ޤައުމީ ޖޫނިއާ ސާފިން ޗެމްޕިއަންޝިޕް ކާމިޔާބު ކުރީ ޔަސީން، ކަޔާން އަދި އިނާން

ޤައުމީ ޖޫނިއާ ސާފިން ޗެމްޕިއަންޝިޕުގެ ޗެމްޕިއަންކަން ޔަސީން އަޙުމަދު ނާޝިދު، ކަޔާން ޢަބްދުﷲ ޢަރީފް އަދި މުޙައްމަދު އިނާން ޢަބްދުލް ޙަންނާން ހޯދައިފި އެވެ.

މޯލްޑިވްސް ސާފިން އެސޯސިއޭޝަން އިން އިންތިޒާމުކޮށްގެން ކުރިއަށް ގެންދިޔަ މި މުބާރާތް ބާއްވާފައި ވަނީ ތިން އުމުރުފުރާ އަކަށް ޚާއްސަކޮށްގެންނެވެ. އެއީ 14 އަހަރުން ދަށުގެ އުމުރުފުރާ، 16 އަހަރުން ދަށުގެ އުމުރުފުރާ އަދި 18 އަހަރުން ދަށުގެ އުމުރުފުރާ އެވެ. މިއަހަރުގެ މުބާރާތް ކުރިއަށް ގެންދިޔައީ ވަރުނުލާ ރާޅުގަނޑު ސަރަހައްދުގަ އެވެ.

މުބާރާތުގެ 14 އަހަރުން ދަށުގެ ޗެމްޕިއަންކަން ޔަސީން ހޯދީ ފައިނަލް ހީޓުގައި 9.83 ގެ ސްކޯއެއް ހޯދައިގެންނެވެ. ފައިނަލް ހީޓުގައި ޔަސީންއާ ވާދަކުރި ނޫހު މުޙައްމަދު ދުނައިމް ވަނީ 6.57 ގެ ސްކޯއެއް ހޯދައިފަ އެވެ. މިދިޔަ އަހަރު އޮތް ޤައުމީ ޖޫނިއާ ސާފިން ޗެމްޕިއަންޝިޕްގެ 14 އަހަރުން ދަށުގެ ޗެމްޕިއަން އަކީ ވެސް ޔަސީން އެވެ.

މީގެ އިތުރުން ޔަސީން ވަނީ މުބާރާތުގެ 16 އަހަރުން ދަށުގެ އުމުރުފުރާގެ ފައިނަލް ހީޓުގައި ވެސް ވާދަކޮށްފަ އެވެ. ނަމަވެސް، 16 އަހަރުން ދަށުގެ ފައިނަލް ހީޓުގައި ޔަސީން ވަނީ ނާކާމިޔާބުވެފަ އެވެ. ޔަސީންގެ މައްޗަށް ކުރި ހޯދައި 16 އަހަރުން ދަށުގެ ޗެމްޕިއަންކަން ހޯދީ ކަޔާން އެވެ. އެއީ 11.33 ގެ ސްކޯއެއް ހޯދައިގެންނެވެ. މި އުމުރުފުރާގެ ފައިނަލް ހީޓުގައި ޔަސީން އަށް ލިބިފައި ވަނީ 7.24 ގެ ސްކޯއެކެވެ. މިދިޔަ އަހަރުގެ މުބާރާތުގެ 16 އަހަރުން ދަށުގެ ޗެމްޕިއަންކަން ހޯދީ ޔަސީން އެވެ.

މީގެ އިތުރުން މުބާރާތުގެ 16 އަހަރުން ދަށުގެ ޗެމްޕިއަންކަން ހޯދީ އިނާން އެވެ. ފައިނަލް ހީޓުގައި އިނާންގެ ސްކޯ އަކީ 10.17 އެކެވެ. އިނާންއާ ވާދަކުރި ޔޫސުފް ކަޔާން ހަމްދާން ޒަކީ އަށް ލިބިފައި ވަނީ 7.50 ގެ ސްކޯއެކެވެ.