ޖޮއިންޓް ޢަރަބް-އިސްލާމިކް ސަމިޓުގައި ބައިވެރިވެވަޑައިގަތުމަށް ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ސަޢޫދީ ޢަރަބިއްޔާގެ ރިޔާޛަށް އާދިއްތަ ދުވަހުގެ ރޭ ފުރާވަޑައިގެންފިއެވެ.

މަތީ ފަންތީގެ ވަފުދަކާއެކު ކުރައްވާ މި ދަތުރުފުޅުގައި، އިސްރާއީލުގެ އިސްތިޢުމާރީ ބާރުތަކުން ފަލަސްޠީނާއި ލުބްނާނަށް ދެމުންދާ ހަމަލާތަކާއި، ސަރަޙައްދީ ޙުތޫރާތްތެރި މައްސަލަތަކާމެދު، ސަރަޙައްދީ އިސްވާރުން ކުރައްވާ މަޝްވަރާގައި ރައީސުލްޖުމްހޫރިއްޔާ ބައިވެރިވެވަޑައިގަންނަވާނެ ކަމަށް ރައީސް އޮފީހުން ނެރެފައިވާ ބަޔާނެއްގައި ބުނެފައިވެއެވެ.

މުއިއްޒުގެ އަރިހުގައި ދަތުރު ކުރައްވާ ވަފުދުގެ ތަފްސީލު ރައީސް އޮފީހުން ހާމަކޮށްފައެއް ނުވެއެވެ.

މި ސަމިޓުގައި މަޝްވަރާތައް ބިނާކުރައްވާނީ، 2023 ވަނަ އަހަރުގެ ނޮވެމްބަރ މަހުގެ 11 ވަނަ ދުވަހު ސަޢޫދީ ޢަރަބިއްޔާގެ ރިޔާޛުގައި ނިންމި ޖޮއިންޓް ޢަރަބް-އިސްލާމިކް ސަމިޓުގެ ނިންމުންތަކުގެ މައްޗަށެވެ.

މުއިއްޒުގެ މިދަތުރުފުޅާ ބެހޭ ގޮތުން ރައީސް އޮފީހުން އިތުރަށް ބުނެފައިވަނީ، ރައީސުލްޖުމްހޫރިއްޔާ ގެންދަވަނީ، ފަލަސްޠީނުގެ ރައްޔިތުންގެ ޙައްޤުގައި އަޑުއުފުއްލަވައި، އިސްރާއީލުގެ ޢަމަލުތައް ކުށްވެރިކުރައްވައި، ޕަލަސްތީނާއި ލުބްނާނަށް ދެމުންދާ ހަމަލާތައް ކުށްވެރިކުރައްވާމުން ކަމަށެވެ. ސަރަޙައްދީ ސުލްޙަ އާއި ޢަދާލަތަށް ގޮވާލެއްވުމުގައި އެމަނިކުފާނު ގެންގުޅުއްވާ ސާބިތުކަމަކީ، މި މައްސަލައިގައި އަނިޔާ ލިބެމުންދާ މީހުންނަށް ދިވެހިން ކުރާ ތާއީދުގެ ހެއްކެއް ކަމަށްވެސް ރައީސް އޮފީހުން ބުނެއެވެ.

މުއިއްޒު ގެ މިދަތުރުފުޅަށް ކުޑަތަން ވެފައި ވަނިކޮށް، އެމަނިކުފާނުގެ ފުލް ކޮންޓްރޯލް އޮންނަ ރައްޔިތުން މަޖިލީހުގައި 150 ދުވަހަށް ވުރެ ގިނަ ދުވަހު ޕާކް ކޮށްފައި އޮތް އިޒްރޭލު ޕާސްޕޯޓު ރާއްޖޭގައި މަނާކުރުމުގެ ބިލުގެ މަސައްކަތް ކުށްލި ގޮތަކަށް ފަށާކަން އާދިއްތަ ދުވަހު ވަނީ ހާމަ ކޮށްފައެވެ.

އިޒްރޭލު ޕާސްޕޯޓު މަނާކުރަން އެމްޑީޕީން ހުށަހެޅި ބިލް ސަރުކާރުގެ ބޮޑު މެޖޯރިޓީއެއް އޮންނަ 241 ކޮމިޓީ ގައި ތާށިކޮށްފައި އޮންނާތީ އެމްޑީޕީ އިން އޮކްޓޯބަރު 21 ވަނަ ދުވަހު ރައްޔިތުންގެ މަޖިލީހަށް ހުށަހެޅި ކުއްލި މައްސަލަ ބަލައި ނުގަންނަން ޑރ. މުއިއްޒު އެންޑޯޒް ކުރައްވައިގެން މަޖިލީހުގެ ރައީސް ކަމަށް ވަޑައިގެންނެވި އަބްދުއްރަޙީމް އަބްދުﷲ އޮތީ ނިންމަވާފައެވެ.