100 އަށްވުރެ ގިނަ ރާޅާއެޅުންތެރިންނާއެކު ގައުމީ ރާޅާއެޅުމުގެ މުބާރާތް ފަށައިފި

ކޮވިޑް-19 ގެ މެދުކެނޑުމަށް ފަހު ގައުމީ ރާޅާއެޅުމުގެ މުބާރާތް މުބާރާތް ފަށައިފިއެވެ.

މޯލްޑިވްސް ސާފިން އެސޯސިއޭޝަން (އެމްއެސްއޭ) އިން އިންތިޒާމުކޮށްގެން ބާއްވާ މި އަހަރުގެ މުބާރާތަކީ ތާރީޚީ މުބާރާތެކެވެ. އެގޮތުން މި އަހަރުގެ މުބާރާތުގައި ރިކޯޑު އަދަދަކަށް ރާޅާއެޅުންތެރިން ބައިވެރިވިއިރު، އާކަންތައްތަކަކާއެކު މި މުބާރާތް ވަނީ ތާރީޚުން ޖާގަ ހޯދާފައެވެ.

"ސީސްޕޯޓްސް ރަންނަމާރި ޗެލެންޖު 1443" ގެ ނަމުގައި ބާއްވާ މި މުބާރާތުގައި މި ފަހަރު 14 ރަށަކަށް ނިސްބަތްވާ ޓީމުތައް ވާދަކުރާއިރު، އޭގެ ތެރޭގައި 25 ރަށަކަށް ނިސްބަތްވާ 102 ރާޅާއެޅުންތެރިން ހިމެނެއެވެ.

އަދި މި ފަހަރުގެ މުބާރާތުގައި ޚާއްސަ ދެ ކަމެއް ފާހަގަކޮށްލެވެއެވެ. އެއީ ޑިޖިޓަލް ސްކޯރިން ސިސްޓަމަކުން އިންޓަނޭޝަނަލް ސާފިން އެސޯސިއޭޝަން (އައިއެސްއޭ) ސެޓިފައިޑް އަދި ރާއްޖެއަށް ނިސްބަތްވާ ޖަޖުންގެ ޕެނަލަކުން މި ފަހަރުގެ މުބާރާތް އިންސާފުކުރުމާއި، ފުރަތަމަ ފަހަރަށް ގައުމީ މުބާރާތުގައި އަންހެން އޯޕަން ކެޓަގަރީ ތައާރަފުކުރުމެވެ. ޑިޖިޓަލް ސްކޯރިން ސިސްޓަމަކުން މި ފަހަރުގެ މުބާރާތް ޖަޖުކުރާއިރު، މިއީ މި ގޮތަށް ޑިޖިޓަލްކޮށް ޒަމާނީ ފެންވަރުގައި މާކްސް ގުނާ ފުރަތަމަ ފަހަރެވެ.

މި މުބާރާތުގެ ޖޫނިއާ ބައިގައި މި ފަހަރު 26 ރާޅާއެޅުންތެރިން ބައިވެރިވިއެވެ. މިއީ މީގެކުރިންވެސް ތަރުހީބު ބޮޑު ޑިވިޝަނެކެވެ. މީގެ އިތުރުން ފިރިހެން ޝޯޓް ބޯޑް އޯޕަން ޑިވިޝަނުގައި 48 ރާޅާއެޅުންތެރިން ވަނީ ބައިވެރިވެފައެވެ.

އަދި މި މުބާރާތުގެ އަންހެން އޯޕަން ޑިވިޝަނުގައި ފަސް ރާޅާއެޅުންތެރިން ބައިވެރިވެފައިވާއިރު، އެންމެ ފޯރިގަދަ ޑިވިޝަން ކަމަށްވާ މާސްޓާސް ޑިވިޝަނުގައި 21 ރާޅާއެޅުންތެރިން ވަނީ ބައިވެރިވެފައެވެ. މި ޑިވިޝަނުގައި ބައިވެރިވަނީ ރާޅާއެޅުމުގައި އެންމެ ފުންނާބު އުސް ރާޅާ އެޅުންތެރިންނެނެވެ.

މި ފަހަރުގެ މުބާރާތުގައި ސާފަރުން ވާދަކުރާ ރަށްތަކަށް ބަލާއިރު، ހއ. ތުރާކުނު، ށ. މިލަންދޫ، ށ. ކޮމަންޑޫ، ހދ. ކުޅުދުއްފުށި، ސިޓީ، އައްޑޫ ސިޓީ، ފުވައްމުލަކު ސިޓީ، ޅ. ނައިފަރު، ބ. އޭދަފުށި، ކ. ހިންމަފުށި، ކ.ގުޅި، އދ. އޮމަދޫ، ތ. ކަނޑޫދޫ، ލ، މާބައިދޫ ގދ. ގައްދޫ، ގދ. ވާދޫ، ރ. ރަސްމާދޫ، ނ. ކުޑަފަރި އަދި ކ. ގުރައިދޫ، މ. މުލައް، މ. މުލި، ދ. ކުޑަހުވަދޫ، ފޭދޫ، ހިމެނެ އެވެ.

މުބާރާތުގެ ގަވާއިދުގައިވާ ގޮތުން އެއް ސާފަރަށް ވުރެ ގިނައިން އެއް ރަށަކަށް ނިސްބަތްވާ ސާފަރުން ވާދަކުރާނަމަ ރާޅާއެޅުންތެރިން ގުނާނީ ޓީމެއްގެ ގޮތުގައެވެ. މި މުބާރާތް ކުރިއަށްދާނީ މި މަހުގެ 30 ވަނަ ދުވަހުގެ ނިޔަލަށް މާލޭ ރާޅުގަނޑު ސަރަހައްދުގައެވެ.