ނިސްޓަލްރޫއި ޔުނައިޓެޑު ދޫކޮށްލައިފި

މެންޗެސްޓަރ ޔުނައިޓެޑުގެ އެސިސްޓެންޓު ކޯޗުކަމުގެ މަގާމުން، ރޫޑް ވެން ނިސްޓަލްރޫއި ވަކިވެއްޖެ އެވެ.

އެ މަގާމުން ނިސްޓަލްރޫއި ވަކިވެފައިވާކަން ޔުނައިޓެޑުން ވަނީ ހާމަކޮށްފަ އެވެ. ޔުނައިޓެޑުގެ އެސިސްޓެންޓު ކޯޗުކަމުގެ މަގާމުން ނިސްޓަލްރޫއި ވަކިވެފައި ވަނީ، އެ ކުލަބުގެ ކޯޗުކަމާ ޕޯޗުގަލްގެ ރުބެން އަމޯރިމް ހަވާލުވުމާ އެކު އެވެ. އަމޯރިމް ބޭނުން ވަނީ ޔުނައިޓެޑުގައި އޭނާގެ ކޯޗިން އޮފިޝަލުންނާ އެކު މަސައްކަތް ކުރުމަށެވެ.

ޔުނައިޓެޑުގެ ދާއިމީ ކޯޗުކަމުގެ މަގާމުން ނެދަލެންޑްސްގެ އެރިކް ޓެން ހާގް ވަކި ކުރި ފަހުން، ވަގުތީ ގޮތުން އެ ޓީމަށް އިރުޝާދު ދެމުން އައީ ނިސްޓަލްރޫއި އެވެ. އޭނާގެ އިރުޝާދުގެ ދަށުން ޔުނައިޓެޑު ވަނީ ހަތަރު މެޗު ކުޅެފަ އެވެ. އޭރު ނިސްޓަލްރޫއި ވަނީ ޔުނައިޓެޑުގެ އެސިސްޓެންޓު ކޯޗުކަމުގެ މަގާމުގައި އެނާ ހުންނަން ބޭނުންވާ ކަމަށާއި، ޔުނައިޓެޑަށް އެހީތެރިވުމަށް އޭނާ ހުރީ ތައްޔާރަށް ކަމަށް ބުނެފަ އެވެ. ނަމަވެސް، އަމޯރިމް ޔުނައިޓެޑާ ހަވާލުވާއިރު، އޭނާގެ ދަށުން މަސައްކަތް ކުރާނީ އެހެން އެސިސްޓެންޓު ކޯޗަކަށްވާތީ ނިސްޓަލްރޫއި ވަނީ އެ މަގާމުން ވަކިވާން ނިންމައިފަ އެވެ.

ނިސްޓަލްރޫއި ކުލަބުން ވަކިވެފައިވާކަން ހާމަކޮށް ޔުނައިޓެޑުން ނެރުނު ބަޔާނެއްގައި ބުނެފައި ވަނީ، ނިސްޓަލްރޫއި އަކީ މިހާރު ވެސް އަދި އަބަދު ވެސް އެ ކުލަބުގެ ލެޖެންޑަކަށް ވާނެ ކަމަށެވެ. ޔުނައިޓެޑުގައި ނިސްޓަލްރޫއި ކޮށްފައިވާ މަސައްކަތާއި، އޭނާގެ ފަރާތުން މި ދަނޑިވަޅުގައި ޔުނައިޓެޑަށް ލިބުނު އެހީތެރިކަމަށް ޝުކުރު އަދާ ކުރާ ކަމަށް ވެސް އެ ކުލަބުން ވަނީ ބުނެފަ އެވެ. އަދި ޔުނައިޓެޑުން އަބަދު ވެސް ނިސްޓަލްރޫއި އަށް މަރުޙަބާ ކިޔާނެ ކަމަށް ވެސް އެ ކުލަބުން ބުނެފައިވެ އެވެ.

ދެ އަހަރު ދުވަހުގެ އެއްބަސްވުމެއްގެ ދަށުން ނިސްޓަލްރޫއި ޔުނައިޓެޑުގެ އެސިސްޓެންޓު ކޯޗުކަމާ ހަވާލުވީ މިއަހަރުގެ ޖުލައި މަހުގެ ތެރޭގަ އެވެ.