ހުށަހަޅާފައިވާ ބަޖެޓުން މުސާރަ ދެވޭނެ ގޮތެއްވެސް ނުވިސްނޭ: މޭޔަރު ނިޒާރު
ކައުންސިލްތަކަށް ބޮލޮކް ގްރާންޓަށް ދިނުމަށް ހިމަނާފައި ވަނީ 1.4 ބިލިއަން ރުފިޔާއެވެ. މިއީ 2023 ވަނަ އަހަރު ކަނޑައަޅާފައިވާ 2.2 ބިލިއަން ރުފިޔާ އާ އަޅާ ބަލާއިރު، ބޮޑުތަނުން ކުޑަ އަދަދެކެވެ
މޭޔަރ ނިޒާރު
ކުރިއަށް އޮތް އަހަރުގެ ދައުލަތުގެ ބަޖެޓުގައި ބްލޮކް ގްރާންޓްގެ ގޮތުގައި ކައުންސިލް ތަކަށް ލިބެން ޖެހޭ މިންވަރު ކުޑަކޮށް, ރައްޔިތުންގެ މަޖިލިހަށް ސަރުކާރުން ބަޖެޓު ހުށަހެޅުމުން އެކަމުގެ ކަންބޮޑުވުން އައްޑޫ ސިޓީގެ މޭޔަރ އަލީ ނިޒާރު ފާޅު ކުރައްވައިފިއެވެ.
ނިޒާރު ވިދާޅުވީ، "ހުށައެޅިފައިވާ ބަޖެޓްގެ ތެރެއިން މުވައްޒަފުންގެ މުސާރަވެސް ދެވޭނެ ގޮތެއް ނުވިސްނޭ،" ކަމަށެވެ.
ބަޖެޓުގެ ކަންބޮޑުވުން ފާޅު ކުރައްވާ ނިޒާރު އެކްސްގައި ކުރެއްވި ޕޯސްޓުގައި "އަތޮޅުތަކުގައި ތަރައްގީގެ ގޮތުގައި ގާކޮޅެއްވެސް ގުޑުވާނުލެވި 2024 ވަނައަހަރު ދައުލަތުގެ ބަޖެޓަށް ހުށައެޅި 50 ބިލިއަނެއްހާ ރުފިޔާ ހުސްވެ ދިޔަކަން" ވަނީ ފާހަގަ ކުރައްވާފައެވެ.
"ކުރިއާލާ އެއްވެސް އިޝާރާތެއްނެތި ބްލޮކް ގްރާންޓްގެ ގޮތުގައި ކައުންސިލްތަކަށް ލިބެންޖެހޭ ބަޖެޓް ކުޑަކޮށް މަޖްލިސްއަށް ހުށައަޅާފައި ވުމަކީ ކަންބޮޑުވުން އޮތް ކަމެއް،" ކަމަށް ނިޒާރު ވިދާޅުވިއެވެ.
ނިޒާރު ވިދާޅުވީ، "ރާއްޖޭގެ މާލީހާލަތު ސަރުކާރުން ހާމަނުކުރާއިރު އަދި ހަރަދު ކުޑަކުރުމަށް އަމުދުން ފިޔަވަޅެއް ނާޅާއިރު މިޒާތުގެ މާލީ ސިޔާސަތަކީ ތަފާތުކުރުމާއި އޮޅުވާލުން ކަމަށް،" ގަބޫލުކުރައްވާ ކަމަށެވެ.
ދައުލަތުގެ ބަޖެޓުން ކައުންސިލްތަކަށް ފައިސާ ދިނުން މަދުކޮށްފައިވަނީ ރައްޔިތުން 'ނިކަމެތި' ކޮށްލަން ކަމަށް ވިދާޅުވެ، އެމްޑީޕީގެ ރައީސް އަބްދުﷲ ޝާހިދު ވެސް ވަނީ ވަރަށް ބޮޑަށް ބަޖެޓަށް ފާޑު ވިދާޅުވެފައެވެ.
އަންނަ އަހަރަށް 56.6 ބިލިއަން ރުފިޔާގެ ބޮޑު ބަޖެޓެއް ސަރުކާރުން މަޖިލީހަށް ހުށަހަޅާފައިވާއިރު، ކައުންސިލްތަކަށް ބޮލޮކް ގްރާންޓަށް ދިނުމަށް ހިމަނާފައި ވަނީ 1.4 ބިލިއަން ރުފިޔާއެވެ. މިއީ 2023 ވަނަ އަހަރު ކަނޑައަޅަފައިވާ 2.2 ބިލިއަން ރުފިޔާ އާ އަޅާ ބަލާއިރު، ބޮޑުތަނުން ކުޑަ އަދަދެއްކަން ފާހަގަ ކުރެވެއެވެ.
ބްލޮކް ގްރާންޓުގެ ގޮތުގައި ކައުންސިލްތަކަށް އަންނަ އަހަރުގެ ބަޖެޓުގައި ކަނޑައަޅާފައިވާ މިންވަރު ކުޑަވުމުން 19 ވަނަ މަޖިލީހުގެ ލާމަރުކަޒީ ކޮމިޓީގެ މުގައްރިރު ކަން ކުރެއްވި ކުރީގެ ހުޅުމާލެ ދާއިރާގެ މެމްބަރު އަލީ ނިޔާޒުވެސް ވަނީ ފާޑު ވިދާޅުވެފައެވެ.
ކައުންސިލްތައް މާލީ ގޮތުން ބާރުވެރި ކުރުމަށް ދައުލަތުން މިދިޔަ ފަސް އަހަރު ދިން އަދަދަށް ވުރެ މަދު އަދަދެއް މި ފަހަރު ބަޖެޓް ގަ ޖަހާފަ އެއޮތީ އޮޅުމަކުންތޯ ނިޔާޒު ވަނީ ސުވާލު ކުރައްވާފައެވެ. އޭނާ އެކްސް ގައި ކުރެއްވި ޕޯސްޓެއްގައި ވިދާޅުވެފައިވަނީ "ޖުމްލަ ބަޖެޓުގެ އަދަދު ބޮޑުވާ ވަރަކަށް 5 އިންސައްތައިގެ ގޮތުގައި ކަނޑައަޅާ އަދަދުވެސް އިތުރުވާން ޖެހޭނެ،" ކަމަށެވެ.
