ހެންވޭރުގައި ހިންގި ސްޕާއެއް ބަލައިފާސްކޮށް ބަޔަކުހައްޔަރުކޮށްފި

މާލޭގެ ހެންވޭރު ސަރަހައްދުގައި ހިންގަމުން އައި ސަރާ ސެލޫން އެންޑް ސްޕާ ނަމަކަށް ކިޔާ ތަނެއް ކޯޓު އަމުރެއްގެ ދަށުން ބަލައިފާސްކޮށް، އެތަނުން ފަސް މީހަކު ހައްޔަރުކޮށްފިއެވެ. މި އޮޕަރޭޝަން ހިންގާފައިވަނީ މި ނޮވެމްބަރު މަހުގެ 5 ވަނަ ދުވަހުއެވެ.

ފުލުހުންގެ އިންޓެލިޖެންސަށް ލިބުނު މަޢުލޫމާތަކާ ގުޅިގެން ހިންގުނު މި އޮޕަރޭޝަނުގައި ހައްޔަރުކޮށްފައިވަނީ އެއް ދިވެހި ފިރިހެނަކާއި ތައިލެންޑުގެ ހަތަރު އަންހެނުންނެވެ. މި ތަނުގައި ހަށިވިއްކުމުގެ މަސައްކަތް ކުރަމުންދާ ކަމަށް ތުހުމަތު ކުރެވެއެވެ.

Advertisement

ހައްޔަރުކުރެވުނު ފަރާތްތަކުގެ ތެރޭގައި ހިމެނެނީ ގއ. ކަނޑުހުޅުދޫ / ޕާކީޒާ، މުޙައްމަދު ޢިމްރާން (42އ)، ސަލިނީ ޔަމްޑީ (30އ)، ޗަޔަނިޓް ޕިލާ (30އ)، ވިލައިޕޯން ކޮޓްވޮންގް (24އ) އަދި ތިޕްސުދާ ސަންގްހަމް (33އ) އެވެ.

މި މައްސަލައާ ގުޅިގެން ހައްޔަރުކުރެވުނު ފަރާތްތަކުގެ ބަންދާމެދު ގޮތެއް ނިންމުމަށް ކްރިމިނަލް ކޯޓަށް ހާޒިރުކުރުމުން، ތިޕްސުދާ ސަންގްހަމް 15 ދުވަހަށް ބަންދުކުރުމަށް އަމުރުކޮށްފައިވާއިރު، އަނެއް ހަތަރު މީހުން ހަތް ދުވަހަށް ބަންދުކުރުމަށް ވަނީ އަމުރުކޮށްފައެވެ.

މި މައްސަލައިގެ ތަޙްޤީޤު މޯލްޑިވްސް ޕޮލިސް ސަރވިސްއިން ދަނީ ކުރިއަށް ގެންދަމުންނެވެ. މި ފަދަ ޣައިރު ޤާނޫނީ ޢަމަލުތައް ހުއްޓުވުމަށް ފުލުހުން ދަނީ ޚާއްޞަ މަސައްކަތްތަކެއް ކުރަމުންނެވެ.