މި ސަރުކާރުގެ ވެރިން ގައުމުތަކަށް ގޮސް ރީތިކޮށް ވާހަކަދެއްކިޔަސް، އެމީހުންނަކީ އެތެރެ ގޯސް، ހަސީލަތް ނުބައި އިތުބާރު ނުކުރެވޭ ބައެއްކަމަށް ގައުމުތަކުން ދެކޭ - ޝާހިދު

މި ސަރުކާރުގެ ވެރިން ގައުމުތަކަށް ގޮސް ރީތިކޮށް ވާހަކަދެއްކިޔަސް، އެމީހުންނަކީ އެތެރެ ގޯސް، ހަސީލަތް ނުބައި އިތުބާރު ނުކުރެވޭ ބައެއްކަމަށް ގައުމުތަކުން ދެކޭ ކަމަށް ކުރީގެ ފޮރިން މިނިސްޓަރު އަބްދުﷲ ޝާހިދު ވިދާޅުވެއްޖެއެވެ.

ޝާހިދު ވިދާޅުވީ ހިތާމައާއެކު ދަންނަވަން ޖެހޭނީ އެއިރު ދައްކަވަމުން ގެންދެވި ވާހަކަ މިއަދު ހަގީގަތަކަށް ވެގެންދިއުން ކަމަށެވެ. އެއިރުވެސް ދަންނަވަމުން ގެންދެވީ މަގުމަތީގައި އިދިކޮޅުގައި ތިއްބަވައިގެންވެސް ހާރިޖީ ސިޔާސަތުގެ ވާހަކަ ދައްކަވަން ޖެހޭނީ ޒިންމާދާރުކަމާއެކުގައި ކަމަށެވެ. ރައީސްކަން ލިބިވަޑައިގެން މޭޒުކޮޅުގައި އިންނަވާއިރު މަންޒަރު ތަފާތުވާނެ ކަމަށާއި، މިއަދު ވެފައި އޮތްގޮތަކީ އެއީ ކަމަށެވެ.

ޝާހިދު ވިދާޅުވީ ޕީޕިއެމްޕީއެންސީގެ މުޅި ފިކުރަކަށް ވެފައިވަނީ ދުނިޔޭގެ ގައުމުތައް، އެއްގައުމު އަނެއްގައުމާއި ތޮޅުވައިގެން، އެދޭތެރޭގައި ވެސް ފިތުނަ އުފައްދައިގެން އޭގެ ތެރެއިން ގޮތްގޮތް ހޯދުން ކަމަށެވެ. ޝާހިދު ވިދާޅުވީ ބޮޑު އެއްގައުމެއްގެ ތާއިދު ހޯއްދަވާނެކަމަށް ހިތާ އެހެންގައުމަކަށް ކުޑައިމީސްކޮށް ބަސްބުނެ ވެރިންނާއި ދިމާލަށް ހިތުހުރި އެއްޗެއް ބުނެ މާލި ހަދައިގެން މަގުތަކަށް ނުކުމެ ހުރިހާ ސަކަރާތެއް ޖެހީމަ އިތުބާރު ގެއްލޭނީ ހުރިހާ ގައުމެއްގެ ކުރިމަތީގައި ކަމަށެވެ.

ކުރީގެ ޑިފެންސް މިނިސްޓަރު މާރިޔާ އަހުމަދު ދީދީ ވިދާޅުވީ ހާރިޖީ ސިޔާސަތަށް ބަލާއިރު، ރާއްޖޭގެ ހާރިޖީ ލަނޑުދަނޑިތަކުގެ އެންމެ ކުރީގައި އޮތީ ގައުމީ ސަލާމަތާއި ސިޔާދަތު ކަމަށެވެ. އަދި މި ދެކަންތައް ހާސިލްކުރުމަށް ގައުމުތަކުގެ ތެރޭގައި ގުޅުން ރަނގަޅުކޮށް، އިތުބާރު ހިފޭގޮތަށް ބޮޑެތި ގައުމުތަކާއި ވާހަކަދައްކައިގެން ސުލްހަ ބަލަހައްޓާ ވާހަކަ ކަމަށެވެ.

އެގޮތަށް ދެން އޮންނަނީ އިގްތިސާދުގެ ވާހަކަ ކަމަށާއި، ދެން އޮންނަނީ ސަރަހައްދީ ގުޅުން ކަމަށެވެ. މިއީ އަލަށް އެކުލަވާލެވުނު ފޮރިން ޕޮލިސީއެއް ނޫން ކަމަށާއި، މިއީ ޒަމާނުއްސުރެ އަމަލުކުރަމުން އަންނަ ގޮތް ކަމަށް މާރިޔާ ވިދާޅުވިއެވެ.

މާރިޔާ ވިދާޅުވީ އިންޑިއާއާއި ދެތެރޭގައި މި ސަރުކާރުން އަމަލުކުރި ގޮތުން ދުނިޔޭގެ އެހެން ގައުމުތަކުން މި ސަރުކާރާއި އޮތް ގުޅުން ހީނަރުވެގެން ދިޔަ ކަމަށެވެ.