އިޒްރޭލު ޕާސްޕޯޓް މަނާކުރާ ބިލު އަވަސްކުރުމަށް ގޮވާލައި ހުށަހެޅި ޤަރާރުގެ ފުރަތަމަ ކިޔުން އިއްވައިފި

އިޒްރޭލު ޕާސްޕޯޓު މަނާ ކުރުމުގެ ބިލު ކޮމިޓީގައި "ތާށިވެފައި އޮންނަތާ" އެތައް ދުވަހެއް ފަހުން، އިސްރާއީލްގެ ޕާސްޕޯޓްގައި ދިވެހިރާއްޖެ އެތެރެވުން މަނާކުރުމަށް ހުށަހަޅާފައިވާ ބިލު އަވަހަށް ފާސްކުރުމަށް ބާރުއަޅައިދިނުމަށް ސަރުކާރަށް ގޮވާލައި ހުށަހަޅާ ޤަރާރުގެ ފުރަތަމަ ކިޔުން އިއްވައިފިއެވެ.

އިޒްރޭލު ޕާސްޕޯޓްގައި ދިވެހިރާއްޖެ އެތެރެވުން މަނާކުރުމަށް ހުށަހަޅާފައިވާ ބިލު އަވަހަށް ފާސްކުރުމަށް ބާރުއަޅައިދިނުމަށް ސަރުކާރަށް ގޮވާލައި ހުށަހަޅާ ޤަރާރު ހުށަހަޅުއްވާފައި ވަނީ ގަލޮޅު އުތުރު ދާއިރާގެ މެންބަރު މުޙައްމަދު އިބްރާހީމްއެވެ.

އިޒްރޭލު ޕާސްޕޯޓުގައި ރާއްޖެ އެތެރެވުން މަނާކުރަން މަޖިލިހަށް ހުށަހެޅުއްވީ ގަލޮޅު ދެކުނު ދާއިރާގެ އެމްޑީޕީގެ މެމްބަރު މީކާއިލް އަހުމަދު ނަސީމެވެ. 2024 ވަނަ އަހަރުގެ މެއި މަހުގެ 29 ވަނަ ދުވަހު ހުށަހެޅި ބިލު ބަލައިގަނެ މަޖިލިހުގެ ސަލާމަތީ ހިދުމަތްތަކާ ބެހޭ ކޮމިޓީ (241 ކޮމިޓީ) އަށް ވަނީ ފޮނުވައިފައެވެ. މީކާއިލް ހުށަހެޅުއްވި ބިލުގައިވަނީ އިޒްރޭލު ޕާސްޕޯޓާއި އެހެން ގައުމެއްގެ ޕާސްޕޯޓެއް އޮތް އިޒްރޭލުގެ ރައްޔިތަކު ވެސް ރާއްޖެ އެތެރެވުމުގެ ހުއްދަ ނެތް މީހެއްގެ ގޮތުގައި ކަނޑައެޅުމަށް ހިމަނާފައެވެ. މި ބިލު ހުށަހެޅި އިޒްރޭލުން ފަލަސްތީނުގެ ދަރިފަސްކޮޅު ނައްތާލުމަށް ހިންގަމުންގެންދާ ގަތުލުއާންމާއި ދެކޮޅަށް ރާއްޖެއިން އަޅާ ފިޔަވަޅެއްގެ ގޮތުން ކަމަށް ވެސް ބިލުގައި ބުނެފައިވެއެވެ. މި ބިލު ބަލައިގަނެ މަޖިލިހުގެ ސަލާމަތީ ހިދުމަތްތަކާ ބެހޭ ކޮމިޓީ (241 ކޮމިޓީ) އަށް ވަނީ ފޮނުވައިވަނީ މިދިޔަ ޖޫން މަހުގެ 10 ވަނަ ދުވަހުއެވެ.

އިޒްރޭލު މީހުން ރާއްޖެ އަށް އެތެރެވެވޭ ގޮތަށް އޮންނަ އޮތުން ބަދަލުކުރަން ގާނޫނު އިސްލާހު ކުރަން ސަރުކާރުން ނިންމައިފިކަން އިއުލާން ކުރީ 2 ޖޫން 2024 ގައެވެ. އެގޮތަށް އިއުލާންކުރިކަން އޭގެ ފަހުން އިޒްރޭލު ޕާސްޕޯޓު މަނާ ކުރުމުގެ ބިލު މަޖިލީހަށް ބަލައިގަނެ 241 ކޮމެޓީއަށް ފޮނުވީ ޖޫން 10 ވަނަ ދުވަހުއެވެ. އޭގެ ފަހުން ސަރުކާރުން ބޭނުންވެގެން ބިލުތައް ފާސް ކުރުމަށް ދައުރުން ބޭރުގައި ޖަލްސާތައްވެސް ބޭއްވި ނަމަވެސް، ކޮމިޓީގައި ބިލުގެ މަސައްކަތް ކުރިއަށް ގެންގޮސްފައެއް ނުވެއެވެ. އިޒްރޭލު ޕާސްޕޯޓުގައި ރާއްޖެ އެތެރެވުން މަނާކުރަން އިމިގްރޭޝަން ގާނޫނަށް އިސްލާހު ގެނައުމުގެ ބިލް، ރައްޔިތުންގެ މަޖިލިހުގައި އޮތް އިރު، އެ މައްސަލަ އަވަސްކުރަން ވެރިކަން ކުރާ މައި ޕާޓީ، ޕީއެންސީން ވަނީ އޮކްޓޯބަރ 15 ވަނަ ދުވަހު ގޮވާލާފައެވެ. އެހެންނަމަވެސް މި ހިނގާ 20 ވަނަ މަޖިލީހަކީ ޕީއެންސީގެ ފުރިހަމަ މެޖޯރިޓީ އޮތް މަޖިލީހަކަށް ވުމާއި އެ މަސައްކަތް އަވަސްކުރުމާއި ލަސްކުރުމުގެ ފުރިހަމަ އިޚްތިޔާރު އޮތީ ޕީއެންސީއަށެވެ.