ފަތުރުވެރިންނަށް ޑިއުޓީ ނުދައްކާ އެތެރެ ކުރެވޭނީ 200 ސިނގިރޭޓް ކަމަށް ކަނޑައަޅައިފި

ރާއްޖެ އަންނަ ފަތުރުވެރިންނަށް ޑިއުޓީ ނުދައްކާ ރާއްޖެ އަށް އެތެރެ ކުރެވޭނީ 200 ސިނގިރޭޓް، ނުވަތަ 25 ސުއްޓާ، ނުވަތަ 250 ގްރާމް ދުންފަތް ކަމަށް ކަސްޓަމްސް އިން ބުނެފިއެވެ.

ކަސްޓަމްސް އިން ނެރެފައިވާ ސާކިއުލަރ އެއްގައި ބުނެފައިވަނީ "ދުންފަތުގެ އުފެއްދުންތައް ބަންދުކުރުމާއި ލޭބަލްކުރުމާ ބެހޭ ގަވާއިދު" އަށް ގެނެވުނު 4 ވަނަ އިސްލާހާއި، "ދަތުރުވެރިން ގެންނަ މުދަލާއި، އަމިއްލަ ބޭނުމަށް ގެންނަ ތަކެއްޗާއި، ވިޔަފާރީގެ ސާމްޕަލްތަކަށް ޑިއުޓީ މަޢާފުކުރުމާބެހޭ އުސޫލު" އާ އެއްގޮތްވާ ގޮތުގެ މަތިން، 9 ނޮވެމްބަރ 2024 އިން ފެށިގެން، ހަމައެކަނި ފަތުރުވެރިންގެ ވިސާގައި އަންނަ ފަރާތްތަކަށް އަމިއްލަ ބޭނުމަށް ކަނޑައަޅާފައިވާ މިންވަރަށް ދުންފަތުގެ އުފެއްދުންތައް އެތެރެކުރުމުގެ ހުއްދަ ދެވޭނެ ކަމަށެވެ.

ކަސްޓަމްސް އިން ބުނެފައިވަނީ އެ މިންވަރަށްވުރެ އިތުރަށް ގެންނަ ތަކެތި ގިނަވެގެން 30 ދުވަހުގެ މުއްދަތަށް ކަސްޓަމްސް އިން ބަހައްޓާނެ ކަމަށެވެ. އަދި ފަތުރުވެރިންނަށް މި ތަކެތި ރާއްޖެއިން ފުރާއިރު ވެލާނާ އިންޓަރނޭޝަނަލް އެއަރޕޯޓުގެ (ވީއައިއޭ) ޑިޕާޗަރ ޓާމިނަލްގައި ހުންނަ ކަސްޓަމްސް ކައުންޓަރުން ނެގިދާނެ ކަމަށެވެ.

މީގެ އިތުރުން، ފަތުރުވެރިން ނޫން އެހެން ދަތުރުވެރިން ގެންނަ ދުންފަތުގެ އުފެއްދުންތަކުގެ ތެރެއިން މިނިސްޓްރީ އޮފް ހެލްތުގެ ލޭބަލް ކުރުމުގެ ޝަރުތުތަކާ ނުގުޅޭ ތަކެތި ކަސްޓަމްސްއިން އަތުލާނެ ކަމަށްވެސް ބުނެފައިވެއެވެ.

"ރާއްޖެއަށް ދުންފަތުގެ އުފެއްދުންތައް ގެނައުމުގައި މި އައު ޝަރުތުތަކާ އެއްގޮތަށް ޢަމަލުކުރުމަށާއި، ރާއްޖެ އެތެރެވުމުގެ މަރުޙަލާ ފަސޭހަކަމާއެކު ކުރިއަށް ގެންދިއުމަށްޓަކައި، ހުރިހާ ފަސިންޖަރުންނާއި ދަތުރުވެރިން މި އައު ޝަރުތުތައް ރަނގަޅަށް ބެއްލެވުމަށް ބާރުއަޅަމެވެ." ކަސްޓަމްސް ގެ ސާރކިއުލަރ ގައި ބުނެފައިވެއެވެ.