އިޒްރޭލަށް އީރާނުން ވަރުގަދަ ރައްދު ހަމަލާ އެއް ދޭނެ ކަމަށް ވިދާޅުވެ އީރާނުގެ ރޫހާނީ ލީޑަރު އާޔަތުﷲ ޚާމަނާއީ ވަރުގަދަ އިންޒާރެއް އެމެރިކާ އާއި އިޒްރޭލަށް ހޮނިހިރު ދުވަހު ދެއްވައިފިއެވެ.

އީރާނުގެ ލީޑަރު މިމޭރުމުން ވާހަކަފުޅު ދެއްކެވީ އޮކްޓޯބަރު 26 ގައި އިސްލާމީ ޖުމްހޫރިއްޔާގެ އަސްކަރީ މަރުކަޒުތަކާއި އެހެނިހެން ތަންތަނަށް އަމާޒުކޮށް އިޒްރޭލުން ދިން ހަމަލާގައި އީރާނުން މަދުވެގެން 5 މީހުން މަރުވި ހާދިސާ އާ ގުޅިގެން އިޒްރޭލަށް އަނެއްކާވެސް ހަމަލާއެއް ދޭނެ ކަމުގެ އިންޒާރު އީރާނުގެ އިސް އެހެން ވެރިން ވެސް ދެއްވަމުންދާ ދަނޑިވަޅެއްގައެވެ.

ސިޔާސީ ތަޖުރިބާކާރުންގެ ނަޒަރުގައި އީރާނުގެ މި އިންޒާރާއެކު ސަރަހައްދުގައި އުފެދިފައިވާ ނުތަނަވަސްކަން އިތުރުވެގެންދާނެއެވެ. އީރާނާއި އިޒްރޭލުން ކުރިއަށް އޮތްތާނގައި އިތުރު ހަމަލާތަކެއް ދީފިނަމަ، މެދުއިރުމަތީގެ ސަރަހައްދު ހަނގުރާމައަކަށް ވެއްޓުމަކީ އެކަށީގެންވާ ކަމެކެވެ. ޣައްޒާ އަށް ހުއްޓުމެއްނެތި އިޒްރޭލުން ދެމުންދާ ހަމަލާތަކާއި، އިޒްރޭލުން ލުބުނާނަށް އެރުމުގެ ސަބަބުން މެދު އިރުމަތި އޮތީ ވަރަށް ނުރައްކާތެރި ފައްތަރަކަށް ވެއްޓިފައެވެ.

އީރާނުގެ ދަރިވަރުންނާ ބައްދަލު ކުރައްވާ އާޔަތުﷲ ސައްޔިދު އަލީ ޚާމަނާއީ ވިދާޅުވީ، އީރާނަށާއި ޖިހާދީ ޖަމާއަތްތަކާ ދެކޮޅަށް ޒަޔަނިސްޓު ވެރިކަމުގެ ފަރާތުން ކުރަމުން ގެންދާ ކަންތައްތައް އެމެރިކާ އަށާއި އާއި އިޒްރޭލަށް އެނގެންވާނެ ކަމަށާއި، ހަމަ ޔަގީނުންވެސް "ދަތްތައް ފުނޑޭވަރުގެ ރައްދެއް" އީރާނުން އިޒްރޭލަށް ދޭނެ ކަމުގައެވެ.

އީރާނުގެ ލީޑަރުގެ ވާހަކަފުޅުގައި އަނިޔާވެރިކަމާ ކުރިމަތި ލުމަށް ތައްޔާރު ވުމަށް އަސްކަރީ ގޮތުންނާއި، ސިޔާސީ ގޮތުން ކުރން ޖެހޭ ހުރިހާ ކަމެއް އީރާނުން ގެންދަނީ ކުރަމުންނެވެ.

އީރާނުގެ އެންމެ މަތީ ވެރިޔާ އިންޒާރު ދެއްވި ހަމަލާ ދޭނެ ވަގުތެއް ނުވަތަ އޭގެ ބޮޑުމިނެއް ސާފުކޮށް ވިދާޅެއް ނުވެއެވެ.

އަނެއްކޮޅުން އީރާނުން ދީފާނެ ހަމަލާއަކުން އިޒްރޭލު ރައްކައުތެރި ކުރުމަށް އެމެރިކާ އިން ގެންދަނީ ހުއްޓުމެއް ނެތި މަސައްކަތް ކުރަމުންނެވެ. މިގޮތުން ވައިގެ ދިފާޢީ ނިޒާމު ވަރުގަދަ ކުރުމަށް އެމެރިކާ އިން އިޒްރޭލަށް ދިން ޓާމިނަލް ހައި އަލްޓިޓިއުޑް އޭރިއާ ޑިފެންސް (ތާޑް) ބެޓަރީއެއް ބަލަހައްޓަމުން ގެންދަނީވެސް އިޒްރޭލުގައި ގާއިމުވެ ތިބި އެމެރިކާ ސިފައިންކަން ފާހަގަ ކުރެވެއެވެ.

ޚާމަނާއީ ވިދާޅުވީ އަނިޔާވެރިކަމާއި ދެކޮޅަށް އީރާނުން އިސް ނަގައިގެން ކުރަމުންދާ މަސައްކަތުގައި "އެއްވެސް އިހުމާލެއް" އީރާނުން ނުވާނެ ކަމުގެ ޔަގީންކަން ދެއްވާ ކަމުގައެވެ.

"މިއީ ހަމައެކަނި ބަދަލުހިފުމުގެ ކަމެއް ނޫނެވެ. މިއީ ދީނީ ގޮތުންނާއި، އަޚްލާޤީ ގޮތުންނާއި، ޝަރުއީ ގޮތުންނާއި، އަދި ބައިނަލްއަޤްވާމީ ގާނޫނުތަކާ އެއްގޮތްވާ ގޮތުގެ މަތިން އަމަލު ކުރަން ޖެހޭ ހަމަ ބުއްދީގެ އުސޫލެވެ،" އާޔަތުއްﷲ ޚާމެނެއީ ވިދާޅުވިއެވެ.

އިޒްރޭލަށް ހަމަލާ ދިނުމުގައި އީރާނުން ބޭނުންކުރާ ބެލިސްޓިކް މިސައިލް ކޮންޓްރޯލްކުރާ އީރާނުގެ ޕެރަމިލިޓަރީ ރިވޮލިއުޝަނަރީ ގާޑުގެ ތަރުޖަމާނު ޖެނެރަލް މުޙައްމަދު އަލީ ނައިނީ، ޚާމެނީގެ ވާހަކަފުޅުގެ ކުރިން އީރާނުގެ ސެމީ-އޮފިޝަލް ފާރސް ނިއުސް އޭޖެންސީއަށް ދެއްވި އިންޓަރވިއުއެއްގައި އީރާނުގެ ރައްދު "ވިސްނުންތެރި، ގަދަފަދަ އަދި ދުޝްމަނުންނަށް ވިސްނަންވެސް ނޭނގޭނެ ފަދަ ވަރުގަދަ،" އެއްޗަކަށް ވާނެ ކަމަށް ވިދާޅުވެ ވަނީ އިންޒާރު ދެއްވާފައެވެ.

ހޮނިހިރު ދުވަހު އީރާނުގެ ލީޑަރު ޚާމެނީ ޔުނިވަރސިޓީ ދަރިވަރުންނާ ބައްދަލުކުރެއްވީ ސްޓޫޑެންޓްސް ޑޭ ފާހަގަކުރުމަށެވެ.

މި ދުވަސް ފާހަގަކުރަނީ 1978 ވަނަ އަހަރުގެ ނޮވެމްބަރު 4 ވަނަ ދުވަހު ހިނގި ހާދިސާއެއް ގެ ހަނދާންކުރުމަށެވެ.

އެ ދުވަހު އީރާނުގެ ސިފައިން ވަނީ ތެހެރާނު ޔުނިވަރސިޓީގައި އީރާނުގައި އޭރު އޮތް ޝާހުގެ ވެރިކަމާ ދެކޮޅަށް އިހުތިޖާޖުކުރަމުންދިޔަ ދަރިވަރުންނާ ދިމާލަށް ބަޑި ޖަހައި، އެތައް ދަރިވަރުންނެއް މަރާލާފައެވެ.

މި ހާދިސާގެ ސަބަބުން އީރާނުގެ މަސްރަހް އިތުރަށް ހަލަބޮލިވެ، އިތުރަށް ގޯސްވެ، އެންމެ ފަހުން ޝާހު ޤައުމުން ފިއްލެވިއެވެ. އެއާއެކު 1979 ގައި އީރާނަށް ގެނައި އިސްލާމީ އިންޤިލާބަށް މަގުފަހިވިއެވެ.