ހިޔާ ޓަވަރުގައި މީހަކު ރަހީނުކުރީ މަސްތުވާތަކެތީގެ ވިޔަފާރީގެ ދެބަސްވުމެއްގައި - ފުލުހުން
ހައްޔަރުކުރި މީހުންގެ ތެރޭގައި ފުލެޓުގެ ވެރިމީހާ ހިމެނޭ
ހިޔާ ޓަވަރުގައި މީހަކު ރަހީނުކުރި މައްސަލާގައި ހައްޔަރުކުރި މީހުން
ހިޔާ ޓަވަރުގައި މީހަކު ރަހީނުކުރީ މަސްތުވާތަކެތީގެ ވިޔަފާރީގެ ދެބަސްވުމަކާއި ގުޅިގެން ކަމަށް ފުލުހުން ބުނެފިއެވެ.
12 މީހުންގެ ގްރޫޕަކުން ހުޅުމާލޭ ހިޔާ ޓަވަރުގައި ރަހީނު ކުރި މީހަކު ފުލުހުން ސަލާމަތްކޮށްފައިވަނީ 7 ވަނަ ދުވަހުއެވެ. ފުލުހުން މައުލޫމާތު ދޭ ގޮތުގައި ރަހީނު ކުރި މީހާ ސަލާމަތްކުރި އިރު އެމީހާގެ ބޯ ބާލާފައިވާ ކަމަށާއި އަދި ސީނަށް ފުލުހުން ދިޔައިރު އޭނާގެ އިނގިލިތައް ބުރިކޮށްލުމަށް 12 މީހުންގެ ގޭންގުން ދިޔައީ ތައްޔާރުވަމުން ކަމަށެވެ. މީގެއިތުރުން އެހެން ޖިސްމާނީ އަނިޔާއެއް ރަހީނުކޮށްފައި ހުރި މީހާއަށް ލިބިފައިވާ ކަން ފާހަގަނުވާ ކަމަށް ފުލުހުން ބުނެއެވެ.
ފުލުހުން ބޭއްވި ނޫސްވެރިންގެ ބައްދަލުވުމުގައި މިކަމާއި ގުޅޭގޮތުން އެސިސްޓަންޓް ކޮމިޝަނަރ އޮފް ޕޮލިސް މުޙައްމަދު ދާއޫދު ވިދާޅުވީ، ރަހީނުކޮށް ބޯބާލާފައި ހުރި މީހާއާއި، ރަހީނުކުރުމުގައި ބައިވެރިވި 12 މީހުންނާއި ގުޅުން އޮތްކަމަށް ތަހުގީގަށް ފާހަގަކުރެވޭ ކަމަށެވެ. އަދި އެއީ މަސްތުވާތަކެތީގެ ވިޔަފާރިއާއި ގުޅޭ ގުޅުންތަކެއް ކަމަށް އޭނާ ވިދާޅުވިއެވެ.
ދާއޫދު ވިދާޅުވީ ތަހުގީގުން އައިޑެންޓިފައިވާގޮތުގައި ބޮޑަށް ބެލެވެނީ މަސްތުވާތަކެތީގެ ވިޔަފާރިކުރުމުގެ ތެރޭގައި އުފެދުނު ދެބަސްވުމުގެ ތެރެއިން އެމީހާ ރަހީނުކޮށް އަނިޔާ ދީފައިވާ ކަމަށެވެ.
މީހާ ރަހީނުކޮށްފައިވާ ފުލެޓަކީ މީގެ ކުރިންވެސް މަސްތުވާތަކެތީގެ މައްސަލަތަކުގައި ބަލާ ފާސްކޮށްފައިވާ ތަނެކެވެ. މީގެ އިތުރުން މި މައްސަލައިގައި ފުލެޓުގެ ވެރި މީހާ ވެސް ބައިވެރިވެފައިވާ ކަމަށް ފުލުހުން ބުނެފައިވެއެވެ.
ސީރިއަސް އެންޑް ހައި އިމްޕެކްޓް ކްރައިމް ޔުނިޓުގެ އިނިސްޕެކްޓަރު އަލީ އިސްމާއިލް ވިދާޅުވީ ހިޔާ ފުލެޓުގެ އެޕާޓްމަންޓަށް ފުލުހުން ވަތް އިރު 12 މީހުން ތިބި ކަމަށެވެ. އަދި އެ މީހުން ތިބީ މަސްތުގެ ހާލަތުގައި ކަމަށް ބެލެވިގެން އެ މީހުންގެ ކުޑަކަމުދާތަކެތި ޓެސްޓް ކުރުމަށް ސާމްޕަލް ނެގުމަށް އެދުމުން، އެކަމަށް ހުއްދަ ދިނީ އެންމެ މީހެކެވެ. އަދި އެމީހަކީ ފުލެޓުގެ ވެރިފަރާތް ކަމަަށެވެ. އެއީ ލ. މާވަށް، ޖަމީލާ މަންޒިލް، އާދަމް ހުސެއިންއެވެ. އަލީ ވިދާޅުވީ އޭނާ މަސްތުވާތަކެއްޗަށް ޕޮޒިޓިވް ކަމަށެވެ.
ހިޔާ ޓަވަރުގައި މީހަކު ރަހީނުކޮށްފައި ހުރީ ހިޔާ 9ވަނަ ޓަވަރުގެ 20 ވަނަ ފަންގިފިލާގެ 11 ވަނަ އެޕާޓްމަންޓްގައެވެ. މިމައްސަލާގައި ހައްޔރުކުރި 12 މީހުންގެ ބަންދަށް ވަނީ މުއްދަތު ޖަހާފައެވެ.
މި ހާދިސާގެ ރިޕޯޓު ލިބިފައިވަނީ 7 ނޮވެންބަރު 2024 ވީ ބުރާސްފަތި ދުވަހުގެ ރޭ 19:40 ހާއިރެއެވެ. މައުލޫމާތު ލިބިފައިވާ ގޮތުގައި ރަހީނުކޮށްފައިވަނީ 31 އަހަރުގެ ފިރިހެނެކެވެ. އެމީހާ ހުރީ ހިޔާ ޓަވަރުގެ 20 ވަނަ ފަންގިފިލާގައި ކަން އެނގުމުން ކޯޓު އަމުރެއްގެ ދަށުން އެ އެޕާޓްމަންޓްގެ ދޮރު ވައްޓާލައިގެން ފުލުހުން އެތަނަށް ވަދެ އެމީހާ ވަނީ ސަލާމަތްކޮށްފައެވެ. ފުލުހުން މައުލޫމާތު ދޭ ގޮތުގައި ރަހީނު ކުރި މީހާ ސަލާމަތްކުރި އިރު އެމީހާގެ ބޯ ބާލާފައިވާ ކަމަށާއި އަދި ސީނަށް ފުލުހުން ދިޔައިރު އޭނާގެ އިނގިލިތައް ބުރިކޮށްލުމަށް 12 މީހުންގެ ގޭންގުން ދިޔައީ ތައްޔާރުވަމުން ކަމަށެވެ. މީގެއިތުރުން އެހެން ޖިސްމާނީ އަނިޔާއެއް ރަހީނުކޮށްފައި ހުރި މީހާއަށް ލިބިފައިވާ ކަން ފާހަގަނުވާ ކަމަށް ފުލުހުން ބުނެއެވެ.
ހޮނިހިރު ދުވަހު ފުލުހުން ބުނީ މި މައްސަލައިގައި 12 މީހަކު ހައްޔަރު ކޮށްފައިވާ ކަމަށެވެ. އަދި އެމީހުންގެ ބަންދާމެދު ގޮތެއް ނިންމުމަށް ކްރިމިނަލް ކޯޓަށް ހާޒިރު ކުރުމުން އޭގެ ތެރެއިން 5 މީހަކު 5 ދުވަހަށް ބަންދު ކުރުމަށް އަމުރުކޮށްފައިވާ ކަމަށާއި، ބާކީ ތިބި 7 މީހުން 7 ދުވަހަށް ބަންދު ކުރުމަށް އަމުރުކޮށްފައިވާ ކަމަށެވެ.
މި މައްސަލައިގައި އަދި އިތުރު ބަޔަކު ބައިވެރިވެފައިވޭތޯ އާއި މައްސަލައިގެ ތަހުގީގު ކުރިއަށް ދާކަމަށް ފުލުހުން ބުނެފައިވެއެވެ.
