"ސްކީލާން" ޑޮކިއުމެންޓަރީ ގެ މައްސަލަ މިހާރުން މިހާރަށް ތަހުގީގު ކުރަން ޕީއެންސީގެ މެންބަރ ޒަމީރު ގޮވާލައްވައިފި
2 ނޮވެމްބަރު 2024 | ހޮނިހިރު 15:39"ސްކީލާން" އަށް ރައްދުވާ ގޮތައް ޒަމީރު ވިދާޅުވީ، "މިއީ އަޚްލާގީ ނޫސްވެރި ކަމެއް ނޫން" ކަމުގައި
ސްކީލާން - ރައީސް މުއިއްޒުގެ ދޮން މަންނަ - ސްކްރީން އިމޭޖް
"ސްކީލާން" ޑޮކިއުމެންޓަރީ ގެ މައްސަލަ މިހާރުން މިހާރަށް ތަހުގީގު ކުރުމަށް ސަރުކާރު ހިންގާ ޕާޓީ ޕީޕަލްސް ނޭޝަނަލް ކޮންގްރެސް (ޕީއެންސީ) އަށް ނިސްބަތްވާ ރައްޔިތުންގެ މަޖިލީހުގެ މެންބަރު އަޙްމަދު ޒަމީރު ގޮވާލައްވައިފިއެވެ.
މޯލްޑިވްސް މީޑިއާ ކައުންސިލް (އެމްއެމްސީ) އިން ބޭއްވި 2023 ވަނަ އަހަރުގެ ނޫސްވެރިކަމުގެ އިނާމު ދިނުމުގެ ހަފްލާގައި ތަހުގީގީ ދާއިރާއިން "އަދަދު" ނޫހުން އުފެއްދި "ސްކީލާން" ޑޮކިއުމެންޓަރީއަށް އެވޯޑު ލިބިފައިވާއިރު މި ޑޮކިއުމެންޓަރީ އަކީ ރައީސް ޑރ. މުހައްމަދު މުއިއްޒުގެ ދޮން މަންމަ، ސްރީލަންކާގެ ރައްޔިތެއް ކަމުގައިވާ ޖީ ސްކީލާން، ރާއްޖޭން ބްލެކްލިސްޓުކޮށް ޑީޕޯޓުކުރި ގޮތާއި އޭނާ ރައީސް މުއިއްޒު މައްޗަށް ކުރާ ތުހުމަތުތަކުގެ މައްޗަށް ބިނާކޮށް ހަދާފައިވާ ތަހުގީގީ އުފެއްދުމެކެވެ.
"ސްކީލާން" އަށް ރައްދުވާ ގޮތައް އެކްސް ގައި ކުރެއްވި ޕޯސްޓު ގައި ޒަމީރު ވިދާޅުވީ، "މިއީ އަޚްލާގީ ނޫސްވެރި ކަމެއް ނޫން" ކަމުގައެވެ.
"ޚަބަރުފަތުރާ ވަސީލަތްތަކުން ޕްރޮޕެގެންޑާއާއި ހިވާ ހީކުރުންތަކުގެ މައްޗައް ޚަބަރުފަތުރާ، މީޑިއާގެ ދައުރަށް ބުރޫއަރާ، ރައްޔިތުންގެ އިތުބާރު ގެއްލި، ދޮގު މައުލޫމާތު ފެތުރުމަށް މަގުފަހިވެގެންދޭ. މިކަމުގެ ސަބަބުން އާންމު ރައްޔިތުންނަށް ރަނގަޅު މަޢުލޫމާތު އޮޅި، އިޖުތިމާއީ ބައިބައިވުންތައް އިތުރުވެގެން ދާނެ،" ސްކީލާން ޑޮކިއުމެންޓަރީ އަށް އަމާޒު ކުރައްވާ ޒަމީރު ލިޔުއްވާފައިވެއެވެ.
މިފަދަ އަމަލުތަކުގެ ސަބަބުން އާންމުންގެ އިތުބާރު ގެއްލި މުޖުތަމައުގެ އެއްބައިވަންތަކަން ނަގާލާކަމަށާއި މިއީ ރައްޔިތުންނަށް ދެވޭ އަނިޔާއެއްކަމަށް އޭނާ ވަނީ ވިދާޅުވެފައެވެ.
މެންބަރު ޒަމީރު އިތުރަށް ވިދާޅުވެފައިވަނީ އިންވެސްޓިގޭޓިވް ޖާނަލިޒަމް އަކީ ބެލެންސްޑް، ހަގީގަތާ ހިލާފު އަދި ހީކުރުން ނުވަތަ އެއްފަރާތައް ބަރޯސާވާ ވާހަކަތަކުން އެއްކިބާވެފައިވާ ނޫސްވެރިކަމަށް ވާންޖެހޭ ކަމަށެވެ.
އެމްއެމްސީ ގެ 11 ވަނަ ނޫސްވެރިކަމުގެ އެވޯޑް ޙަފްލާ ޕްބްލިކް ސަރވިސް މީޑިއާ (ޕީއެސްއެމް)ގެ ފަރާތުން ވަގުތުން ދައްކަމުން ދިޔައިރު، "ސްކީލާން" ޑޮކިއުމެންޓަރީގެ ތަންކޮޅެއް ދެއްކިގެން މައްސަލަ ގޯސްވެ މީޑީއާ ކައުންސިލްގެ ރައީސް، އަހްމަދު މުސްތަފާ ޕަބްލިކް ސާވިސް މީޑީއާ ގައި އޭނާ އަދާ ކުރައްވާ ވަޒީފާއިންވެސް ކުއްލި ގޮތަކަށް ވަކި ކުރިއެވެ. ނަމަވެސް ފަހުން ވަނީ އޭނާގެ ވަޒީފާ ރުޖޫއަ ކޮށްދީފައެވެ.
މެމްބަރު ޒަމީރު ވަނީ ރައްޔިތުންގެ މަޖިލީހުގެ މެމްބަރެއްގެ ހައިސިއްޔަތުން "ސްކީލާން" ޑޮކިއުމެންޓަރީ ގެ މައްސަލަ "މިހާރުން މިހާރަށް ތަހުގީގު ކުރުމަށް ކަރަޕްޝަންގެ މައްސަލަތައް ބަލާ، އޭސީސީއަށް "އިލްތިމާސް" ކުރައްވާފައެވެ.
