ހައުސިންގ ލޯނު ސްކީމަށް މަސްވެރިންނަށް ހުށަހެޅޭނެ: މިނިސްޓަރު ހައިދަރު
ކުރިއަށްއޮތް ތަނުގައި އެހެން ދާއިރާތަކަށް ވެސް މި ފުރުސަތު ހުޅުވާލާނެ
ބުރާސްފަތި ދުވަހު ހައުސިން މިނިސްޓްރީގައި ބޭއްވި ނޫސްވެރިންގެ ބައްދަލުވުމެއްގެ ތެރެއިން
ސަރުކާރުގެ ހައުސިންގ ލޯނު ސްކީމަށް މަސްވެރިންނަށް ހުށަހެޅޭނެ ކަމަށް ހައުސިން މިނިސްޓަރު ޑރ.އަލީ ހައިދަރު ވިދާޅުވެއްޖެއެވެ.
ބުރާސްފަތި ދުވަހު ހައުސިން މިނިސްޓްރީގައި ބޭއްވި ނޫސްވެރިންގެ ބައްދަލުވުމެއްގައި މިނިސްޓަރު ހައިދަރު ވިދާޅުވީ ހައުސިން ލޯން ސްކީމަށް ހުރިހާ ދާއިރާތަކެއްގައި މަސައްކަތް މީހުންނަށް ފުރުސަތު ހުޅުވާލަން ބޭނުންވާ ކަމަށާއި، އިގްތިސާދީ ހުރިހާ މަސައްކަތްތަކެއް ކުރާ ފަރާތްތަކަށް ފުރުސަތު ހޯދައިދިނުމަށް މަސައްކަތްތައް ކުރަމުންދާ ކަމަށެވެ.
އެގޮތުން މަސްވެރިކަމުގެ ދާއިރާ، ފަތުރުވެރިކަމުގެ ދާއިރާ އަދި ދަނޑުވެރިކަމުގެ ދާއިރާގައި މަސައްކަތް ކުރާ މީހުންނަށް ބައިވެރިވެވޭ ގޮތަށް އުސޫލު ކަނޑައެޅުމުގެ މަސައްކަތް ކުރަމުންދާ ކަމަށް މިނިސްޓަރު ހައިދަރު ވިދާޅުވިއެވެ. އަދި ވިދާޅުވީ މިހާރު މަސްވެރިކަމުގެ ދަފްތަރުގައި ހިމެނޭ މީހުންނަށް ހައުސިން ލޯނު ސްކީމަށް ހުށަހަޅޭނެ ކަމަށެވެ. އަދި ވިދާޅުވީ ކުރިއަށްއޮތް ތަނުގައި އެހެން ދާއިރާތަކަށް ވެސް މި ފުރުސަތު ހުޅުވާލާނެ ކަމަށެވެ.
މިމަސައްކަތްތަކާއި ގުޅޭގޮތުން އިތުރަށް ފިޝަރީޒް މިނިސްޓަރު އަހުމަދު ޝިޔާމް ވިދާޅުވީ މަސްވެރިންނަކީ ދައުލަތް ދަންނަ ބަޔަކަށް ހެދުމަކީ މިސަރުކާރުގެ ވަރަށް ބޮޑު އަމާޒެއް ކަމަށާއި، އެންމެ ފުރަތަމަ ދުވަހުން ފެށިގެން ވެސް އެގޮތަށް މަސައްކަތް ކުރަމުންދާ ކަމަށެވެ. އަދި ވިދާޅުވީ މަސްވެރިންނަށް އިޖްތިމާއީ ރައްކާތެރިކަން ކަށަވަރުކޮށްދޭން ޖެހޭ ކަމަށާއި، ގެދޮރުވެރިކަމަކީ އިޖްތިމާއީ ވަރަށް ބޮޑު ހައްގެއް ކަމަށެވެ.
މަސްވެރިންގެ ދަފްތަރުގައި މިހާތަނަށް 80 އިންސައްތައަށްވުރެ ގިނަ އުޅަނދު ރަޖިސްޓްރީވެފައިވާކަން ފާހަގަކުރައްވައި މިނިސްޓަރު ޝިޔާމް ވިދާޅުވީ އަމާޒަކީ މި އަހަރު ނިމުމުގެ ކުރިން މި ދަފްތަރުގެ މަސައްކަތް ނިންމާލުން ކަމަށެވެ. މިނިސްޓަރު ޝިޔާމް ވިދާޅުވީ އޮކްޓޫބަރު މަހުގެ ނިޔަލަށް 350 އުޅަނދުގައި ދެހާސްއެއްސަތޭކައަށް ވުރެ ގިނަ ފަޅުވެރިން ރަޖިސްޓްރީވެފައިވާ ކަމަށެވެ. އަދި ސަރުކާރުގެ ހައުސިންގ ލޯނު ސްކީމަށް މަސްވެރިންނަށް ހުށަހެޅޭއިރު، މަސްވެރިންގެ ކަންބޮޑުވުންތަކަށް ވަރަށް ބޮޑު ހައްލެއް ލިބޭނެ ކަމަށް މިނިސްޓަރު ޝިޔާމް ވިދާޅުވިއެވެ.
