ރާއްޖެއަށް މަސްތުވާތަކެތި އެތެރެކުރިކަމުގެ ތުހުމަތުގައި ހައްޔަރުކުރި އަަޙްމަދު ނަޞީރު (45އ) ބަންދުން ދޫކޮށްލާ، ޢަލީ އައިހަމް (18އ) އާއި ރޮހަމާންގެ ބަންދުގެ މުއްދަތު އިތުރުކޮށްފިއެވެ.

ރާއްޖެއަށް 5 ކިލޯއަށްވުރެ ގިނަ އަދަދެއްގެ މަސްތުވާތަކެތި އެތެރެކުރިކަމުގެ ތުހުމަތުގައި  ހައްޔަރުކުރީ ހއ. ދިއްދޫ / ފާގަތިގެ، އަަޙްމަދު ނަޞީރު (45އ)، ގއ. ކަނޑުހުޅުދޫ / ނެސްޓް، ޢަލީ އައިހަމް (18އ) އަދި ރޮހަމާން، ބަނގްލަދޭޝް (29އ) އެވެ. މި ތިން މީހުންގެ ތެރެއިން، އަަޙްމަދު ނަޞީރު ހައްޔަރުކޮށްފައިވަނީ ކަސްޓްމަސް އިން ފުލުހުންނާ ހިއްސާކުރި މައުލޫމާތަކާ ގުޅިގެން އޮކްޓޫބަރު 31 ވަނަ ދުވަހުގެ ރޭ ވެލާނާ އިންޓަނޭޝަނަލް އެއާޕޯޓުންނެވެ. އޭނާ ހައްޔަރުކޮށް، ކައުންޓަރ ނާކޮޓިކްސް އިންޓެލިޖެންސާއި ޑްރަގް އެންފޯސްމަންޓު ގުޅިގެން ކުރިއަށް ގެންދިއަ ކޮންޓްރޯލް ޑެލިވަރީ އޮޕަރޭޝަނުގައި އަނެއް ދެމީހުން ހައްޔަރުކޮށްފައިވަނީ މާލޭންނެވެ.

ދިވެހި ރާއްޖެއަށް މަސްތުވާތަކެތި އެތެރެކޮށް، ގެންގުޅެ، ބޭނުންކޮށް އަދި މަސްތުވާތަކެތީގެ ވިޔަފާރިކުރާ ކަމުގެ ތުހުމަތުގައި މި ތިން މީހުން ހައްޔަރުކޮށް ބަލައިފާސްކުރިއިރު މަސްތުވާތަކެތި ކަމަށް ބެލެވޭ ތަކެތި ފެނިފައިވެއެވެ. އެ ތަކެތީގެ ވަގުތީ ބަރުދަނަކީ 5 ކިލޯ 936 ގްރާމެވެ.

މި މައްސަލައިގައި ފުރަތަމަ ތިން މީހުންވެސް ބަންދުކުރުމަށް ކްރިމިނަލް ކޯޓުން އަމުރު ނެރުނެވެ. އެއީ އަަޙްމަދު ނަޞީރު (45އ) ފަސް ދުވަހަށް، ޢަލީ އައިހަމް (18އ) 10 ދުވަހަށް އަދި ރޮހަމާން (29އ) ހަތް ދުވަހަށެވެ.

ނަމަވެސް މި މަހުގެ 6 ވަނަ ދުވަހު ނަސީރުގެ ބަންދުގެ މުއްދަތު އިތުރުކުރުމަށް ދެވަނަ ފަހަރަށް ކޯޓަށް ހާޒިރުމުން ކޯޓުން އޭނާ ދޫކޮށްލާފައިވަނީ ޝަރުތުކުރުމަށްފަހުއެވެ.

އޭނަ ބަންދުން ދޫކޮށްލާފައިވަނީ ފުލުހުންނަށް އެއްބާރުލުން ދީފައިވާތީއާއި، އޭނާ ބޭރުން އައި ތަކެތި ބަލައި ދިޔައީ ހުރިހާ ލިޔެކިޔުމެއް ހަމަކޮށްގެންކަމަށްވުމާއެކު، އެނާއަކީ ކްލިއަރިންގ މަސައްކަތުގައި އެޖެންޓެއްގެ ގޮތުގައި ޕީއޭ މޯލްޑިވްސް ކިޔާ ތަނެއްގައި މަސައްކަތްކުރަމުންދާ މީހެއްކަމަށް ބުނެފައިވެއެވެ.

ބަންދުން ދޫކޮށްލި އަމުރުގައިވަނީ އެތަކެއްޗަކީ މިސްބާހު ކިޔާ މީހެއްގެ އެއްޗެހި ކަމަށެވެ. އަދި ރާއްޖެއަށް އެތެރެކޮށްފައިވާ ދާގީނާތައް އެތެރެކޮށްފައިވަނީ އަހުމަދު ނަސީރުގެ ޅިޔަނެއްކަމުގައިވާ އައްފާން ކިޔާ މީހެއްގެ ނަމުގައި އެ ފަރާތުގެ ކޮންޕެނީ މެދުވެރިކޮށް ކަމަށް ފުލުހުން ބުނެފައިވެއެވެ.

އަމުރުގައި ބުނެފައިވަނީ މައްސަލައިގައި ދެފަރާތުން ދައްކާފައިވާ ވާހަކަތަކަށާއި، ހުށަހެޅުނު ލިޔެކިޔުންތަކަށް ބަލާއިރު، އަހުމަދު ނަސީރު ދާގީނާ ބަލައި ދިޔަ ދިޔުން ފިޔަވައި މި މައްސަލައިގައި ތުހުމަތުކުރެވިފައިވާ ކުށް އޭނާ ކުރިކަމަށް ބާރުދޭ އިތުރު ހެއްކެއް ނުވަތަ އޭގައި މަސްތުވާތަކެތި ހުރިކަމުގެ ނޮލެޖް އަހުމަދު ނަސީރުގެ ހުރިކަން ދަލާލުކޮށްދޭ ކަމެއް ހުށަހޅިފައެއް ނެތްކަމަށެވެ. ނަސީރުއަކީ ކުށުގެ ރެކޯޑް އޮތް ފަރާތެއް ނޫނެވެ.

މި މައްސަލައިގައި ދެން ހިމެނޭ ބަންގުލަދޭޝް ރޮހަމާން ވަނީ 30 ދުވަހަށް ބަންދުގެ މުއްދަތު ދެވަނަ ފަހަރަށް އިތުރުކޮށްފައެވެ. މީގެ އިތުރުން އަލީ އައިހަމްގެ މުއްދަތު 15 ދުވަހަށް ވަނީ އިތުރުކޮށްފައެވެ.