ޓެނިސް އެސޯސިއޭޝަންގެ ރައީސަކަށް ހަފީޒް އިންތިޚާބު ކޮށްފި

ޓެނިސް އެސޯސިއޭޝަން އޮފް މޯލްޑިވްސްގެ ރައީސަކަށް، މިހާރު ވެސް އެ މަޤާމުގައި ހުންނެވި އަޙުމަދު ހަފީޒް އިންތިޚާބު ކޮށްފި އެވެ.

ޓެނިސް އެސޯސިއޭޝަންގެ އިންތިޚާބު ބާއްވާފައިވާއިރު، ރައީސް ކަމުގެ މަޤާމަށް ކުރިމަތިލެއްވީ ވެސް ހަފީޒު އެކަނި އެވެ. ދެ ވަނަ ދައުރަކަށް ހަފީޒު އިންތިޚާބު ކުރުމަށް 83 މެމްބަރަކު ވަނީ ފެންނަ ކަމަށް ވޯޓް ދީފަ އެވެ. އެ މަޤާމަށް ހަފީޒު އިންތިޚާބު ކުރުމަށް ނުފެންނަ ކަމަށް ދެ މެމްބަރަކު ވޯޓު ދިނެވެ. ދެ ވަނަ ދައުރަކަށް ހަފީޒު އިންތީޚާބު ވެފައިވާއިރު، ދެ ވަނަ ދައުރު ހަމަވާނީ 2028 ވަނަ އަހަރު އެވެ.

ހަފީޒުގެ އިތުރުން، ޓެނިސް އެސޯސިއޭޝަންގެ ނައިބު ރައީސަކަށް އިންތިޚާބުވެފައި ވަނީ އިޤްނާޒް މަންޞޫރު އެވެ. އެ މަޤާމަށް އޭނާ ގެނައުމަށް ފެންނަ ކަމަށް ވޯޓު ދިނީ 93 މެމްބަރުންނެވެ. ނުފެންނަ ކަމަށް އެއް މެމްބަރަކު ވޯޓު ދިންއިރު، ބާތިލް އެއް ވޯޓު އޮތެވެ. ޓެނިސް އެސޯސިއޭޝަންގެ މެމްބަރުންގެ ތެރެއިން އިންތިޚާބު ކުރާ މަޤާމަށް އިންތިޚާބު ކާމިޔާބު ކޮށްފައި ވަނީ ޙަސަން ޝާމް، އާމިނަތު ޞާލިހާ އަދި މުޙައްމަދު ފަސީހު އެވެ. މި މެމްބަރުން ވެސް އިންތިޚާބުވެފައި ވަނީ ފެންނަ، ނުފެންނަ ވޯޓުންނެވެ. މިފަހަރުގެ އިންތިޚާބުގައި ކޮންމެ މަޤާމަކަށް ވެސް ކުރިމަތިލައްވާފައި ވަނީ އެންމެ މެމްބަރެކެވެ.

ޓެނިސް އެސޯސިއޭޝަންގެ އިންތިޚާބުގައި 275 މެމްބަރަކަށް ވޯޓު ލެވޭނެ އެވެ.