ހޫދު، ރަންނަމާރި ޗެލެންޖު ކާމިޔާބު ކޮށްފި

ރަންނަމާރި ޗެލެންޖު 1446 ގެ ފިރިހެން އޯޕަން ބައިގެ ޗެމްޕިއަންކަން ހޫދު އަޙުމަދު (ހޫބްސް) ހޯދައިފި އެވެ.

މޯލްޑިވްސް ސާފިން އެސޯސިއޭޝަން (އެމްއެސްއޭ) އިން ކުރިއަށް ގެންދާ ދިވެހި ސާފް ލީގުގެ ފަހު މުބާރާތަކީ ރަންނަމާރި ޗެލެންޖެވެ. މުބާރާތުގެ ސެމީ ފައިނަލްގެ ހީޓު ތަކާއި، ފައިނަލް ހީޓު ކުރިއަށް ދިޔައީ ހުކުރު ދުވަހު އެވެ. ވަރުނުލާ ރާޅު ގަނޑު ސަރަހައްދުގައި ކުރިއަށް ދިޔަ މުބާރާތުގެ ފިރިހެން އޯޕަން ބައިގެ ފައިނަލްގައި ހޫދު ވާދަކޮށްފައި ވަނީ ކަޔާން ޢަބްދުﷲ ޢަރީފްއާ އެވެ. ފައިނަލް ހީޓުގައި ހޫދުގެ ސްކޯ އަކީ 11.25 އެވެ. އަދި ކަޔާންގެ ސްކޯ އަކީ 10.05 އެކެވެ.

މުބާރާތުގެ 18 އަހަރުން ދަށުގެ ޗެމްޕިއަންކަން ހޯދީ ޔަސީން އަޙުމަދު ނާޝިދު އެވެ. އެއީ ފައިނަލްގައި ކަޔާންގެ މައްޗަށް ކުރި ހޯދައިގެންނެވެ. ފައިނަލް ހީޓުގައި ޔަސީން ވަނީ 11 ޕޮއިންޓުގ ސްކޯއެއް ހޯދައިފަ އެވެ. ދެ ވަނަ އަށް ދިޔަ ކަޔާން އަށް ލިބުނީ 9.70 ގެ ސްކޯ އެކެވެ.

މުބާރާތުގެ އަންހެން ބައިގެ ޗެމްޕިއަންކަން ހޯދީ މަރިޔަމް ރާހިލް ނަސީމް (އާޔާ) އެވެ. އެއީ ފައިނަލް ހީޓުގައި ޝާޒިޔާ ސައީދުގެ މައްޗަށް ކުރި ހޯދައިގެންނެވެ. ފައިނަލް ހީޓުގައި އާޔާގެ ސްކޯ އަކީ 10.25 އެކެވެ. އަދި ދެ ވަނަ އަށް ދިޔަ ޝާޒްގެ ސްކޯ އަކީ 6.50 އެކެވެ. މިއީ އާޔާ އަންހެން ބައިގެ ޗެމްޕިއަންކަން ޖެހި ޖެހިގެން ހޯދި ހަތަރު ވަނަ ފަހަރެވެ.

މީގެ އިތުރުން ރަންނަމާރި ޗެލެންޖުގައި ކުރިއަށް ދިޔަ މަރުޙަބާ ކަޕް ކާާމިޔާބު ކޮށްފައި ވަނީ މާލެ ޓީމުންނެވެ. މާލެ ޓީމުން މަރުޙަބާ ކަޕް ކާމިޔާބު ކޮށްފައި ވަނީ ފައިނަލްގައި ރ.ރަސްމާދޫގެ މައްޗަށް ކުރި ހޯދައިގެންނެވެ. ފައިނަލްގައި މާާލެ ޓީމުން ވަނީ 27.26 ގެ ސްކޯއެއް ހޯދައިފަ އެވެ. އަދި ރަސްމާދޫ އަށް ލިބުނީ 25.89 ގެ ސްކޯއެކެވެ.