20 ވަނަ ގަރުނުގައި ދިވެހިން ދުށް ހުވަފެން ހަގީގަތަކަށް ހައްދަވާދެއްވީ ރައީސް ޑރ.މުއިއްޒު: އާދަމް ނަސީރު

20 ވަނަ ގަރުނުގައި ދިވެހިން ދުށް ހުވަފެން ހަގީގަތަކަށް ހައްދަވާދެއްވީ ރައީސް ޑރ.މުހައްމަދު މުއިއްޒު ކަމަށް ދިވެހިބަހާއި ސަގާފަތާއި ތަރިކައާ ބެހޭ ވަޒީރު އާދަމް ނަސީރު އިބްރާހިމް ވިދާޅުވެއްޖެއެވެ.

އެ މަނިކުފާނު އެފަދައިން ވިދާޅުވީ ޖުމްހޫރީ ދުވަހުގެ ޖަލްސާގައި ވާހަކަދައްކަވަމުންނެވެ.

ރާއްޖޭގައި ވެރިކަން ހިނގަމުން އައި ނިޒާމް ޖުމްހޫރީ ނިޒާމަކަށް ބަދަލުކުރުމަކީ 20 ވަނަ ޤަރުނުގެ ތެރޭގައި ދިވެހިން ނިންމި ވަރަށް މުހިންމު ނިންމުމެއް ކަަމަށް ވަޒީރު ވަނީ ވިދާޅުވެފައެވެ. ރަސްކަމުގެ ނިޒާމް ޖުމްހޫރިއްޔަތަކަށް ބަދަލުކުރުމަކީ ދިވެހިންނާއި ބެހޭ ކަންކަން ނިންމާނީ ދިވެހިންކަން ދިވެހިން ކަނޑައެޅުންކަމަށް އެ މަނިކުފާނު ސިފަކުރެއްވިއެވެ. ވަޒީރު ވިދާޅުވި ގޮތުގައި ދިވެހިން ޖުމްހޫރިއްޔަތެއް ބަލައިގަތުމުގެ މާނައަކީ ޤައުމާއި، ރައްޔިތުންނާއި، ޤައުމު ކުރިއެރުވުމާއި ބެހޭ ކަންކަމުގައި ދިވެހި ރައްޔިތުންގެ ހިއްސާ އޮތުމަކީ ދިވެހިން އެދޭ ގޮތްކަން އަންގާދިނުނުމެވެ. މިއަދު ދިވެހިން 21 ވަނަ ގަރުނުގައި ތިބި އިރު ރާއްޖޭގެ ތާރީހުގައި ގިނަ ވެރިކަންތަކެއް ދެކެފައިވާ ކަމަށް އެ މަނިކުފާނު ވިދާޅުވިއެވެ. ވެރިކަން ހިންގަނީ ރަސްކަމެއްގެ ތެރެއިންތޯ ނުވަތަ ޖުމްހޫރިއްޔަތެއްގެ ތެރެއިންތޯ، ޑިމޮކްރަސީ ބެލުމުގައި ނަމަށް އަންނަ ބަދަލަކަށް ވުރެ ކަންކަމަށް އަންނަ ބަދަލު މުހިންމުކަމަށް އެ މަނިކުފާނު ވިދާޅުވިއެވެ.

20 ވަނަ ގަރުނުގައި ދިވެހިން ދުށް ހުވަފެން ހަގީގަތަކަށް ވީ މިއަދު ކަމަށް ފާހަގަކުރައްވާ ސަަބަބުތައް އާދަމް ނަސީރު ވަނީ ފާހަގަކުރައްވާފައެވެ. ތިންކަމެއް ދަންނަވާލާނަން. އެގޮތުން ރައީސް މުއިއްޒު ރައްޔިތުންނާ މެދު ގެންގުޅުއްވާ ވިސްނުންފުޅު ހުށަހެޅުއްވީ ވަރަށް ތަރުތީބުން ކަމަށާއި އެކަން ކުރެއްވީ ވަރަށް ހާމަކޮށް ލިޔެވިގެން ކަމަށް އެ މަނިކުފާނު ވިދާޅުވިއެވެ. ރައީސްގެ އެ ވާހަކަތަކަށް ދިވެހިން އިތުބާރުކޮށްފައިވާ ކަމަށް އެ މަނިކުފާނު ފާހަގަކުރެއްވިއެވެ. ވެރިކަމުގެ އަމާނާތް ރައީސް މުއިއްޒުއާ ހަވާލުކުރި ސަބަބަކީ އެއީ ކަމަށް އެ މަނިކުފާނު ވިދާޅުވިއެވެ. ރައީސް މުއިއްޒު ވެރިކަން ކުރައްވަނީ ތިރިން މައްޗަށް އެންމެންނަށް ފައިދާ ވާ ގޮތަށް ކަމަށާއި އެ މަނިކުފާނު އަބަދުވެސް ހުންނަވާނީ ދިވެހިންގެ ފަޅީގައި ކަމަށް ވަޒީރު ވަނީ ވިދާޅުވެފައެވެ. ރައީސް މުއިއްޒު އަކީ 20 ވަނަ ގަރުނުގައި ދިވެހިން ދުށް ހުވަފެން ހަގީގަތަކަށްވާ ސަބަބު ކަމަށް ފާހަގަކުރައްވާ ސަބަބަކީ އެއީ ކަމަށް އެ މަނިކުފާނު ވިދާޅުވިއެވެ. އަދި ކުރިއަށް އޮތް 20 އަހަރަށް އެކުލަވާލާ މާސްޓަރ ޕްލޭނާއި އެކު ޤައުމުގެ ކަންކަން ހަރުދަނާކަމާއި އެކު ބައްޓަންވެގެންދާނެ ކަަމަށް އެ މަނިކުފާނު ވިދާޅުވިއެވެ.

ދިވެހިން 20 ވަނަ ގަރުނުގަ ދުށް ހުވަފެނަކީ ދިވެހިންގެ އަމިިއްލަވަންތަކަމާއި، ދިވެހިންގެ ސަލާމަތާއި، ދިވެހިން މި ރާއްޖޭގައި ދެމި ތިބުމަށް ބޭނުންވާ ހަގީގީ މައުނަވީ އޮނިގަނޑު ކުރެއްސެވި ބޭފުޅަކީ ރައީސް ޑރ. މުއިއްޒު ކަމަށް ވެސް ވިދާޅުވިއެވެ. އެކަން ދިވެހިންގެ ހިތުގައި އަށަގެންނެވުމަށްޓަކާ ޖުމްހޫރީ ދުވަހުގެ ރަސްމިއްޔާތުވެސް ވަނީ ދިވެހިންގެ އަމިއްލަވަންތަކުގެ ފިލާވަޅުތަކުން ފުރިފައި ކަަމަށް އެ މަނިކުފާނު ވިދާޅުވިއެވެ. އަހަރެއްގައި އެފަދަ 10 ރަސްމިއްޔާތު ބާއްވަން ރައީސް ޑރ. މުހައްމަދު މުއިއްޒު ނިންމާފައިވާ ކަމަށް ވަޒީރު ވަނީ ފާހަގަކުރައްވާފައެވެ. އެއިން ކޮންމެ ދުވަހަކީ ދިވެހިންގެ ތާރީހާއި އަމިއްލަވަންތަކަމުގެ ވާހަކަ ދެކެވޭ މުނާސަބަތުތަކެއް ކަމަށް އެ މަނިކުފާނު ވިދާޅުވިއެވެ. އެފަދަ ޤައުމީ ކަންކަމަށް ރައީސް މުއިއްޒު ވަރަށް ޚާއްސަ އިސްކަމެއް ދެއްވާ ކަަމަށް އެ މަނިކުފާނު ވަނީ ވިދާޅުވެފައެވެ.