މި އަހަރުގެ އޭޝިއަން ސާފިން ޗެމްޕިއަންޝިޕާއި ބޮޑީބޯޑިން ވޯލްޑް ޓުއާ މުބާރަތެއް ރާއްޖޭގައި ބާއްވާނެ ކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވިދާޅުވެއްޖެއެވެ.
މި އަހަރަށް ރައްޔިތުންގެ މަޖިލީސް ހުޅުވާ ޖަލްސާގައި ރިޔާސީ ބަޔާން އިއްވަވަމުން ރައީސް ވިދާޅުވީ ދިވެހި ޒުވާނުންނަށް ލިބޭ ހަކަތައަކީ ގައުމުގެ ދުވެއްޔަށް ލިބޭނެ ހަލުވިކަމެއް ކަމަށާއި، އެ ހަލުވިކަން ހޯދުމަށްޓަކާ ކުޅިވަރުގައި ކުރި ފަޅަން ޖެހޭ ކަމަށެވެ. އަދި ތަފާތު މައިދާނުން ތަށި އުފުލާލަން އެދޭ ޒުވާނުން ގިނަ ކަމަށާއި، އަދި ޒުވާނުން ރަންވަނަ ހޯދުމުން ރީތިނަން ލިބެނީ ހުރިހާ ދިވެހިންނަށް ކަމަށްވެސް ވިދާޅުވިއެވެ.
ރައީސް ވިދާޅުވީ ގާއިމު ކުރެވޭ ތަފާތު ކުޅިވަރުގެ ވަސީލަތްތަކުގެ ސަބަބުން ޒުވާނުންނަށް ކުރިއެރުން ލިބި، ބައިނަލްއަގުވާމީ މުބާރާތްތައް ރާއްޖޭގާ ބާއްވަން ފަހިވާ ކަމަށެވެ. އެގޮތުން މޫދު ކުޅިވަރުގެ މަންޒިލެއްގެ ގޮތުގައި މުޅި ދުނިޔެއަށް ރާއްޖެ ތައާރަފުކުރުމަކީ ވަރަށް ބޭނުންތެރި ކަމެއް ކަމަށް ވިދާޅުވިއެވެ. އެއާއެކު މި އަހަރުގެ އޭޝިއަން ސާފިން ޗެމްޕިއަންޝިޕާއި ބޮޑީބޯޑިން ވޯލްޑް ޓުއާ މުބާރަތެއް ރާއްޖޭގައި ބާއްވާނެ ކަމަށް ވަނީ ވިދާޅުވެފައެވެ. އަދި މި ކުޅިވަރިތަކަށް އަލި އަޅުވާލައި ރައީސް ވަނީ ސާފިން އާއި ބޮޑީބޯޑީންގެ ގައުމީ ޓީމުތައް މުޅިން އަލަށް އެކުލަވާލައި، ވާއިދުން މުސާރަދޭން ފަށާފައިވާކަންވެސް ފާހަގަކުރައްވާފައެވެ.
ރާއްޖޭގައި ބައިނަލްއަގުވާމީ މުބާރާތްތައް ބޭއްވުމަކީ ރައީސްގެ ރިޔާސީ ވައުދުފުޅެކެވެ. މީގެ އިތުރުން ރައީސްގެ ރިޔާސީ ވައުދުފުޅުތަކުގެ ތެރޭގައި ރާއްޖޭގެ 100 ރަށެއްގައި ފެންވަރު ރަނގަޅު ޓާފް ދަނޑު އެޅުންވެސް ހިމެނޭއިރު، ރިޔާސީ ބަޔާން އިއްވަވަމުން ރައީސް ވިދާޅުވީ ރާއްޖޭގެ އެކި ކަންކޮޅުތަކުގައި 26 ފުޓްބޯޅަ ދަނޑުގެ މަސައްކަތް މިހާރު ނިމިފައިވާ ކަމަށެވެ. އެއާއެކު ގައުމީ ފެންވަރުގެ މެޗުތައް ރާއްޖޭގެ އެކިހިސާބުތަކުގާ މިހާރު ކުޅެވޭ ކަމަށާއި، އަދި އިންޑޯ ސްޕޯޓްސް ކޮމްޕްލެކްސް މަޝްރޫއުގެ ދަށުން ރާއްޖޭގެ އެކި ސަރަހައްދުތަކުގައި މިފަދަ އެކުވެނިތައް ގާއިމުކުރުން މި އަހަރު ކުރިއަށްދާނެ ކަމަށެވެ.
މީގެ އިތުރުން މި އަހަރަށް ކަނޑައަޅާފައިވާ ބޮޑެތި މަޝްރޫއުތަކުގެ ދަށުން ގައުމީ ފުޓްބޯޅަ ދަނޑު ކަމަށްވާ ގަލޮޅު ދަނޑު ތަރައްގީކުރުން ހިމެނޭ ކަމަށާއި، އަދި ގައުމީ ޓޭބަލް ޓެނިސް، ބާސްކެޓްބޯޅަ، ވޮލީބޯޅަ، ހޭންޑްބޯޅަ އަދި ނެޓްބޯޅަ ކޮމްޕްލެކްސްތައް މާލޭގައި ތަރައްގީކުރެވިގެންދާނެ ކަމަށްވެސް ވިދާޅުވިއެވެ.
