ފުލުހުންގެ އައިއޯއިންނަށް ރައްޔިތުން ކުރާ އިތުބާރު ކުރިއަށް އޮތްތަނުގަ އިތުރުވާނެ: ސީޕީ
ސީޕީ ވިދާޅުވިގޮތުގައި އައިއޯ އިން މިހާރުވެސް ހިއްސާކުރަންޖެހޭ މައުލުމާތުތައް މައްސަލަ ހުށަހަޅާ ފަރާތާ ފުރަތަމަ 24 ގަޑިއިރުގެ ތެރޭގައި ހިއްސާކުރަމުންދޭ
ކޮމިޝަނަރ އޮފް ޕޮލިސް ޢަލީ ޝުޖާއު
އިންވެސްޓިގޭޝަން އޮފިސަރުންނަށް ރައްޔިތުން ކުރާ އިތުބާރު ކުރިއަށް އޮތްތަނުގަ މިހާރަށް ވުރެ ބޮޑަށް އިތުރުވެގެންދާނެ ކަމަށް ކޮމިޝަނަރ އޮފް ޕޮލިސް ޢަލީ ޝުޖާއު ވިދާޅުވެއްޖެއެވެ.
ފާއިތުވި އެއް އަހަރުގެ ތެރޭގައި މޯލްޑިވްސް ޕޮލިސް ސަރވިސް އިން ހާސިލްކުރި މުހިންމު ކަންތައްތަކުގެ މައުލޫމާތު ހިއްސާކުރައްވާ ސީޕީ ވިދާޅުވީ މޯލްޑިވްސް ޕޮލިސް ސަރވިސްއަށް ހުށަހެޅޭ މައްސަލަތަކުގެ ވާނުވާ ނޭނެގޭ މައްސަލައަކީ ރައްޔިތުންގެ ހުރި ވަރަށް ބޮޑު ކަންބޮޑުވުމެއް ކަމަށާއި އަމާޒަކީ މައްސަލަ ބައްލަވާ އައިއޯ އިން މަދުވެގެން 14 ދުވަހުގެ ތެރޭގައި މައްސަލަ ހުށަހެޅި ފަރާތައް ގުޅާ މައްސަލަ ކުރިއަށްދާ ގޮތުގެ މައުލޫމާތު ފޯރުކޮށްދޭ މިންވަރަށް މަސައްކަތްތައް ބައްޓަންކުރުން ކަމަށެވެ.
ސީޕީ ވިދާޅުވީ މިހާރުވެސް ބައެއް އަތޮޅުތަކުގައި އެގޮތަށް މަސައްކަތްތައް ކުރިއަށްދާ ކަމަށާއި އައިއޯ އިން މިހާރުވެސް ހިއްސާކުރަންޖެހޭ މައުލުމާތުތައް މައްސަލަ ހުށަހަޅާ ފަރާތާ ފުރަތަމަ 24 ގަޑިއިރުގެ ތެރޭގައި ހިއްސާކުރަމުންދާ ކަމަށާއި ނަމަވެސް އޭގެ ފަހުން އެ މައްސަލައިގައި ވާނުވާ ނޭނގޭ މައްސަލައަކީ ތަކުރާރުވާ ކަމެއް ކަމަށެވެ.
ސީޕީ ވިދާޅުވީ އެކަންކަމަށް ހައްލު ހޯދުމަށްޓަކައި ބަދަލުތަކެއް ގެންނަވަން ނިންމަވާފައިވާ ކަމަށާއި މިކަމުގެ ސަބަބުން ފުލުހުންގެ ޚިދުމަތަށް ރައްޔިތުން ކުރާ އިތުބާރު އަނެއްކާވެސް އިތުރުވެގެންދާނެ ކަމަށެވެ.
ފުލުހުންނާއި ރައްޔިތުންނާ އޮންނަ ގުޅުން ވަރުގަދަ ކުރުމަށްޓަކައި ގިނަ މަސައްކަތްތަކެއް ކުރައްވަމުން ގެންދަވާކަން ފާހަގަކުރައްވާ ސީޕީ ވިދާޅުވީ ފުލުހުންނަކީ 24 ގަޑިއިރު ރައްޔިތުންގެ ޚިދުމަތުގައި މަސައްކަތް ކުރަންޖެހޭ ބައެއްކަން ފުލުހުންގެ މަސައްކަތުން ދައްކާދިނުމަކީ މުހިންމު ކަމެއް ކަމަށެވެ.
ފުލުހުންނަކީ އެންމެ އަވަހަށް ރައްޔިތުންނާ ގާތުން ޚިދުމަތް ދޭނެ ބައެއްގެ ގޮތުގައި ހެދުމަށްޓަކައި ކުރި މަސައްކަތްތައް ފާހަގަކުރައްވާ ސީޕީ ވަނީ އަތޮޅު ކައުންސިލްތަކުންނާއި އަދި އާންމު ގިނަ ރައްޔިތުންނާ ފާއިތުވި އެއް އަހަރުގެ ތެރޭގައި ބައްދަލުވި ކަމަށް ވިދާޅުވެފައެވެ.
އެކިއެކި ބައްދަލުވުންތަކުގައި ރައްޔިތުން ފުލުހުންނާ ދޭތެރޭ ދެކޭގޮތް އޮޅުން ފިލުވައިވާފައިވާނެ ކަމަށާއި އެއިން ކޮންމެ ބައްދަލުވުމެއްގައިވެސް އެނގި ހާމަވެގެންދިޔައީ ރައްޔިތުން ފުލުހުންނަށް ކުރާ އިތުބާރު އިންތިހާއަށް އިތުރުވެގެން ގޮސްފައިވާ މިންވަރު ކަމަށް ސީޕީ ވިދާޅުވިއެވެ.
މިކަމުން ހާސިލްވެގެންދިޔަ އެއް ކަމަކީ ކުށްކުރުމުގެ ފުރުސަތު ހަނިވެގެންދިޔަކަން ކަމަށާއި މަސައްކަތުގެ ނަތީޖާ ފެންނަނީ ވަރަށް ފޮނިކޮށް ކަމަށްވެސް ސީޕީ ވިދާޅުވިއެވެ.
