މިސްކިތްތަކުގައި ވަކިން ޖަމާއަތް ހަދައިގެން ނަމާދު ކުރާ ފަރާތްތަކުގެ މައުލޫމާތު މިނިސްޓްރީ އަށް އަންގަން ޖެހޭ ގޮތައް އިމާމުންނާއި މުދިމުންނަށް ލާޒިމު ކޮށްފިއެވެ.
މިކަން ހިމެނޭ ގޮތައް މިނިސްޓްރީ އޮފް އިސްލާމިކް އެފެއާރޒުން ވަނީ "އިމާމުންނާއި މުދިމުންގެ ސުލޫކީ މިންގަނޑު ބަހައްޓަންވީ ގޮތުގެ އުސޫލު" ގެ ނަމުގައި އިމާމުންނާއި މުދިމުންގެ ކަންކަން ކޮންޓްރޯލު ކުރުމަށް ގިނަ ކަންތައްތަކެއް ހިމެނޭ ގޮތައް 14 މައިގަނޑު ސުރުޚީގެ ދަށުން އުސޫލެއް އެކުލަވާލާ ބުރާސްފަތި ދުވަހު އިއުލާނު ކޮށްފައެވެ.
މި އުސޫލުގައި ބުނެފައިވަނީ، އިސްލާމިކް މިނިސްޓްރީ އަށް އެނގިގެން ނޫނީ ދީނީ އެއްވެސް ޕްރޮގްރާމެއް މިސްކިތްތަކުގައ ނުހިންގުމަށާއި، އެފަދަ ޕްރޮގްރާމެއްގައި ބައިވެރި ނުވުމަށާއި، ހުއްދަ ނެތި އެފަދަ ކަމެއް ކުރާނަމަ އެކަން ކަމާބެހޭ ފަރާތްތަކަށް އިމާމުންނަށާއި މުދިމުން އަންގަން ޖެހޭނެ ކަމަށެވެ.
ސުންނަތް ޖަމާއަތް ނޫން އެހެން މަޒުހަބެއް ރާއްޖެއަށް ތައާރުފް ކުރުމަށް މަގުފަހިވާ ކަންކަން ނުކުރުމަށާއި އެފަދަ ކަމެއް ހިނގާނަމަ މިނިސްޓްރީއަށް އެންގުމަށްވެސް އިމާމުންނާއި މުދިމުންނަށް ވަނީ އަންގާފައެވެ.
މިސްކިތައް ނަމާދަށް އަންނަ ފަރާތްތަކުން މާލީ މަންފާ އާއި އެނޫންވެސް އެހީ ހޯދުން ވަނީ މުދިމުންނާއި އިމާމުންނަށް މަނާ ކޮށްފައެވެ.
ހުއްދަ ދީގެން ނޫނީ ގުރުއާން ކުލާސްތަކާއި ތަފާތު މާއްދާތައް ކިޔަވައިދިނުމަށް މިސްކިތް ބޭނުން ނުކުރެވޭނެ ކަމަށްވެސް ވަނީ މި އުސޫލުގައި ކަނޑައަޅާފައެވެ.
އަލަށް ގެޒެޓް ކުރި އުސޫލުގައި އިމާމުންނާއި މުދިމުން ސޯޝަލް މީޑިއާގައި ބައިވެރިވުމާއި ހަރަކާތްތެރިވުން ވެސް ވަނީ ކޮންޓްރޯލު ކޮށްފައެވެ. މިގޮތުން، "ރައްޔިތުންނަށް އޮޅޭ ފަދަ ގޮތަކަށް ދީނާ ގުޅުން ހުރި ވާހަކަތައް ނުވަތަ މުޖުތަމައުގެ އާންމު މަސްލަހަތު ގެއްލޭ ފަދަ އަމަލުތަކާއި ވާހަކަތައް މީސް މީޑިއާގައި އެކި ވަސީލަތްތައް ބޭނުން ކޮށްގެން ނުވަތަ އެނޫންވެސް ގޮތަކަށް ލިޔެ ޝާއިއު ކުރުމާއި، އާންމު ނުކުރެވޭނެ" ކަމަށާއި، އަދި އެފަދަ އަމަލުތަކުގައި ބައިވެރި ނުވޭނެ ކަމަށް ވަނީ ބުނެފައެވެ.
މީގެ އިތުރުން ދީނާއި ގައުމުގެ އެންމެ މަތީ މަސްލަހަތުތަކަށް ރައްކައުތެރިވެ، މަސްލަހަތު ގެއްލިދާނެ ފަދަ އެންމެހާ ކަންކަމުން އިމާމުންނާއި މުދިމުން ދުރުހެލިވާން ޖެހޭނެ ކަމަށްވެސް ވަނީ ބުނެފައެވެ.
އިސްލާމިކް މިނިސްޓްރީން އިމާމުންނާއި މުދިމުންނަށް އަމަލު ކުރަން ލާޒިމު ކޮށްފައިވާ މި އުސޫލުގައި އިމާމުވެ ނަމާދު ކުރާއިރު ޖިންސާ ޓީޝާޓް ފަދަ ތަކެއްޗާއި، ގަޔަށް ބާރު ހެދުން ލައިގެން ނަމާދު ނުކުރެވޭނެ ކަމަށްވެސް ވަނީ ބުނެފައެވެ.
މި އުސޫލުގެ ދަށުން މިސްކިތުގައި ބެހެއްޓޭނީ މިނިސްޓްރީން ހުއްދަ ދީފައިވާ މުސްހަފް އެކަނި ކަމަށާއި، އޭގެ އިތުރުން ހުއްދަ ނެތް ފޮތްތަކާއި، ސީޑީ ކެސެޓް ރޯލު ފަދަ ތަކެތިވެސް ނުބެހެއްޓުމަށް އިމާމުންނާއި މުދިމުންނަށް ވަނީ އަންގާފަފައެވެ.
އުސޫލުތަކާ ޚިލާފުވާ ފަރާތްތަކަށް ފިޔަވަޅު އަޅާނެ ކަމަށްވެސް މިނިސްޓްރީން ވަނީ ބުނެފައެވެ.
އެއްމިސްކިތުން އަނެއް މިސްކިތައް ބަދަލު ކުރުމާއި، އިމާމުވެ ނަމާދު ކުރުމުން އެކަހެރި ކުރުމަކީ މިނިސްޓްރީ އަށް ލިބިގެންވާ އިޚްތިޔާރެއް ކަމަށްވެސް ބުނެފައިވެއެވެ.
މިކަންކަމުގެ އިތުރުން މިނިސްޓްރީން އެކުލަވާލާފައިވާ ގަވައިދުތަކަށާއި، އުސޫލުތަކަށާއި، މިނިސްޓްރީން އަންގާ އެންގުންތަކަށާއި ނިންމާ ނިންމުންތަކަށް ފުރިހަމަ އަށް އަމަލު ކުރަން ޖެހޭނެ ކަމަށްވެސް އިމާމުންނާއި މުދިމުންނަށް ވަނީ އަންގާފައެވެ.
މިނިސްޓްރީން ބުނެފައިވަނީ މިއީ ރާއްޖޭގެ ހުރިހާ މިސްކިތްތަކުގެ އިމާމުންނާއި މުދިމުން "އަމަލު ކުރުން ލާޒިމު" އުސޫލުތަކެއް ކަމަށެވެ.
