20 ރަށުގެ ތެރެއިން 19 ރަށުގެ މަޝްރޫއުތައް މާބޮޑު ރަސްމިއްޔާތުތަކެއް ނުބޭއްވި ނަމަވެސް އެމްޑަބްލިއުއެސްސީއާ މަސައްކަތް ހަވާލުކޮށްފައިވާ ކަމަށެވެ.
އެއް ބިލިއަން ރުފިޔާގެ މަޝްރޫއެއްކަން ފާހަގަކުރައްވައި މިނިސްޓަރު މުއްތަލިބު ވިދާޅުވީ އެމްޑަބްލިއުއެސްސީ ތައްޔާރުވަމުންދަނީ ހުރިހާ ރަށެއްގައި ވީހާ ވެސް އަވަހަށް މަސައްކަތް ފެށުމަށް ކަމަށެވެ.
ކުރީ ސަރުކާރުގައި މި މަޝްރޫއުތައް ހިންގުމަށް ހަވާލުކޮށްފައިވަނީ ފެނަކަ ކޯޕްރޭޝަންއާއެވެ. ނަމަވެސް މިސަރުކާރުން މިއަހަރު އޯގަސްޓް މަހުގެ ތެރޭގައި އެއްބަސްވުން ވަނީ ބާތިލްކޮށްފައެވެ.
