ވޭޕް މަނާކުރަން ސަރުކާރުން އިއުލާންކުރި ދުވަސްވަރު އަތުލައިގަތް ވޭޕް ގައި މަސްތުވާތަކެތި ހުރިކަމަށް އާންމުކުރީ ފުރަތަމަ މަރުހަލާއިން ޕޮޒިޓިވްވުމުންކަމަށް ސަރުކާރުން ބުނެފިއެވެ.
އެކަން ހާމަކުރެއްވީ ދާޚިލީ ސަލާމަތާއި ފަންނިއްޔާތާ ބެހޭ ވަޒީރު އަލީ އިހްސާންއެވެ.
ވޭޕް މަނާކުރަން ސަރުކާރުން އިއުލާންކުރި ދުވަސްވަރު އަތުލައިގަތް ވޭޕް ގައި މަސްތުވާތަކެތި ނުހިމެނޭ ކަމަށް އަންގާރަ ދުވަހު ފުލުހުން ވަނީ ބުނެފައެވެ.
މިދިޔަ މަހުގެ 14 ވަނަ ދުވަހު މިނިސްޓަރ އޮފް ހޯމްލޭންޑް ސެކިއުރިޓީ އެންޑް ޓެކްނޮލޮޖީ އަލީ އިހުސާން އެކްސްގައި ކުރެއްވި ޕޯސްޓެއްގައި ވިދާޅުވީ ވޭޕް އޮއިލްގެ ނަމުގައި ރާއްޖެއަށް އެތެރެކުރެވުނު މަސްތުވާތަކެތީގެ ބާވަތެއްކަމަށްވާ ކެނެބިސް އަޅާފައިވާ ޝިޕްމަންޓެއް ކަސްޓަމްސްއިން ހިފަހަައްޓާފައިވާ ކަމަށެވެ. އަދި މިއީ ރައީސް ޑރ. މުހައްމަދު މުއިއްޒު ނެންގެވި ޑިސިޝަން ނަންގަވަން ޖެހުނު އެންމެ ބޮޑު އެއް ސަބަބު ކަމަށެވެ.
އަދި 14 މެއިގައި ރާއްޖެ އެތެރެކުރަން އުޅެނިކޮށް ހެފެހެއްޓުނު ކެނަބިސް އަޅާފައިވާ ވޭޕް ކާޓްރިޖްގެ ފޮޓޯއެއްކަމަށް ބުނާ ފޮޓޯއެއް މިނިސްޓަރު އެކްސްގައި ޕޯސްޓްކުރެއްވިއެވެ. މިނިސްޓަރު ވިދާޅުވެފައިވަނީ ސްކޫލްތަކުގެ ކިޔަވާ ކުދިންނަށް އެފަދަ މަސްތުވާތަކެތި ހިމެނޭ ވޭޕް އޮޅުވާލައިގެން ދެމުންދާކަން ވަނީ ފާހަގަކުރެވިފައި ކަމަށެވެ.
އެހެންނަމަވެސް އެއަރޕޯޓްގައި ކަސްޓަމްސްއިން ކްލިއަރ ކުރަމުންދާ ތަކެތިން ޝައްކުކުރެވޭފަދަ ކަމެއް ފެނިއްޖެ ނަމަ ރެޕިޑް ޓެސްޓްކޮށް ޕޮޒިޓިވްވާނަމަ ހިފެހެއްޓި ތަހްގީގަށް ހަވާލުކުރެވޭކަމަށް މިނިސްޓަރ ވިދާޅުވިއެވެ. އެގޮތުން މިވޭޕް ޝިޕްމަންޓުންވެސް ރެޕިޑް ޓެސްޓް ހެދި ކަމަށާއި އެ ޓެސްޓުން އެތަކެތު ކެނަބިސްއަށް ޕޮޒިޓިވްވި ކަމަށް މިނިސްޓަރ ވިދާޅުވިއެވެ. އެހެންނަމަވެސް އާންމު އުސޫލުން މިތަކެތި ތަހްޤީގަށް ފުލުހުންނާ ހަވާލުކުރެވި ލެބޯރެޓަރީ ޓެސްޓް ހަދާފައިވާކަމަށް ވަޒީރު ވަނީ ފާހަގަކުރައްވާފައެވެ. އަދި މިޓެސްޓާއި ރެޕިޑް ޓެސްޓް ނަތީޖާ ދިމާވާ ނުވެއްޖެނަމަ އިތުރަށް ކޮންފަރމެޓަރީ ޓެސްޓްތައް ހަދާކަމަށް ވެސް ވަޒީރު ވިދާޅުވިއެވެ. މިނިސްޓަރ ވިދާޅުވިގޮތުގައި ތަހުގީގަށް ބޭނުންކުރާނީ ކޮންފަރމެޓަރީ ޓެސްޓް ހެދުމަށްފަހު ޝައްކެއް ނެތް މިންވަރަށް ޔަޤީންވާ ޓެސްޓުތަކެވެ.
މަސްތުވާތަކެތި ހިމެނޭ ވޭޕް ކާޓްރިޖްތަކެއް އެތެރެކޮށްފައިވާ ކަމަށް މިނިސްޓަރ އެކްސްގައި ކުރެއްވި ޕޯސްޓަކީ ރައީސް ވޭޕް މަނާކުރުމަށް ނިންމަވާ އެކަން އެކްސްގައި ހާމަކުރެއްވި ޕޯސްޓާއި ގުޅިގެން ކުރެއްވި ޕޯސްޓެކެވެ. ރައީސްގެ ޕޯސްޓުގައި ވަނީ ވޭޕްކުރުމަށް ބޭނުންކުރާ ތަކެއްޗާއި، އެ ތަކެތީގެ ވަކިވަކި ބައިތައް ދިވެހިރާއްޖެއަށް އެތެރުކުރުން 15 ނޮވެމްބަރ 2024 އިން ފެށިގެން މަނާ ކުރުމަށާއި، ދިވެހިރާއްޖޭގައި ވޭޕްކުރުމަށް ބޭނުންކުރާ ތަކެތި ބޭނުންކުރުމާއި، ގެންގުޅުމާއި، އުފެއްދުމާއި، ވިއްކުމާއި، ރާއްޖޭގައި އިޝްތިހާރު ކުރުމާއި ހިލޭބެހުން 15 ޑިސެމްބަރ 2024 އިން ފެށިގެން މަނާކުރުމަށް ކުރަންޖެހޭ އެންމެހާ ކަންކަން ކުރުމަށް ކަމާބެހޭ ފަރާތްތަކަށް އަންގާފައިވާ ކަމަށެވެ.
