މޯލްޑިވްސް މީޑިއާ ކައުންސިލް (އެމްއެމްސީ) ގެ 11 ވަނަ ނޫސްވެރިކަމުގެ އެވޯޑް ޙަފްލާ ޕްބްލިކް ސަރވިސް މީޑިއާ (ޕީއެސްއެމް)ގެ ފަރާތުން ވަގުތުން ދައްކަމުން ދިޔައިރު، "އަދަދު" ނޫހުން ތައްޔާރު ކޮށްފައިވާ "ސްކީލާން" ޑޮކިއުމެންޓަރީގެ ތަންކޮޅެއް ދެއްކިގެން މައްސަލަ ވަރަށް ގޯސްވެއްޖެއެވެ.

މައްސަލަ ހޫނުވެ، ޕީއެސްއެމްގެ އެޑިޓޯރިއަލް ކޮންޓެންޓާ ޚިލާފު އަދި ނޫސްވެރި ކަމުގެ މިންގަނޑުތަކާ ޚިލާފު ވީޑިއޯއެއް މޯލްޑިވްސް މީޑިއާ ކައުންސިލުން "ގަސްދުގައި" ދެއްކިކަމަށް ބުނެ ޕީއެސްއެމް އިން ވަނީ ނޫސްބަޔާނެއް ބުރާސްފަތި ދުވަހު ނެރެފައެވެ.

މޯލްޑިވްސް މީޑިއާ ކައުންސިލުން ބޭއްވި 2023 ވަނަ އަހަރުގެ ނޫސްވެރިކަމުގެ އިނާމު ދިނުމުގެ ހަފްލާގައި ތަހުގީގީ ދާއިރާއިން ނޫސްވެރިކަމުގެ އިނާމު "އަދަދު" ނޫހުން އުފެއްދި "ސްކީލާން" ޑޮކިއުމެންޓަރީއަށް ވަނީ ލިބިފައެވެ.

މިއީ ގިނަ ބައެއްގެ ސަމާލުކަން ހޯދި މި ޑޮކިއުމެންޓަރީ ގައުމީ ފެންވަރުގައި ބަލައިގަނެ އެވޯޑް ދިން ފުރަތަމަ ފަހަރުކަން ފާހަގަ ކުރެވެއެވެ. މިއީ ރައީސް ޑރ. މުހައްމަދު މުއިއްޒުގެ ދޮން މަންމަ، ސްރީލަންކާގެ ރައްޔިތެއް ކަމުގައިވާ ޖީ ސްކީލާން، ރާއްޖޭން ބްލެކްލިސްޓުކޮށް ޑީޕޯޓުކުރި ގޮތާއި އޭނާ ރައީސް މުއިއްޒު މައްޗަށް ކުރާ ތުހުމަތުތަކުގެ މައްޗަށް ބިނާކޮށް ހަދާފައިވާ ތަހުގީގީ ޑޮކިއުމެންޓަރީ އެކެވެ.

އެމްއެމްސީން އިންތިޒާމު ކުރި ކުލަގަދަ ހަފްލާއެއްގައި 2023 ވަނަ އަހަރު ނޫސްވެރި ކަމުގެ ރޮނގުން އެވޯޑް ލިބޭ ކެޓަގަރީތަކާއި ކެޓަގަރީތަކަށް ނޮމިނޭޓު ވެފައިވާ ފަރާތްތައް ދައްކާފައިވާއިރު އޭގެތެރޭގައި "ސްކީލާން" ޑޮކިއުމެންޓަރީގެ މަންޒަރުތަކެއް ވަނީ ލައިވްކޮށް ޕީއެސްއެމް އިން ދައްކާފައެވެ.

ޕީއެސްއެމްއިން ބުރާސްފަތި ދުވަހު ނެރުނު ބަޔާނުގައި ބުނެފައި ވަނީ އެފަރާތައް އެނގުމަކާއި ނުލާ ކުއްލިއަކަށް ޙަފްލާގެތެރޭގައި "ސްކީލާން" ޑޮކިއުމެންޓަރީގެ ވީޑިއޯ ދެއްކީ މީޑިއާ ކައުންސިލުން "ގަސްތުގައި ދުރާލާ ރާވައިގެން" ކަމަށެވެ.

ޕީއެސްއެމްގެ ނޫސްބަޔާނުގައި ބުނެފައިވަނީ  ޕީއެސްއެމް އިން ލައިވް ކަވަރޭޖް ހަދާ ޙަފްލާތަކުގައި ދައްކާ ވީޑިއޯ ފުޓޭޖްތަކަކީ ޕީއެސްއެމްގެ އޮޑިޓޯރިއަލް އަށް ފެތޭ ކޮންޓެންޓަށް ވާންޖެހޭނެ ކަމަށެވެ. އެހެން ނަމަވެސް ޕީއެސްއެމް ގެ އެޑިޓޯރިއަލް ޕޮލިސީއާ އެ ޑޮކިއުމެންޓަރީގެ ކޮންޓެންޓު ޚިލާފުވަނީ ކިހިނެއް ކަމެއް ބުނެފައެއް ނުވެއެވެ.

"ސްކީލާން" އަށް އެވޯޑް ދިން ރަސްމިއްޔާތުގައި ސަރުކާރުގެ މަތީ ފެންވަރުގެ ބޭފުޅުން ބައިވެރިވެ ވަޑައިގެންފައިވެއެވެ. އޭގެ ތެރޭގައި، ނައިބު ރައީސް ހުސައިން މުހައްމަދު ލަތީފް އާއި ގައުމިއްޔަތު މިނިސްޓަ އާދަމް ނަސީރު އާއި ރައީސް އޮފީހުގެ މީޑިއާ ކަންކަން ބަލަހައްޓަވާ މިނިސްޓަރު އިބްރާހިމް ހަލީލު އާއި ސަރުކާރުގެ ތަރުޖަމާނު ހީނާ ވަލީދު ހިމެނިވަޑައިގަންނަވައެވެ.

މި ވީޑިއޯ އޮންއެއަރވި މައްސަލައިގައި ޕީއެސްއެމް އިން ބުނީ، މިކަމަކީ ޕީއެސްއެމް އަށް ރައްޔިތުން ކުރަމުން އަންނަ އިތުބާރު ގެއްލި، ކުންފުނީގެ މައްޗަށް އޮތް ގާނޫނީ ވާޖިބުތައް އަދާކުރުމަށް ހުރަސްއެޅި، އިއާދަ ނުކުރެވޭވަރުގެ ގެއްލުން ލިބިދާނެފަދަ އަމަލެއް ކަމުގައި ދެކޭ ކަމަށެވެ.

މީޑިއާ ކައުންސިލުން މި ވީޑިއޯ ދެއްކި މައްސަލަ ބަލައިދިނުމަށް ޕީއެސްއެމް އިން ރައްޔިތުންގެ މަޖިލީހަށް ހުށަހަޅާފައިވާ ކަމަށްވެސް ބަޔާނުގައި ބުނެފައިވެއެވެ.