ސިޔާސީ ގޮތުން ކިތަންމެ ގެއްލުމެއް ވިޔަސް، ޗާގޮސް މައްސަލައިގައި ފޮނުވި ސިޓީ ވެރިކަމުގައި ހުރެ ސިއްރުކުރީ ޤައުމީ ސިއްރެއް ހާމަ ނުކުރުމުގެ ގޮތުން - ރައީސް ޞާލިހު
މޮރިޝަސްއަށް ޗާގޯސްގެ ސިޔާދަތީ ބާރު ލިބިގެންވާކަމަށް ދިވެހިރާއްޖެއިން ޤަބޫލުކޮށް މޮރިޝަސް އަށް ސިޓީ އެއް ފޮނުއްވި ކަމަށް އިދިކޮޅު ފަރާތްތަކުން އައީ ބުނަމުން
ކުރީގެ ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހް
ސިޔާސީ ގޮތުން ކިތަންމެ ގެއްލުމެއް ވިޔަސް، ޗާގޮސް މައްސަލައިގައި މޮރިޝަސްގެ ބޮޑުވަޒީރަށް ފޮނުއްވި ސިޓީ ސިއްރުކުރީ ޤައުމީ ސިއްރެއް ހާމަ ނުކުރުމުގެ ގޮތުން ކަމަށް ކުރީގެ ރައީސް އިބްރާހިމް މުހައްމަދު ޞާލިހު ވިދާޅުވެއްޖެއެވެ.
އެ މަނިކުފާނު އެފަދައިން ވިދާޅުވީ ރާއްޖެޓީވީގެ ފަށާއިރު ޕްރޮގްރާމްގައި ވާހަކަދައްކަވަމުންނެވެ.
ރާއްޖެއާއި މޮރިޝަސްގެ ކަނޑުގެ ސަރަހައްދުން ފުށުއަރާ ސަރަހައްދުގެ އިން ވަކިކުރުމުގެ މައްސަލައިގައި މޮރިޝަސްއަށް ޗާގޯސްގެ ސިޔާދަތީ ބާރު ލިބިގެންވާކަމަށް ދިވެހިރާއްޖެއިން ޤަބޫލުކޮށް، މޮރިޝަސްގެ ބޮޑުވަޒީރަށް ރާއްޖޭގެ ރައީސުލްޖުމްހޫރިއްޔާ ސިޓީއެއް ފޮނުއްވާފައިވާ ކަމަށް ބުނެ އެ ސިޓީ ހާމަ ކުރުމަށް އޭރުގެ އިދިކޮޅު ފަރާތްތަކުން އައީ ގޮވަމުންނެވެ. އަދި އެ ސިޓީގައި ޤައުމީ ސަލާމަތަށް ނުރައްކާވާ ވާހަކަތަކެއް ހުރިކަމަށް ވެސް އައީ ބުނަމުންނެވެ. ފަހުން އެ ސިޓީގެ ހަގީގަތް ހާމަވި ނަމަވެސް ރިޔާސީ އިންތިޚާބުގެ ދުވަސްވަރު އިދިކޮޅު ފަރާތްތަކުން އެ ސިޓީ ބޭނުން ކުރީ ވަރަށް ބޮޑު ސިޔާސީ ހަތިޔާރެއްގެ ގޮތުގައެވެ. އެގޮތުން އެ ސިޓީގައި ހަނގުރާމައަކަށް މަގުފަހިވެދާނެ ވާހަކަތައް ރައީސް ޞާލިހު މޮރިޝަސްއަށް ފޮނުވި ސިޓީގައި ހުރިކަމަށް އޭރު ދޮގު ތުހުމަތުތައް ކުރައްވާފައިވެއެވެ. އަދި ފޯޅަވައްސާއި ދިމާއިން އޮންނަ ރާއްޖޭގެ ކަނޑުގެ ސަރަހައްދުގެ މައްސަލަ އިޓްލޮސްއިން ބަލަމުން ދަނިކޮށް ރައީސް އިބްރާހިމް މުހައްމަދު ޞާލިހު މޮރިޝަސްގެ ބޮޑުވަޒީރަށް ފޮނުވި ސިޓީ ހޯދަން އިއިދކޮޅު ޕީޕީއެމް ޕީއެންސީ ކޯލިޝަނުން ރައީސް އޮފީހަށް ގޮސް އެ ސިޓީގައި ގައުމީ ސަލާމަތަށް ނުރައްކާވާ ވާހަކަތައް ހުރިކަމަށް ވެސް ތުހުމަތުކުރިއެވެ.
އޭރު އެ ސިޓީ އާއި ގުޅޭ ވާހަކަ އެކި ގޮތްގޮތަށް އިދިކޮޅު ފަރާތްތަކުން ދެއްކުމުގެ ސަބަބުން ސިޔާސީގޮތުން ވަރަށް ބޮޑެތި ގެއްލުންތަކެއް ލިބިވަޑައިގެންފައިވާ ކަމަށް އެ މަނިކުފާނު ވަނީ ވިދާޅުވެފައެވެ. އެހެންނަމަވެސް ކިތަންމެ ބޮޑު ގެއްލުމެއް ވީ ނަމަވެސް، އެ ސިޓީ ހާމަ ނުކުރެއްވީ އެއީ ދައުލަތުގެ ސިއްރެއް ކަމަށްވާތީ ކަމަށާއި އެފަދަ ސިއްރުތައް ހާމަކުރަން ފަށައިފި ނަމަ ދައުލަތުގެ ސިއްރެއް ނޮއޮންނާނެ ކަމަށް ދެކެވަޑައިގަންނަވާތީ ކަމަށް މަނިކުފާނު ވިދާޅުވިއެވެ. ސޯޝަލް މީޑިއާގައި ދައުރުވެފައިވާ ސިޓީ އަކީ ސައްހަ ސިޓީ އެއްކަން މި ސަރުކާރުން ވެސް ހާމަ ކުރައްވާފައިވާ އިރު އޭގައި ދައުލަތަށް ގެއްލުންވާ ފަދަ އެއްވެސް ކަމެއް ނެތްކަން މިހާރު ހާމަވާނެ ކަމަށް އެ މަނިކުފާނު ވިދާޅުވިއެވެ. އެ މަނިކުފާނު ވަނީ އެ ސިޓީގެ ސަބަބުން އިޓްލޮސްގައި ކުރިއަށް ދިޔަ މައްސަލައިގެ ސްޓޭންޑަށް ބަދަލު ނާންނާނެ ކަމަށް ވެސް ސާފުކޮށް ބަޔާންކޮށްފައިވާނެ ކަމަށް ވިދާޅުވެފައެވެ.
ދިވެހިރާއްޖޭގެ ޚާއްސަ އިޤްތިޞާދީ ކަނޑުގެ ސަރަޙައްދާއި ޗާގޯސްގެ ކަނޑުގެ ސަރަޙައްދާއި ފުށުއެރުންތަކެއް ހުރިކަމަށްބުނެ އިންޓަރނޭޝަނަލް ޓްރައިބިއުނަލަށް މޮރިޝަސްގެ ފަރާތުން ދިވެހިރާއްޖެއާ ދެކޮޅަށް މައްސަލައެއް ހުށަހަޅައިގެން ކުރިއަށްދަނިކޮށް، މޮރިޝަސްއަށް ޗާގޯސްގެ ސިޔާދަތީ ބާރު ލިބިގެންވާކަމަށް ދިވެހިރާއްޖެއިން ޤަބޫލުކޮށް، މޮރިޝަސްގެ ބޮޑުވަޒީރަށް ރާއްޖޭގެ ރައީސުލްޖުމްހޫރިއްޔާ ސިޓީއެއް ފޮނުއްވާފައިވާކަމަށް، ދިވެހިރާއްޖޭގެ ބަންޑާރަނައިބު އިންޓަރނޭޝަނަލް ޓްރައިބިއުނަލްގައި ވިދާޅުވެފައިވާ ކަމަށް ބުނެ ރިޔާސީ އިންތިޚާބުގެ ދުވަސްވަރު ވަނީ ވަރަށް ބޮޑަށް އަޑު ފަތުރާފައެވެ. އަދި އެ ސިޓީގެ ސަބަބުން ރާއްޖޭގެ ކަނޑުން ބައެއް ގެއްލުނު ކަމަށް ބުނެ އޭރުގެ އިދިކޮޅު ފަރާތްތަކުން އައީ އޭރުގެ ސަރުކާރަށް ވަރަށް ބޮޑަށް ފާޑުކިޔަމުންނެވެ. އަދި ރައީސް ޞާލިހުގެ ސަރުކާރުން ރާއްޖޭގެ ކަނޑު ވިއްކާލިކަމަށް ބުނެ އެ މަނިކުފާނުގެ އިސްތިޢުފާއަށް ގޮވުމުގެ އިތުރުން އެކަމާއި ގުޅިގެން ތަފާތު އެކި އެއްވުންތަކާއި މުޒާހަރާތައް ވެސް އޭރުގެ އިދިކޮޅު ފަރާތްތަކުން ވަނީ ބާއްވާފައެވެ.
ރާއްޖެއާއި މޮރިޝަސްގެ ކަނޑުގެ ސަރަހައްދުން ފުށުއަރާ ސަރަހައްދުގެ އިން ވަކިކުރުމުގެ މައްސަލާގައި އިޓްލޮސްއިން ގޮތް ނިންމަވާފައިވަނީ ރާއްޖޭން ފާހަގަކުރި ނުކުތާތަކަށް ތާއީދުކޮށް، ރާއްޖެއަށް ފައިދާވާގޮތަށެވެ. އަދި މި ނިންމުމާ ގުޅިގެން، ފުށުއަރާ ސަރަހައްދުން ރާއްޖެއަށް 47232 އަކަކިލޯމީޓަރުގެ ސަރަހައްދެއް ވަނީ ލިބިފައެވެ. އެހެންކަމުން އެ ނިންމުމާއެކު، ރާއްޖެއަކީ ބައިނަލްއަގުވާމީ ހަމަތަކާއި މިންގަނޑުތަކާ އެއްގޮތަށް އިންވަކިކުރެވިފައިވާ، ފުރިހަމަ ގައުމަކަށް ވަނީ ބަދަލުވެފައެވެ.
