ނިމިދިޔަ ބުރާސްފަތި ދުވަހެވެ. ފެނިގެން އެދިޔައީ ނިކަން ބަލަން ހުތުރު މަންޒަރެކެވެ. ނޫސްތަކާއި ޓީވީ ތަކާއި، ނޫސްވެރިން ޖޫރިމަނާ ކުރެވޭ ގޮތަށް ގާނޫނެއް ހަދަން ސަރުކާރުގެ ފަރާތުން، ހުށަހެޅި ބިލުގެ މައްސަލައިގައި ކަންބޮޑުވުން އޮތުމާއެކު ހުށަހެޅި ކުއްލި މައްސަލަ އެޖެންޑާކުރަން ދެކޮޅު ހަދައި މަޖިލީހުގައި އޮތް ބޮޑު މެޖޯރިޓީ ބޭނުންކޮށްގެން އެ މައްސަލަ ބޭރުކޮށްލެއްވީއެވެ. ވީގޮތެއް ނޫސްވެރިއެއްގެ ހައިސިއްޔަތުން އަޅުގަނޑުވެސް ބަލާލަން ބޭނުންވާނެތާއެވެ. ގަލޮޅު ދެކުނު ދާއިރާގެ މެމްބަރު މީކާއިލް އަހުމަދު ނަސީމް ހުށަހަޅުއްވަން އުޅުއްވި ކުއްލި މައްސަލައާ މެދު ގޮތެއް ނިންމަވަމުން މަޖިލީހުގެ ރައީސް އަބްދުއްރަހީމް އަބްދުﷲ ވިދާޅުވީ، މަޖިލީހުގެ ގަވައިދުގެ 197 ވަނަ މާއްދާގެ އ އަދި މ ގައިވާ ޝަރުތުތައް ފުރިހަމަ ނުވާ ކަމަށެވެ. ނަމަވެސް ކޮން ޝަރުތެއް ކަމެއް އެމަނިކުފާނަކަށް ވިދާޅެއް ނުވެއެވެ.

ދެން މައްސަލައެއް ނެތްތާއެވެ. އެކަމަކު ހައިރާންވެ އަންތަރީސްވީ ހިސާބަކީ އަބްދުއްރަހީމްގެ އެ ވާހަކަ އާއިއެކު ސަރުކާރު މެންބަރުން ވަނީ އެކަމާއި އުފާކުރައްވާ އަތްތިލަބަޑި ޖެހި މަންޒަރު ފެނުނު ހިސާބުންނެވެ. 'މޯލްޑިވްސް މީޑިއާ އެންޑް ބްރޯޑްކާސްޓިން ކޮމިޝަންގެ ގާނޫނު' ގެ ނަމުގައި އާ ގާނޫނެއް އުފައްދަން ހުށަހެޅުއްވީ ސަރުކާރުގެ ފަރާތުން ތުޅާދޫ ދާއިރާގެ މެންބަރު އަބްދުﷲ ހަންނާން އަބޫބަކުރެވެ. ބިލު އެއްކޮޅުން އަނެއްކޮޅަސް ކިޔާލީމަ ސަހަރޯ ކަމަކު ދާކަށް ނެތެވެ. ނޫސްވެރިކަން ކުރުމާއި، މުއާސަލާތީ ވަސީލަތްތައް ބޭނުންކޮށްގެން، ހަބަރާއި، މައުލޫމަތާއި، ފެންނަ ގޮތްތައް ފާޅުކުރުން މިއޮތީ ނިކަން ބޮޑު ކުށަކަށް ވެފައެވެ. އަދި ހިޔާލުތައް ފާޅުކުރުމާއި، ޝާޢިއުކުރުމާއި، މިނިވަންކަމާއެކު ފިކުރުކުރުމާއި، އިސްލާމްދީނުގެ އަސްލަކާ ހިލާފުނުވާ ގޮތެއްގެ މަތިން އެމީހެއްގެ ބުއްދިއަށް ފެންނަ ގޮތްތައް ހާމަކުރުން ވެސް ކުށްވެެރިވާކަމަކަށް ވާ ކަހަލައެވެ. ހަމައެހެންމެ ހިޔާލުތައް ދުލާއި ގަލަމުން ފާޅުކުރުމުގެ މިނިވަންކަމަކީ، ގާނޫނު އަސާސީން ކަށަވަރުކޮށްދީފައިވާ އަސާސީ ހައްގެއްކަން ހަޖަމުކުރަން މިވެރިންނަށް އުނދަނގޫކަން ބިލަށް ބަލާލުމުން ވެސް އެނގެެވެ.

ބިލުގެ ދަށުން، ބޮޑެތި އަދަދުތަކުން ނޫސްވެރިންނާއި މީޑިއާތައް ޖޫރިމަނާކޮށް، ނޫސްތަކާއި މީޑިއާތައް ބަންދުކޮށްލުމުގެ ފުރިހަމަ ބާރު ސަރުކާރަށް ލިބިގެންދާނެއެވެ. އަދި މި ބިލުގެ ސަބަބުން، ގާނޫނު އަސާސީން ރައްޔިތުންނަށް ކަށަވަރުކޮށްދޭ މަދަނީ އަދި ސިޔާސީ ހައްގުތައް ހަނިވެ، ރައްޔިތުންގެ މިނިވަންކަމަަށް އުނިކަން ލިބިދާނެ ކަމަށެވެ. އެހެންވީމަ ލައްކަ ރަނގަޅަށް މިނިވަންކަން ދީފިތާއެވެ. ނޫސްވެރިންގެ ގުންޒަރުން ފެށި މި ސަރުކާރުން އަހަރު ފުރެންވާއިރަށް ނޫސްވެރިންނަށް ދިނީ ނިކަން ތާހިރު ހަދިޔާއެއްތާއެވެ.

މިކަހަލަ ކިތަންމެ ކިތަންމެ ކަމެކެވެ. މިނިވަން މުއައްސަސާތަކުގެ ވެރިން އައްޔަންކުރުމުގެ ބާރުވެސް އަތްޕުޅަށް ނަންގަވަނީއެވެ. މެންޑޭޓުތައް ހަނިކޮށް ބާރުތައް ސީދާ ސަރުކާރަށް ނަގަނީއެވެ. ރިސޯޓްތަކުގެ މީހުންނަށް ޑޮލަރު މާރުކުރަން މަޖުބޫރުވާގޮތަށް ވިޔަފާރީގެ މިނިވަންކަމަށް ވެސް އަރައިގަތުން ފަދަ އެތައް ކަމެކެވެ. ހައްގުތައް ހަނިކޮށް، ގޮށްމުށަށް ލާއިރު ރައްޔިތުންގެ މެމްބަރުން ތިބީ އަތްޖަހާށެވެ. ދެންވެސް ކިޔަންވީ ރައްޔިތުންގެ މެމްބަރުންނޭތޯއެވެ؟